Kana luli lwakona kuba ni buikolwiso bwa kuli lisepiso kaufela za Mulimu likatalelezwa? Jesu naanani buikolwiso bobucwalo, mi lituto zahae nelitusize bateelezi bahae kuba ni tumelo. Hamunyakisise swanisezo yanaafile mwa Ngambolo yahae ya fa Lilundu, yebulezwi kwa liñolo la Mateu 5:18 kuli: “Kaniti namibulelela nili, kubunolo kuli lihalimu ni lifasi lisinyehe, kufita kuli taku yenyinyani kufeleleza kamba taku iliñwi mwa Mulao isinyehe lika kaufela lisika ezahala.”

Kwa litaku kaufela za Siheberu, taku yenyinyani kufeleleza ki י (yod), mi ki yona taku ya makalelo kwa litaku zeyemela libizo la Mulimu lelikenile, lona la Jehova. * Kwandaa manzwi ka sibili ni litaku za Mulao wa Mulimu, bañoli ni Bafalisi nebaanga yeñwi ni yeñwi ya ‘litaku’ za Mulao kuba ya butokwa hahulu.

Jesu naabulezi kuli nekukaba bunolo hahulu kuli lihalimu ni lifasi lisinyehe, kufita kuli taku yenyinyani kufeleleza ya Mulao ipalelwe kutalelezwa. Kono Mañolo alubulelela kuli mahalimu ni lifasi likaina kuya kuile. (Samu 78:69) Kacwalo, taba ye ibonisa hande kuli hakuna nihaiba kalulo yenyinyani ya Mulao yene kapalelwa kutalelezwa.

Kana Jehova ubatanga kuli batu balatelele nihaiba likalulo zenyinyani za Mulao? Eni. Hamunyakisise taba ye: Maisilaele ba kwaikale nebabulelezwi kuli basike baloba leliñwi la masapo a ngunyana yenelukiselizwe Paseka. (Exoda 12:46) Mwendi nebaanga kuli wo neli Mulao omunyinyani. Kana nebautwisisize libaka hane basaswaneli kuloba leliñwi la masapo ao? Mwendi nebasika utwisisa. Nihakulicwalo, Jehova Mulimu naaziba kuli bo neli bupolofita bone bubonisa kuli Mesia naasike alobiwa nihaiba lililiñwi la masapo ahae hanaaka shwela fa kota ya linyando.—Samu 34:20; Joani 19:31-33, 36.

Manzwi a Jesu alulutañi? Ni luna lwakona kuba ni buikolwiso bobutiile bwa kuli lisepiso kaufela za Jehova Mulimu likatalelezwa, mane nihaiba zeingiwa kuba zenyinyani. Kwatabisa luli kuziba molutusezwa ki taku yenyinyani kufeleleza ya Siheberu!