“Wena ya utwa milapelo, batu kaufela ba ka ta ku Wena.”—Samu 65:2.

ZE BA BULELA BATU

Se ku bulezwi kuli litapelo “ha ku na ko liyanga.” Batu ba ba mwa manyando sihulu ba kana ba kakanya kuli litapelo za bona za utwiwanga.

ZE I BULELA BIBELE

Bibele i bulela kuli: “Meeto a Jehova [Mulimu] a talimezi ba ba lukile, mi mazebe a hae a teeleza kwa likupo za bona; kono pata ya Jehova i sosobanela ba ba eza lika ze maswe.” (1 Pitrosi 3:12) Kwa iponahalela hande, kuli Mulimu wa utwanga litapelo. Kono sihulu u teelezanga kwa litapelo za batu ba ba latelela likuka za hae. Ka ku ama kwa takazo ya Mulimu ya ku teeleza kwa litapelo za luna, liñolo le liñwi li bulela kuli: “Bo ki bona buikolwiso bo lu na ni ku yena, kuli ha lu kupa nto ifi kamba ifi ka ku ya ka tato ya hae, wa lu utwa.” (1 Joani 5:14) Hakulicwalo, batu ba ba lapelanga ku Mulimu ku zwelela kwatasaa lipilu za bona ba swanela ku utwisisa kuli ki litapelo ze cwañi ze kona ku lumelelana ni tato ya Mulimu.

“Ha u lapela, u si ke wa kuta-kutela ku bulela manzwi a swana.”—Mateu 6:7.

ZE BA BULELA BATU

Batu ba bulapeli bo bu shutana-shutana—bo bu cwale ka bulapeli bwa Sibuddha, Katolika, Sihindu, ni Simozilemu—ba talusezwanga kuli ba kona ku itusisa lifaha kwa ku bulela manzwi a litapelo za bona ni ku bala litapelo ze ba fitisa.

ZE I BULELA BIBELE

Litapelo li swanela ku zwelela kwa pilu ni ku taluswa ka maikuto a buniti; ha li swaneli ku petiwa ni ku kuta-kutelwanga. Mañolo a lu susueza kuli: “Ha u lapela, u si ke wa kuta-kutela ku bulela manzwi a swana, sina mo ba ezeza bamacaba, kakuli ba nahana kuli ba ka utwiwa ka ku itusisa manzwi a mañata. Hakulicwalo mu si ke mwa ikeza sina bona, kakuli Mulimu, Ndataa mina, u ziba ze mu tokwa mane mina mu si ka li kupa kale.”—Mateu 6:7, 8.

KI KABAKALAÑI TABA YE HA I LI YA BUTOKWA?

Haiba litapelo li fitiswa ka nzila ye sa lumelelwi ki Mulimu, mutu ya lapela u kona ku sinya feela nako ya hae kamba mane ku foseza Mulimu. Bibele i lemusa kuli litapelo ze fiwa ki batu ba ba hana ku eza tato ya Mulimu ki ze “masila” ku yena.—Liproverbia 28:9.

“A mu bate Muñaa Bupilo ha sa fumanwa, mu mu lapele ha sa li fakaufi.”—Isaya 55:6.

ZE BA BULELA BATU

Balumeli ba bañwi ba lapelanga ku Maria kamba kwa lika ze ñwi ze cwale ka mangeloi ni batu ba bañwi ba ba ngiwa kuli ki bahalalehi. Ku bona bao, ku na ni Muhalalehi ya bizwa Anthony wa kwa Padua, ya ngiwa kuli ki yena ya “babalelanga batu kwa moya ni ha ba tokwa lituso ze ñwi za swalelele,” ni Muhalalehi ya bizwa Jude, ili ya ngiwa ku ba yena muhalalehi ya kona ku tusa batu ba ba “ziyelehile hahulu.” Balapeli ba bañata ba lapelanga kwa batu bao ba ba twi ki bahalalehi ni kwa mangeloi, ka ku sepa kuli ba ka ba yemela ku Mulimu.

ZE I BULELA BIBELE

Balapeli ba niti ba swanela ku lapela ku “Ndataa luna ya kwa lihalimu.” (Mateu 6:9) Bibele i lu bulelela kuli: “Mu si ke mwa bilaela ka se siñwi, kono mwa lika kaufela mu zibise Mulimu ze mu kupa ka tapelo ni ka kupo hamoho ni buitumelo.”—Mafilipi 4:6.