Ka Ku Ya Ka Bibele

Kana ku na ni Mabaka A Kona ku Tahisa Kuli Kalombe ka Amuhelwe?

BATU ba kalombe ba zwelapili ku lumelelwa mwa linaha ze ñata. Bakeñisa “kutwisiso ya mwa miteñi ya cwale,” sikwata se siñwi sa mwa keleke ye ñwi ya kwa America si akaleza kuli ku be ni mutalusezo o munca wa se i bulela Bibele ka za kalombe. Mueteleli yo muñwi wa keleke mwa Brazil ya sa zo nyalana ni muuna ka yena, ni yena naa susueza kuli ‘batu ba swanela ku nyakisisa sinca se i bulela Bibele ka za kalombe,’ ilikuli Bibele i lumelelane ni se i lumela keleke ya hae ka nako ya cwale.

Kwa neku le liñwi, batu ba ba sa lumeleli kalombe hañata ba ngiwa kuli ba toile batu ba kalombe kamba kuli ba na ni ketululo. Ki sika mañi luli se i bulela Bibele ka za kalombe?

Bibele I Bulelañi?

Bibele ha i susuezi batu ku ketulula ba bañwi. Niteñi, se i bulela ka za kalombe sa ikutwahalela hande.

“U si ke wa lobala ni muuna sina ha ku lobalwa ni musali; ki kalombe . . . Ki bumaswe bo bu sabisa.”—Livitike 18:22, 23.

Ka ku ba o muñwi wa milao ye nee filwe ku Mushe, mulao o ne u hanisa kalombe nee li o muñwi wa milao ye miñata ya muzamao ye ne i filwe kwa sicaba sa Isilaele. Nihakulicwalo, ibe kuli mutu ya naa eza kalombe nee li Mujuda kamba ne si Mujuda, mulao wo u bonisa mubonelo wa Mulimu ka za kalombe, ha u li: “Ki bumaswe bo bu sabisa.” Batu ba macaba a naa potolohile Isilaele ne ba eza kalombe, sindoye, bubuki, ni likezo ze ñwi ze ne hanisizwe mwa Mulao wa Mushe. Kabakaleo, Mulimu naa nga macaba ao ku ba a silafezi. (Livitike 18:24, 25) Kana mubonelo wa Bibele ne u cincize mwa miteñi ya Bakreste ba kwa makalelo? Ha mu nyakisise liñolo le li latelela:

Mulimu “naa ba siile ni ku ba tuhelela ku ya ka litakazo za buozwa ze swabisa, kakuli basali mwahalaa bona ba siile mukwa wa sipepo wa ku lobala ni baana ni ku kala ku lobalana ka sa bona; mi kamukwaoswana nihaiba bona baana ba siile mukwa wa bona wa sipepo wa ku lobala ni basali mi ne ba kalile ku lakazana maswe mwahalaa bona, baana ka baana, ne ba eza ze swabisa.”—Maroma 1:26, 27.

Ki kabakalañi Bibele ha i bulela kuli kalombe ki ku siya mukwa wa ka sipepo ni kuli ki kezo ye swabisa? Libaka ki la kuli Mubupi wa luna naa si ka lukisa kuli batu ba ezange kalombe. Batu ha ba koni ku ba ni bana ka ku eza kalombe. Bibele i bapanya kalombe kwa buozwa bo ne bu bile teñi mwahalaa basali ni mangeloi a naa kwenuhezi Mulimu pili Muunda wa Nuwe u si ka ezahala kale. Mangeloi ao se a bizwa madimona. (Genese 6:4; 19:4, 5; Juda 6, 7) Mulimu u nga kalombe ni buozwa bo ne bu bile teñi mwahalaa basali ni mangeloi a naa mu kwenuhezi sina likezo ze si za ka taho.

Kana ku na ni Mabaka A Kona ku Tahisa Kuli Kalombe ka Amuhelwe?

