Hona cwale-cwale fa, Mubuso wa Mulimu ose lulibelezi ka nako yetelele, ili Mubuso otomilwe ki Mulimu, ukatahisa kuli batu mwa lifasi kaufela bapile hamoho ka kozo ni ka swalisano. Liñolo la Samu 72:7 lisepisa kuli “kozo ikaekezeha.” Kono Mubuso wa Mulimu ukakalisa lili kubusa lifasi kaufela? Mubuso wo ukabusa cwañi lifasi? Mi ki limbuyoti mañi zemuka amuhela Mubuso wo hauka kalisa kubusa?

Bibele neipolofitile kuli kunani lika lisikai zeneka iponahalela hande ili zeneka bonisa kuli Mubuso wa Mulimu ufakaufi. Likezahalo zeo kaufela ki “sisupo” mi likopanyeleza lindwa, tala, matuku, lizikinyeho, ni kuekezeha kwa bumaswe.—Mateu 24:3, 7, 12; Luka 21:11; Sinulo 6:2-8.

Bupolofita bobuñwi bubulela kuli: “Mwa mazazi a mafelelezo kukataha linako zetaata, zeziyeza. Kakuli batu bakaba baitati, babalata masheleñi, . . . babasa utwi bashemi babona, babasina buitumelo, babasa sepahali, babasina lilato la sipepo, babañañelela mihupulo yabona, masawana, babasina buiswalo, bababuhali, babasa lati bunde, . . . babaitundumuna ka buikuhumuso, babalata minyaka kufita kulata Mulimu.” (2 Timotea 3:1-4) Kuzwa feela kwamulaho batu babañwi sebabonisize mikwa yecwalo mwa linzila zeñwi mi basazwelapili kuibonisa. Kono kacenu batu babañata sebabonisa hahulu mikwa yeo.

Bupolofita bo, nebukalile kutalelezwa ka silimo sa 1914. Mane, licaziba ba litaba za kwaikale, batu babazibahala hahulu, ni bañoli ba libuka, nebatalusize ka mone licincelize lifasi hamulaho wa silimo seo. Ka mutala, caziba wa litaba za kwaikale wa kwa naha ya Denmark yabizwa Peter Munch naañozi kuli: “Ndwa yene ezahalile mwa silimo sa 1914 ki yeñwi ya lika zeñwi zetuna zetahisize kuli bupilo bwa batu bucince hahulu. Pili silimo seo sisikafita kale batu nebanahana kuli miinelo mwa lifasi neikaba hande luli, . . . kono cwale kwataha miinelo yetaata luli ni kufita, bumaswe, sitoyo ni kutokwa buiketo.”

Kono taba yende ki ya kuli, lika zeo kaufela likafela mi kukaba ni kozo. Lika zeo kaufela libonisa kuli Mubuso wa Mulimu ufakaufi mi ukabusa lifasi kaufela. Mane Jesu naabulezi lika zeñwi zende hanaabulela za sisupo sene sikabonisa kuli mafelelezo sali fakaufi, hanaabulezi kuli: “Mi taba yende ye ya Mubuso ikakutazwa mwa lifasi kaufela kuli ibe bupaki kwa macaba kaufela, kihona kukataha mafelelezo.”—Mateu 24:14.

Taba yende yeo ki yona yebakutaza hahulu Lipaki za Jehova. Mane hatiso yebaitusisa hahulu ibizwa kuli Tawala ya Mulibeleli Yezibahaza Mubuso wa Jehova. Hatiso ye seifumaneha cwale mwa lipuo zefitelela 338, mi kamita ibulela za lika zende zeukaeza Mubuso wa Mulimu kwa batu ni lifasi.

Kalabo ya puzo yeo ikopanyeleza lisupo za butokwa zelatelela:

1. Mubuso wa Mulimu hauna kuitusisa kamba kuyemelwa ki babusi ba lipolitiki ba lifasi.

2. Babusi ba lipolitiki ba lifasi habana kutabela kutuhela kubusa mi bakalika kulwanisa Mubuso wa Mulimu.—Samu 2:2-9.

3. Mubuso wa Mulimu ukafelisa mibuso ya lipolitiki yona yesweli kubusa batu ka kubahatelela. (Daniele 2:44; Sinulo 19:17-21) Ndwa ya mafelelezo yeo ibizwa Armagedoni.—Sinulo 16:14, 16.

4.   Batu kaufela bababata kubusiwa ki Mubuso wa Mulimu bakapunyuha ndwa ya Armagedoni ni kutopila mwa lifasi lelinca. Bao kaufela bakopanyeleza batu babaka punyuha ili bababulezwi mwa Bibele kuli ki “buñata bobutuna,” mi kubonahala kuli bakaba babañata hahulu.—Sinulo 7:9, 10, 13, 14.

Nto yapili yemuswanela kueza kuli mubusiwe ki Mubuso wa Mulimu ki kuituta. Mane, Jesu naalapezi ku Mulimu kuli: “Kuli bafumane bupilo bobusa feli, batokwa kuzwelapili kukuziba, wena Mulimu anosi wa niti, ni yene ulumile, yena Jesu Kreste.”—Joani 17:3.

Batu habaituta ni kufita fa kuziba Jehova Mulimu, batusiwa mwa linzila zeñata. Halunyakisiseñi feela linzila zepeli: Sapili, bakalisa kuba ni tumelo yetiile ku Mulimu. Tumelo yeo yetomile fa litaba za niti, ibatusa kukolwa kuli Mubuso wa Mulimu uteñi luli ni kuli utuha ubusa. (Maheberu 11:1) Sabubeli, lilato labona la kulata Mulimu ni batu babañwi lahula. Lilato labona la kulata Mulimu libasusueza kuli bamuutwe ka pilu yabona kaufela. Mi lilato labona la kulata batu babañwi lona libasusueza kuitusisa manzwi anaabulezi Jesu akuli: “Momubatela kuli batu bamiezeze, mubaeze cwalo ni mina.”—Luka 6:31.

Sina ndate ya lilato, Mubupi waluna ubata kuli lube ni bupilo bobunde. Mubupi waluna ubata kuli lupile bupilo bobulezwi mwa Bibele kuli ki “bupilo sakata.” (1 Timotea 6:19) Bupilo bobasweli kupila batu kacenu haki “bupilo sakata.” Batu babañata bapila bupilo bobutaata mi basweli baikataza kuli bazwelepili kupila. Kuli mukone kuziba ka za mobukabela “bupilo sakata”, munyakisise lika zeñwi zende zeuka eza Mubuso wa Mulimu kwa batu babaka busiwa ki ona.