Batu babañwi baipuzanga ka za haiba litaba zeñozwi mwa Linzwi la Mulimu licincizwe. Mupolofita Isaya naabulezi kuli linzwi la Mulimu “liina kuya kuile.” (Isaya 40:8) Ki lika mañi zekona kulutusa kukolwa kuli lisepiso za Mulimu ze mwa linzwi lahae halisika cinca?

Mulimu unani maata a kubukeleza linzwi lahae ni kutahisa kuli litaba ze mwateñi lisike zacinciwa ni hanyinyani. Mwa linako za kwamulaho, batu bane banani yeloseli ili bane bakopisanga litaba za mwa Mañolo Akenile, nebabalanga taku ni taku ya litaba zeo ili kubona teñi kuli hakuna litaba zene ekezwa, kucinciwa, kamba kusiiwa. Nihakulicwalo, kabakala kusapetahala batu bao nebaezanga mafosisa amanyinyani mwa litaba zene bakopisa.

Kunani miputo yemiñata-ñata ya litaba ze mwa Mañolo Akenile. Haiba omuñwi wa miputo yeo unani mafosisa amanyinyani, wakona kubapanywa ku yemiñwi kuli litaba ze mwa Mañolo Akenile lisike zacinciwa.—Kuli muitute zeñata, mubale taba yeli “Bibele Ipunyuhile Zebaezize Batu Kuli Bacince Lushango Lwayona,” ye fa jw.org/loz.

Ka mutala, halunyakisiseñi Miputo ya Kwa Liwate Lelishwile, yene fumanwi ki batu babañwi mwa misima ya macwe bukaufi ni Liwate Lelishwile ka silimo sa 1947. Mwa miputo yeo kufumaneha litaba zeñwi za mwa Mañolo Akenile zene ñozwi lilimo zefitelela 2,000 kwamulaho. Licaziba neba bapanyize litaba ze mwa miputo yeo ni litaba ze mwa Mañolo Akenile zelunani zona kacenu. Ki lika mañi zene bafumani?

Hamulaho wa kutatuba litaba ze mwa miputo yeo ka tokomelo, licaziba bao nebafumani kuli litaba ze mwa Linzwi la Mulimu kacenu zaswana ni ze mwa miputo yakale yeo. * Kacwalo, lwakona kuba ni buikolwiso bwa kuli Mulimu utahisize kuli litaba zelubala mwa Mañolo Akenile kacenu lisike zacinciwa.

Lwakona kuba ni buikolwiso bwa kuli litaba zelubala mwa Linzwi la Mulimu ki za niti mi linepahalile. Cwale halunyakisiseñi zeluituta ka za Mulimu kwa litaba zene bañozi bapolofita.