Kuzwa feela kwamulaho, Mubupi waluna ubulelelanga batu litaba ka kuitusisa mangeloi ni bapolofita. Kuzwa fo, naaitusisize batu babañwi kuñola lika zende zakaezeza batu kwapili. Mulimu usepisa batu kuli bakato ikola bupilo bobunde kwapili. Lukona kufumana kai lisepiso zeo?

Litaba za Mulimu lifumaneha mwa Mañolo Akenile. (2 Timotea 3:16) Mulimu naaitusisize cwañi bapolofita kuñola litaba zahae? (2 Pitrosi 1:21) Naabeile mihupulo yahae mwa minahano ya batu babañwi ili bao hasamulaho nebañozi litaba za Mulimu. Ka mutala, haiba mutu yomuñwi yanani pisinisi aitusisa muñoli wahae kuñola litaba, haluna kukakanya kuli litaba zeo ki za muñaa pisinisi. Ka nzila yeswana, Mulimu naaitusisize batu kuñola litaba zahae mwa Mañolo Akenile.

Litaba za Mulimu ki za butokwa hahulu kuli mane Mulimu ubata kuli batu kaufela babale litaba zeo ni kuliutwisisa. Kacenu, “taba yende yesafeli” ikutazwa kwa batu babazwelela mwa “macaba kaufela ni mishobo ni lipuo.” (Sinulo 14:6, litaluso ze kwatasi) Ka kufuyaulwa ki Mulimu, Mañolo Akenile afumaneha kaufelaa ona kamba kalulo ya ona mwa lipuo zefitelela 3,000, ili kufita buka ifi kamba ifi.