SPAIN ki naha mokufumaneha batu ni lika zeshutana-shutana. Mwa naha ya Spain, kunani masimu amañata a buloto, likota za veine, ni likota za olive. Kwa mboela wa Spain, kunani feela nuka yeeza likilomita zebato ba ze 14, ili yekauhanya naha yeo kwa Africa.

Batu babañata, kukopanyeleza cwalo ni batu babazwa kwa Fenisia, Magerike, ni babazwa kwa Carthage nebatutezi kwa sibaka seo sesikwa mboela-wiko wa Europe. Maroma hane bafitile mwa sibaka seo mwa lilimo za ma 200 B.C.E., nebabizize sibaka sene bahapile seo kuli Hispania. Hamulaho wa fo, sibaka seo nesitilo hapiwa ki ma Visigoth ni ma Moors, ili bane batuhezi kulatelela lizo zabona.

Mwa silimo sesiñwi cwanoñufa, batu babafitela 68 milyoni nebaizo potela naha ya Spain. Buñata bayelanga  kuyobuha kazazi, makamba amande, lika za kuswanisa za kwamulaho, ni miyaho ya kwaikale. Bapoti babañata hape bayelanga lico za kwa Spain. Lico zeatile kwa naha yeo likopanyeleza lico za mwa mawate, nama ya ngu, nama yeapehilwe hande yekopanyizwe ni miloho, miloho yeciwa butala, ni miloho yeapehilwe kamba yeselilwe oli ya olive. Hape naha ya Spain izibahala hahulu ka lico zecwale ka mai a kuhalika, laisi yekopanyizwe ni lico zeñwi, ni tusikono twa mufuta omuñwi.

Batu ba kwa Spain banani silikani mi balukuluhile. Batu babañata baipapata kuba Makatolika, kono ki basikai feela babayanga kwa Misa. Mwa lilimo za cwanoñufa, batu babazwa mwa Africa, Asia, ni Latin America batutezi kwa Spain. Buñata bwabona baikolanga kuambola za litumelo ni lizo zabona. Lipaki za Jehova baikolanga kuambola ni bona mi babatusanga kuituta zeiluta Bibele fa litaba zeñata.

Mwa silimo sa 2015, Lipaki babafitelela 10,500 nebaitatezi kuyaha kamba kulukisa sinca libaka ze 70 kobaezezanga mikopano yabona, ili zebizwa Mandu A Mubuso. Baeteleli mwa sibaka seo nebafile Lipaki mubu fa kuyahela amañwi kwa Mandu A Mubuso ao. Lipaki za Jehova baezanga mikopano mwa lipuo zefitelela 30, kukopanyeleza cwalo ni puo ya Sisipanishi ka mulelo wa kutusa batu babazwa kwa linaha lisili. Mwa silimo sa 2016, batu babafitelela 186,000 nebafumanehile kwa kupuzo ya lifu la Jesu Kreste, yeeziwanga ki Lipaki za Jehova silimo ni silimo.