“Mwa Liseli La Hao Ki Mo Lu Bona Liseli”

HAÑATA liseli ki nto ye lu keshebisanga konji ha lu timelwa ki malaiti mi silalanda se lu pila ku sona si ba mwa simbwi. Ka litohonolo, “simbule sa liseli” la luna sa kwa lihalimu—lona lizazi—ki se si itingwa ka ku tala. Mi ka tuso ya liseli la lizazi, lwa kona ku bona, ku ca, ku buyela, ni ku pila.

Bakeñisa kuli liseli ki la butokwa hahulu kwa bupilo, ha lu swaneli ku komoka ha lu bala kwa Genese kuli liseli ne li bonahezi fa lizazi la pili la pupo. “Mulimu a li: Liseli a li be teñi; mi liseli la ba teñi.” (Genese 1:3) Banna ba ba tompeha ba ba cwale ka Mulena Davida kamita ba zibile Jehova ku ba yena simbule sa liseli ni bupilo. Davida n’a ñozi kuli: “Liwelu-welu la bupilo li ku Wena; mwa liseli la hao ki mo lu bona liseli.”—Samu 36:9.

Manzwi a Davida a kona ku sebeza ka mw’a beezwi kamba ka swanisezo. Buka ya Encyclopædia Britannica i talusa kuli: “Kaniti, liseli ki lona le li konahalisa ku bona.” Ku tuha f’o i ekeza kuli: “Litaba ze ñata li fitanga kwa booko bwa mutu sihulu ka meto ku fita ka lilama ze ñwi.” Bakeñisa kuli buñata bwa ze lu ituta li itingile fa mpo ya ku bona—ili ko ku tokwa liseli kuli ku sebeze hande—liseli hape li itusiswa ka swanisezo mwa Mañolo.

Kacwalo, Jesu n’a bulelezi balutiwa ba hae kuli: “Ki na liseli la lifasi; ya ni latelela h’a na ku zamaya mwa lififi, kono u ka ba ni liseli la bupilo.” (Joani 8:12) Liseli la swanisezo la n’a amile teñi Jesu ne li lushango lwa niti lwa n’a kutalize, ili lo ne lu ka monyehela minahano ni lipilu za bateelezi ba hae. Hamulaho wa lilimo-limo za ku ba mwa lififi la kwa moya, balutiwa ba Jesu ne ba kona ku utwisisa mulelo wa Mulimu kwa batu ni sepo ya Mubuso. Kaniti leo ne li “liseli la bupilo,” kakuli zibo yeo ne i kona ku isa kwa bupilo bwa kamita. Mwa tapelo ya hae ku Ndat’ahe wa kwa lihalimu, Jesu n’a ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Haike ni kamuta lu si keshebisi liseli la kwa moya leo!