KANA KUNANI ZEMUKONA KUEZA KULI MUTOBA NI BUPILO BOBUNDE KWAPILI? Batu babañwi balumela kuli bupilo bwabona buzamaiswa ki nto yeñwi isiñi liketo zebaeza. Habapalelwa kupeta zene balelile kueza, babulelanga kuli kunani lika zeñwi mwa bupilo zesakonahali feela kupetiwa. Babulelanga kuli: “Nenisika lukisezwa kupeta milelo yaka!”

Babañwi bona baikutwanga hahulu bumaswe bakeñisa kuli habakoni kutibela manyando ni kusa luka kokuatile mwa lifasi lelupila ku lona. Nikobaka lika kuli bakondise mwa bupilo bwabona, mulelo wabona wakona kutibelwa ki lika zecwale ka lindwa, bukebenga, likozi za ka taho, ni matuku, ili zekona kutaha ka nako ifi kamba ifi. Baipuzanga kuli ‘Ninyandelañi?’

Ki niti kuli fokuñwi miinelo yemukona kukopana ni yona mwa bupilo yakona kumitibela kupeta zene mulelile. (Muekelesia. 9:11) Nihakulicwalo, kuli muto pila bupilo bwa kuya kuile, mutokwa kueza keto yende. Mane Bibele ibonisa kuli mutokwa kueza keto yende kuli muto pila bupilo bwa kuya kuile. Hamunyakisise zeibulela.

Mulimu naaitusisize Mushe, mueteleli wa sicaba sa Isilaele wa kwaikale kubulelela Maisilaele bane batuha bakena mwa Naha ya Sepiso kuli: “Nibeile bupilo ni lifu fapilaa mina, mbuyoti ni sikuto; mi uswanela kuketa bupilo kuli upile, wena ni babasimuluha ku wena, ka kulata Jehova Mulimu wahao, ka kuutwa linzwi lahae, ni ka kumukumalela.”—Deuteronoma 30:15, 19, 20.

“Nibeile bupilo ni lifu fapilaa mina, mbuyoti ni sikuto; mi uswanela kuketa bupilo.”​—Deuteronoma 30:19

Mulimu naalukuluzi Maisilaele mwa butanga bwa mwa Egepita ni kubasepisa kuli nebakayo pila bupilo bwa tabo inze balukuluhile mwa Naha ya Sepiso. Kono nebatokwa kueza sesiñwi kuli bafumane limbuyoti zeo. Nebatokwa “kuketa bupilo.” Ka mukwa ufi? ‘Ka kulata Mulimu, ka kuutwa linzwi lahae, ni ka kumukumalela.’

Kacenu, mutokwa kueza keto yeswana, mi keto yemukaeza ikatahisa kuli muto pila bupilo bobunde kamba kutokwa. Haiba muiketela kulata Mulimu, kuutwa linzwi lahae, ni kumukumalela, fo kutalusa kuli muketa kutopila bupilo bobusa feli mwa paradaisi fa lifasi. Kono ki lika mañi zemuswanela kueza kuli mubonise kuli mwalata Mulimu, mwautwa linzwi lahae, mi mwamukumalela?

Kalemeno kakatuna ka Mulimu ki lilato. Muapositola Joani naasusumelizwe ki moya wa Mulimu kuñola kuli “Mulimu ki lilato.” (1 Joani 4:8) Mane Jesu hanaabuzizwe kuli ki ifi taelo yetuna ka kufitisisa, naalabile kuli: “Ulukela kulata Jehova Mulimu wahao ka pilu yahao kaufela ni ka moyo wahao kaufela ni ka munahano wahao kaufela.” (Mateu 22:37) Luswanela kuba ni bulikani bobunde ni Jehova Mulimu kabakala kuli lwamulata, isiñi kumusaba ka kuezeza feela mulao. Kono ki kabakalañi haluswanela kuiketela kumulata?

Lilato lanani lona Jehova kwa batu liswana sina lilato lebanani lona bashemi kwa bana babona. Nihaike kuli habasika petahala, bashemi babanani lilato baetelelanga, kususueza, kutusa, ni kukalimela bana babona bakeñisa kuli babata kuli bana babona babe babatabile ni kuli bakone kukondisa mwa bupilo. Kono ki lika mañi zebalibelelanga bashemi kwa bana babona? Babata kuli bana babona babalate ni kuisa pilu kwa lika zebabalutile ilikuli likone kubatusa. Kacwalo, kwaswanela luli ku Ndataa luna ya kwa lihalimu  kulibelela kuli lubonise buitumelo kwa lika kaufela zaluezelize.