Batu ba bañwi ba kana ba ipuza kuli: ‘Kana ku lukile ku mutu ku eza kalombe kabakala kuli u hozize mukwa wo, kamba kabakala sibaka sa pila ku sona, kamba kabakala kuli a kile a ezwa maswe mwa bupilo, inge cwalo ku swalwa likalala?’ Kutokwa, lika zeo ha li tahisi kuli kalombe ibe mukwa o lukile. Ha mu nyakisise mutala wo: Mutu u kona ku hoza mikwa ye kona ku tahisa kuli a nwange hahulu bucwala ka ku ya ka licaziba ze ñwi za sayansi, kamba u kona ku ba ya naa huliselizwe mwa lubasi mo batu ne ba nwa hahulu bucwala. Ki niti kuli batu ba bañata ba kona ku shwela makeke mutu ya mwa miinelo ye cwalo. Nihakulicwalo, ha ba na ku mu susueza ku zwelapili ku nwa hahulu bucwala kamba ku mu taluseza kuli wa ipulaisa feela ku lika ku tuhela ku nwa hahulu bucwala ka libaka feela la kuli u hozize mukwa wo kamba kabakala kuli naa huliselizwe  mwa sibaka mo batu ne ba nwa hahulu bucwala.

Kamukwaoswana, nihaike kuli Bibele ha i nyazi batu ba ba katazwa ki litakazo za kalombe, ha i lumeleli batu ku komiwa ki litakazo ze cwalo, ibe kuli litakazo zeo ki za ku hoza kamba li tahiswa ki lika ze ñwi li sili. (Maroma 7:21-25; 1 Makorinte 9:27) Niteñi, Bibele i na ni litaba ze kona ku tusa hahulu batu ba kalombe ni ku ba susueza ku tula mukwa wo.

Ki Ifi Tato ya Mulimu Kwa Batu ba Kalombe?

Bibele i lu taluseza kuli tato ya Mulimu ki ya kuli “batu ba mufuta kaufela ba piliswe mi ba fite fa zibo ye nepahezi ya ku ziba niti.” (1 Timotea 2:4) Nihaike kuli Bibele ha i lumeleli kalombe, ha i susuezi batu ku toya batu ba kalombe.

Mubonelo wa Mulimu ka za kalombe ha u lukelwi ku nyinyafazwa. Kwa liñolo la 1 Makorinte 6:9, 10, Bibele i bulela hande fo ku sweu kuli, “baana ba ba lobala ni baana ka bona” ni bona “ha ba na ku yola saanda sa Mubuso wa Mulimu.” Kono timana 11 i ekeza ku bulela manzwi a omba-omba, a li: “Mi niteñi ki mo ne ba inezi ba bañwi ku mina cwalo. Kono mu tapisizwe twaa, kono mu kenisizwe, kono mu beilwe ba ba lukile ka libizo la Mulenaa luna Jesu Kreste ni ka moya wa Mulimu wa luna.”

Kwa iponahalela hande fo ku sweu kuli batu ba ne ba tabela luli ku lapela Mulimu ka ku ya ka mwa tokwela ne ba amuhezwi hande mwa puteho ya Sikreste ya kwa makalelo. Ku cwalo ni kacenu, batu ba ba sepahala ba ba bata ku tabisa Mulimu ka ku cinca bupilo bwa bona kuli bu lumelelane ni se i bulela Bibele, isiñi ka ku lika ku kopamisa se i bulela Bibele, ba amuhelwa hande mwa puteho ya Sikreste.

KANA MU KILE MWA IPUZA KULI:

● Mubonelo wa Bibele ka za kalombe ki ufi?—Maroma 1:26, 27.

● Kana Bibele ya ketulula batu ba kalombe?—1 Timotea 2:4.

● Kana kwa konahala ku ambuka kalombe?—1 Makorinte 6:9-11.

[Siswaniso se si fa likepe 29]

Kana batu ba swanela ku cinca ze i bulela Bibele ka za mubonelo wa Mulimu ka za kalombe?