Hora yapili kuzwa fa pepelwa mbututu ibanga nako ya butokwa hahulu yekona kutahisa licinceho. Libaka? Kakuli bo ma mbututu hababa bukaufi ni limbututu zabona ka nako ya butokwa yeo, limbututu zeo likahula hande. *

Ki nto mañi yetahisanga kuli me ababalele hahulu mbututu yahae yesazo pepwa? Mwa buka yebizwa The Journal of Perinatal Education, caziba yabizwa Jeannette Crenshaw utalusa kuli, kuekezeha kwa hormoni yebizwa oxytocin “kutahisanga kuli me abe ni maikuto a bushemi haswala mwanaa hae yasazo pepwa, kumutalima, ni kumuanyisa.” Hormoni yeñwi yebanga teñi ka nako yeo “itusanga me kufa mbututu yahae lika zeitokwa” ni kutahisa kuli me aswalisane hahulu ni mbututu yahae. Ki kabakalañi nto yeo haili ya butokwa?

Jehova Mulimu, yena Mubupi waluna ya lilato, ki yena yatahisize kuli kube ni swalisano yetuna yemwahalaa me ni mbututu yahae. * Mulena Davida naaitebuhile ku Mulimu kabakala kumuzwisa “mwa mba” ni kutahisa kuli aikutwe kusilelezwa mwa mazoho a bo mahe. Naalapezi kuli: “Nibeilwe mwa pabalelo yahao kuzwa fonipepelwa; ubile Mulimu waka kuzwa fonizwela mwa mba ya bo ma.”—Samu 22:9, 10.

MUNAHANE TABA YE: Haiba Mulimu naabupile me ka nzila ye mukonisa kubabalela mbututu yahae ka lilato ni kuifa zeitokwa, kana taba yeo haibonisi kuli Mulimu waluisa pilu ka kuba ‘bana bahae’?—Likezo 17:29.

Jesu Kreste, yena yaziba hande Mubupi kufita mutu ufi kamba ufi, naalutile kuli: “Kana litaha zepeli halileki sheleñi ya muwayawaya wa teko yenyinyani? Kono hakuna nihaiba iliñwi ku zona yekawela fafasi Ndataa mina asalemuhi. Kono nihaiba yona milili ye kwa litoho zamina ibalilwe kaufelaa yona. Hakulicwalo, musike mwasaba; mu ba butokwa hahulu kufita litaha zeñata.”—Mateu 10:29-31.

Ki basikai babaisanga pilu kwa linyunywani zenyinyani, mi hakuna yalemuhanga kuli iliñwi ku zona iwezi fafasi. Kono Ndataa luna ya kwa lihalimu waziba yeñwi ni yeñwi ya zona! Mi linyunywani—nihaiba linyunywani zeñata—haki za butokwa  hahulu ku yena kufita mutu. Tuto ya butokwa ye luituta ki ya kuli: Hamuswaneli ‘kusaba’ kuli Mulimu hamizibi. Kono muzibe kuli, umiisa hahulu pilu!

Mañolo alukolwisa kuli

• “Meeto a Jehova abona kai ni kai, kutalima babamaswe ni babande.”—LIPROVERBIA 15:3.

• “Meeto a Jehova atalimezi babalukile, mi mazebe ahae ateeleza mihuwo yabona ya kukupa tuso.”—SAMU 34:15.

• “Nikatabiswa hahulu ki lilato lahao lelisa feli, kakuli uboni manyando aka; waziba ziyezi-tuna yenili ku yona.”—SAMU 31:7.

Kana kuziba kuli Mulimu uluisa hahulu pilu ni kuli walutokomela ka lilato, kwakona kulutusa mwa bupilo? Kaniti kwakona kulutusa, sina feela mobataluseza bo Hannah, * ba kwa England, kuli:

“Ka nako yetelele, neniikutwanga kuli Jehova naasa nilati, ni kuli litapelo zaka nelisa alabiwi. Neninahana kuli lika zeo neli ezahala kabakala kuli neni sina tumelo. Neniikutwa kuli nifiwa koto kamba kusa iswa pilu bakeñisa kuli hani wa butokwa. Neniikutwa kuli Mulimu naasina taba ni na.”

Kono bo Hannah habasa kakanya kuli Jehova wa batokomela ni kuli wa balata. Ki nto mañi yetahisize kuli batuhele kuikutwa cwalo? Batalusa kuli: “Neni cincize hanyinyani-hanyinyani.” Baekeza kuli: “Nisahupula ngambolo yeñwi ya Bibele yene nitusize hahulu yene bulela za sitabelo sa Jesu sesiliulula ili yenefilwe lilimo-lilimo kwamulaho, nei nitusize kukolwa kuli Jehova wa nilata. Mi Jehova haalabanga litapelo zaka, hañata nalotisanga miyoko kakuli nilemuhanga kuli wa nilata. Hape kuituta Bibele ni kufumaneha kwa mikopano ya Sikreste ku nilutile zeñata ka za Jehova, tulemeno twahae, ni mwaikutwela ka zaluna. Ka nako ye, naiponela hande kuli Jehova wa lutusa ni kululata kaufelaa luna, mi walata kubabalela mañi ni mañi waluna.”

Litaba ze babulela bo Hannah za susueza. Kono ki lika mañi zekona kumikolwisa kuli Mulimu wa utwisisa ni kuhupula momuikutwela? Taba yetatama ikanyakisisa puzo yeo.