Jesu naalutile batu kuli bapilisane ka kozo ni babañwi. Kono nako yeñwi naabulelezi baapositola bahae kuli: “Musike mwanahana kuli nitisize kozo mwa lifasi; hanisika tisa kozo, kono nitisize mukwale. Kakuli nitisize fapahano mwahalaa mwana wamushimani ni ndatahe, ni mwahalaa mwana wamusizana ni mahe, ni mwahalaa musalaa mutu ni mukwenyanaa hae wamusali.” (Mat. 10:34, 35) Jesu naatalusañi?

Jesu naasabati kufapahanya mabasi, kono naaziba kuli litaba zanaaluta nelika tahisa kuli batu mwa mabasi amañwi basike bautwana. Kacwalo, batu bababata kuba balutiwa ba Kreste ni kukolobezwa baswanela kuziba kuli fokuñwi bahabo bona habana kutabiswa ki katulo yeo. Haiba balwaniswa ki mutu yebanyalani ni yena yasi Paki kamba ba mwa lubasi, kukona kubabela taata kumamela lituto za Kreste.

Bibele isusueza Bakreste kuli “[bapilisane] ka kozo ni batu kaufela.” (Maro. 12:18) Kono litaba zanaalutile Jesu nelikona kuba sina “mukwale” mwa mabasi amañwi. Taba yeo ikona kuezahala haiba yomuñwi mwa lubasi aamuhela lituto za Jesu kono babañwi bahana lituto zeo kamba kulilwanisa. Mwa muinelo wo, bahabo mutu yo yaituta niti, bona ba ndu yahae, bakona kuba “lila” zahae.—Mat. 10:36.

Balutiwa ba Kreste babapila ni bahabo bona ba bulapeli busili, fokuñwi bakopananga ni miinelo yelika lilato labona ku Jehova ni Jesu. Ka mutala, bahabo bona babasi Lipaki, bakona kubasusueza kuli baeze ni bona mukiti omuñwi wa bulapeli. Mwa muinelo otaata wo, batokwa kuikatulela yebaka tabisa. Jesu naabulezi kuli: “Mutu kaufela yalata hahulu ndatahe kamba mahe kufita na, haaniswaneli.” (Mat. 10:37) Niteñi, Jesu naasatalusi kuli balutiwa bahae batokwa kulata bashemi babona hanyinyani kuli bamuswanele. Kono naakoñomeka kuli luswanela kubeya lika za butokwa mwa sibaka sapili. Haiba ba lubasi babasi balumeli balulwanisa kabakala kuli lulapela Jehova, lukazwelapili kubalata kono haluna kutuhela kusebeleza Mulimu kabakala kuli lilato laluna ku yena ki la butokwa hahulu.

Kusina kukakanya, lukona kuikutwa hahulu bumaswe haiba ba lubasi balulwanisa. Niteñi, balutiwa ba Jesu baswanela kuhupula manzwi anaabulezi, aali: “Mutu kaufela yasalumeli kulwala kota yahae ya linyando ni kunilatelela, haaniswaneli.” (Mat. 10:38) Ka mubulelelo omuñwi, Bakreste baanga twaniso yezwa kwa mabasi abona sina nyandiso yanaabulezi Kreste kuli balutiwa bahae nebaka tokwa kutiyela. Ka nako yeswana, banani buikolwiso bwa kuli muzamao wabona omunde ukasusueza ba lubasi lwabona babasi balumeli kutuhela kubalwanisa ni kuamuhela lushango lwa mwa Bibele.—1 Pit. 3:1, 2.