Mwa puo mone iñozwi Bibele lwapili, linzwi la “kuutwa” hañata liitusiswangwa kutalusa “kumamela.” Kana haki zona zelutalusanga halubulelela mwanana kuli: “Uutwe bashemi bahao”? Kacwalo, kuutwa linzwi la Mulimu kutalusa kuituta lona ni kumamela zabulela. Bakeñisa kuli halukoni kuutwa Mulimu inze abulela ku luna luli, lwamuutwa ka kubala ni kusebelisa ze mwa Linzwi lahae, yona Bibele.—1 Joani 5:3.

Kuli abonise libaka kuutwa Linzwi la Mulimu hakuli kwa butokwa, nako yeñwi Jesu naabulezi kuli: “Mutu hana kupila sinkwa feela, kono ukapila ni ka linzwi kaufela lelizwa mwa mulomo wa Jehova.” (Mateu 4:4) Sina lico za kwa mubili halili za butokwa, kuituta ka za Mulimu mane ki kwa butokwa hahulu. Libaka? Mulena Salumoni yabutali naatalusize kuli: “Butali bwasileleza sina masheleñi hasileleza, kono bunde bwa zibo ki bo: Butali bubukeleza bupilo bwa yanani bona.” (Muekelesia 7:12) Haiba luba ni zibo ni butali zezwa ku Mulimu, likalusileleza ni kulutusa kueza likatulo zende zekona kulutusa kufumana bupilo bobusa feli kwapili.

Muhupule swanisezo ya Jesu yelunyakisisize mwa taba yefelile ili mo Jesu naabulezi kuli: “Munyako oya kwa bupilo ukumbani ni nzila yeya kwateñi ki yesisani, mi baba ifumana ki basikai.” (Mateu 7:13, 14) Kuzamaya mwa nzila yecwalo kutokwa kuli luzwelepili kuba bukaufi ni mutu yaluetelela yanani yeloseli, mi kueza cwalo kukalutusa kuyofita koluya, ili kufumana bupilo bobusa feli. Kacwalo, lutokwa kuzwelapili kuba bukaufi ni Mulimu. (Samu 16:8) Kono lukona kueza cwani cwalo?

Zazi ni zazi, kunani lika zeñata zeluswanela kueza mi hape kunani lika zeñwi zeñata zene lukatabela kueza. Lika zecwalo zakona kulupatehisa kamba kuluyembulula kuli mane haluna kufumana hande nako ya kueza lika zabata Mulimu. Kona libaka Bibele hailuhupulisa kuli: “Mutokomele hahulu momuzamaela kuli hamuzamayi sina likuba kono sina batu bababutali, inze muitusisa hande nako yamina, kakuli mazazi amaswe.” (Maefese 5:15, 16) Lukona kuzwelapili kuba bukaufi ni Mulimu ka kuunga silikani saluna ni yena kuba nto ya butokwa hahulu mwa bupilo bwaluna.—Mateu 6:33.

Nihaike kuli hakuna zemukona kueza kuli mucince zeneezahezi kwamulaho, mwakona kueza lika zeñwi zekamitusa ni kutusa balatiwa bamina kutopila bupilo bobunde kwapili. Bibele ibulela kuli Ndataa luna ya kwa lihalimu, yena Jehova Mulimu, walulata luli mi ulutaluseza zatabela kuli lueze. Hamubone zalutaluseza Mulimu ka kuitusisa mupolofita Mika:

“Wena mutu, ukubulelezi sesinde. Mi ki sika mañi satokwa Jehova ku wena? Satokwa feela kikuli ueze sesilukile, ulate busepahali, ni kuli uzamaye ka buikokobezo ni Mulimu wahao!”—Mika 6:8.

Kana mukaiketela kuutwa Jehova ka kutiisa silikani samina ni yena ilikuli mutoikola limbuyoti za kuya kuile zakafa babalata kumuutwa? Muikezeze katulo!