“Mu Kona ku Punyuha Cwañi Lifasi le ha li ka Fela?”

▪ Bibele i talusañi ha i bulela za mafelelezo a lifasi la cwale? Kana ki ndwa ya nyukilia ye ka tanyela batu kaufela fa lifasi? Kamba kana i talusa sinyeho ye ka tiswa ki lika za ka taho, ze cwale ka lika ze wa kwa halimu? Taba ye tabisa ki ya kuli Bibele i bulela kuli “buñata bo butuna bwa batu” ba ka punyuha mafelelezo a lifasi. (Sinulo 7:9, 10, 14) Ikaba bo mañi? Kana mwa kona ku ba yo muñwi wa bona?

Lipuzo za butokwa zeo li ka alabiwa mwa ngambolo ya nyangela ye li: “Mu Kona ku Punyuha Cwañi Lifasi le ha li ka Fela?” I ka fiwa fa mikopano ya sikiliti ya Lipaki za Jehova ye na ni toho ya taba ye li: ‘MU ZWELEPILI KU TONA!’ ye ka kala mwa May kwa United States ni ku zwelapili mwa lifasi kaufela. Lwa mi mema ku yo fumaneha kwa mukopano wo ka bela bukaufi ni ko mu pila. Mu ambole ni Lipaki za Jehova mwa silalanda sa mina, kamba mu ñolele bañoli ba magazini ye.