Mupolofita Mushe naabulezi kuli haiba lumamela milao ya Mulimu, lukafumana limbuyoti kuzwelela ku Mulimu. (Deuteronoma 10:13; 11:27) Haluswaneli kumamela milao ya Mulimu ka libaka la kuli lusaba kufiwa koto. Luutwa Mulimu bakeñisa kuli unani butu bobunde, mi nto yeo itahisa kuli lumulate ni kusaeza lika zekona kumunyemisa. “Se ki sona sekutalusa kulata Mulimu, kuli lumamele milao yahae.”—1 Joani 5:3.

Kono kuutwa Mulimu kukona kulutahiseza cwañi limbuyoti? Halunyakisiseñi linzila zepeli.

“Na Jehova, ki na Mulimu wahao, yakuluta kuli ufumane tuso, yakuzamaisa mwa nzila yeuswanela kuzamaya ku yona.”—ISAYA 48:17.

Jehova Mulimu, yena Mubupi waluna, waluziba hande luli mi ulufa ketelelo yelutokwa. Haiba lubata kuli zaluluta Mulimu lilutuse kuezanga likatulo zende mwa bupilo, luswanela kusebelisa zeluituta mwa Mañolo Akenile.

“Babatabile mane ki babautwa linzwi la Mulimu ni kulimamela!”—LUKA 11:28.

Kacenu, batu babañata babasebelisa ze mwa Linzwi la Mulimu baikola kupila bupilo bwa tabo. Ka mutala, muuna yomuñwi yapila kwa Spain naanani kacima-cima kakamaswe hahulu mi hape naasa pilisani hande ni babañwi mane nihaiba musalaa hae. Zazi leliñwi, abala zanaañozi mupolofita Mushe ka za Josefa, mwanaa Jakobo, yanaawile pilu. Josefa naalekisizwe sina mutanga mi naakenyizwe mwa tolongo kabakala litaba za buhata zanaatamelelizwe, kono naazwezipili kupilisana ni babañwi ka kuwa pilu, ka kozo, mane ni kuswalela babañwi. (Genese, likauhanyo 37-45) Muuna yo wa kwa Spain cwale utalusa kuli: “Kunahanisisa mutala wa Josefa kunitusize kuba mutu yabunolo, yasishemo, mane ni kuba ni buiswalo. Ka nako yacwale, niikola kupila bupilo bobunde hahulu.”

Mwa Mañolo Akenile, kunani litaba zeñata zelutusa kuziba mwakupilisanela hande ni babañwi. Mwa taba yetatama, lukanyakisisa litaba zeñata ka za taba yeo.