“Ha ni si ka Shwa”

“Mu si ke mwa yema kwa Libita la ka inze mu lila,

Ha ni yo Mwateñi.

Ha ni si ka shwa.”

● Kana mwa ziba toko yeo? Kana se mu kile mwa i utwa ha i opelwa? Mwa lilimo ze ñatanyana ze felile, toko yeo se i omba-ombile batu ku potoloha lifasi kaufela. Halaa lilimo ze fitile, se ku akalelizwe baloki ba ba shutana-shutana kuli ki bona ba ba ñozi toko yeo. Mane batu ba bañwi se ba bulezi kuli toko yeo ki tapelo ye itusiswanga fa kepelo ki batu ba ba bizwa Manavajo. Mwa Sikuwa, toko yeo ha i zibahali ka manzwi a yona a mafelelezo a bulezwi fahalimu, kono i zibahala ka manzwi a yona a pili, a li: “Mu si ke mwa yema kwa libita la ka inze mu lila.”

Toko yeo ne i fitile fa ku ba pina ye ne i tumile hahulu mwa Japan mwa lilimo li sikai ze felile, kono hape ne i lyanganisize hahulu batu. Hañata Majapanizi ba potelanga mabita a mabasi a bona ilikuli ba bonise likute kwa banabahabo bona ba ba shwile ka ku nahana kuli ba sa pila mwa mabita. Bakeñisa kuli pina yeo yona i luta kuli ba ba shwile ha ba yo mwa mabita, ba bañata se ba buzize kuli, “Kanti ba ba shwile ba kai?”

Ka nako ye telele, Majapanizi ba bulapeli bwa Sibuddha se ba bile ni mukwa wa ku banga ni likepelo, mitande, ni lisebelezo za ku hupula bafu. Kono buñata bwa batu ba bulapeli bwa Sibuddha ba palelwa ku alaba puzo ya kuli, Ba ba shwile ba kai? Kamba lipuzo ze cwale ka ze li: Kana bafu ba bulapeli bu sili ni ba mwa linaha li sili ba yanga kwa sibaka se si swana? Ki kabakalañi ba ba shwile ha ba sa koni ku alaba ba ba pila?

Batu ba bañata ba ikutwa kuli lipuzo ze cwalo ha li na likalabo ni kuli ku bata likalabo za lipuzo zeo ki ku sinya feela nako. Niteñi, mu kana mwa ipuza kuli, ‘Kiñi ze ezahalanga ku mutu ha shwa?’ Mu kona ku fumana kai likalabo? Bibele i bulela kuli Mulimu naa bupile muuna ni musali ba pili inze ba petehile, mi naa ba file simu ye nde hahulu ku ba lihae la bona. Ha ne ba ka utwa Mulimu, ne ba ka pila ku ya ku ile mwa Paradaisi fa lifasi. Kono ne ba si ka utwa Mulimu.

Kamukwaocwalo, Mulimu naa ngile muhato. Naa lunduzi muuna ni musali bao mwa lihae la bona le ne li li Paradaisi mi a ba amuha tohonolo ya ku pila ku ya ku ile. Naa talusize koto ye ne ba ka fiwa kabakala ku sa utwa kwa bona. Naa ize: “Kakuli u liluli, mi u ka kutela mwa liluli.” Mutu naa bupilwe ku zwa kwa liluli, mi ha shwa, u kutelanga kwa liluli.—Genese 2:7; 3:19.

Muuna yo muñwi ya pila mwa tolopo ye bizwa Kofu kwa Japan, ili ya babalelanga libita le liñwi le lituna, naa bulezi kuli: “Ha ni beyanga mambokisi mwa libita, a banga a tezi mufuse ni masapo za batu ba ba shwile. Hasamulaho wa lilimo ze bato ba ze ketalizoho, mufuse ni masapo ze mwa mambokisi ao li fukuzehanga ku ba licika. Hamulaho wa lilimo ze lishumi, buñata bwa mambokisi ao a banga mukungulu.” Mibili ya luna i bupilwe ka lika ze zwelela mwa mubu, mi nako ha inze i ya, ya bolanga ni ku kutela kwa liluli. Kacwalo, ki ifi sepo ye li teñi ka za mutu ya shwile?

Nihaike kuli mutu ha shwa u tuhelanga ku ba ni maikuto afi kamba afi, Mubupi wa luna, yena ya ziba nihaiba taha ni taha ye shwa, wa lu hupulanga kabakala kuli wa lu lata. (Mateu 10:29-31) Ku likana ni mwa sepiselize, u ka lu zusa kwa bafu, ili ku lu kutisa kwa bupilo. U ka lu biza, ili ku lu zusa ku ba ba shwile.—Jobo 14:13-15; Joani 11:21-23, 38-44.

Haiba mwa tabela ku ziba ze ñata ka za taba ye, mu ñolele kwa bahatisi ba magazini ye, mi ba ka tabela ku mi fa litaba ze ñata ka za teñi, kamba mu itute ka za teñi ka ku bala litaba ze fa Web site ya luna ya www.watchtower.org.