Muuna ni musali babanyalani ili babakuteka buitamo bwa linyalo labona, baanga linyalo kuba nto yeinelela mi kueza cwalo kwabasileleza. Yomuñwi ni yomuñwi wabona unani sepo ya kuli bakazwelapili kuba mwa linyalo nihaiba mwa linako zetaata.

Batu babañwi baba mwa linyalo baikutwanga kuli baswanela kuzwelapili kuba mwa linyalo kabakala kusaba bahabo bona kamba balikani babona. Kono batu babanyalani baswanela kuzwelapili kuba mwa linyalo kabakala kuli balatana ni kukutekana.

SIKUKA SA MWA BIBELE: “Muuna haswaneli kusiya musalaa hae.”—1 Makorinte 7:11.

“Haiba mwakuteka buitamo bwa linyalo lamina, mukaambuka kacima-cima. Mukaakufanga kuswalela bakumina mi mukakupanga swalelo kapili-pili. Hamuna kutuhelela matata emukopana ni ona kuli amikauhanye ku bakumina, kono mukabatanga linzila za kutatulula matata ao.”—Bo Micah.

Batu baba mwa manyalo babasa kuteki buitamo bwa linyalo habakopana ni matata, bakona kubulela kuli, ‘halulumelelani mwa miezezo yaluna ya lika’ mi bakona kubata linzila za kufelisa ka zona linyalo labona.

“Batu babañwi bakenanga mwa linyalo inze baikutwa kuli haiba lika halina kuyo bazamaela hande, ‘bakafelisa’ linyalo leo. Batu habakena mwa linyalo inze banahana kuli linyalo labona lakona kufela nako yeñwi, habakuteki buitamo bwa linyalo kuzwa feela kwa makalelo.”—Bo Jean.

MUIPUZE

Lipuzo zelatelela hamushelani ni bakumina . . .

• Kana muikutwanga kuli nemusa swaneli kunyalana ni bakumina?

• Kana munahananga kuli kambe nemunyalani ni mutu usili?

• Kana mubulelanga kuli “namisiya” kamba “nikabata mutu yaniinga kuba wa butokwa?”

Haiba mualabile eni kwa puzo iliñwi kamba kufitelela, uzibe muswanela kukuteka hahulu buitamo bwa linyalo lamina.

MUAMBOLISANE NI BAKUMINA

• Kana halusa kuteka buitamo bwaluna bwa linyalo sina mone luezezanga kwamulaho? Haiba ki cwalo, ki kabakalañi?

• Ki lika mañi zeluswanela kueza kuli lukuteke hahulu buitamo bwa linyalo laluna?

LIAKALEZO

• Muñolelange bakumina kashango ka kubataluseza kuli mwabalata

• Mubonise kuli mwakuteka buitamo bwa linyalo lamina ka kubeyanga maswaniso a bakumina fa tafule yamina ya kwa musebezi.

• Mulizezange bakumina zazi ni zazi hamuli kwa musebezi kamba hamusiyo hamoho

SIKUKA SA MWA BIBELE: “Sakopanyize Mulimu, kusike kwaba ni mutu yasikauhanya.”—Mateu 19:6.