Bashemi ba Kona ku Tusa Cwañi?

KOPANO ye ñwi ya tuto ya kwa United States ne i susuelize hahulu baituti ba kwa sikolo sa sekondari ka manzwi a, a li: “Mu itatele ku sebeza hahulu ka maata a mina kaufela.” Bakeñisa ku sulaetwa hahulu kuli ba pete likonkwani za bona, ba banca ba bañwi ba sebezanga hahulu ka ku tula tikanyo. Bo Madeline Levine ba ba bulezwi mwa taba ye felile ne ba ñozi kuli: “Bakeñisa lituto ze na ni litaba ze ñata hahulu ze tokwa ku fezwa mwa nako ye kuswani, misebezi ye ezwa hamulaho wa sikolo, baluti ba ba kupilwe ku tusa baituti ku eza hande hahulu mwa lituto, banana ba bañata ba ipumanga inze ba na ni lika ze ñata hahulu za ku eza kuli mane buikangulo bwa bona bu banga mwa lubeta. Baituti ba ba mwa muinelo wo cwalo ba kona ku ba ni matuku a mwa mubili kamba a mwa munahano.

Haiba mu bilaezwa ki taba ya kuli mwanaa mina u kuliswa ki ku eza lituto ze ñata hahulu kwa sikolo, mu ye kwateñi. Mu yo ambola ni baluti, baelezi, ni bazamaisi ba sikolo. Mu ba taluseze ze mu bonanga ku mwanaa mina. Mu na ni tukelo ya ku eza cwalo.

Bibele i susueza bashemi ku iseza mamelelo kwa zwelopili ye ba eza bana ba bona ha ba nze ba hula. Mushe naa bulelezi bashemi mwa Isilaele kuli: “U na ni ku a luta [milao ya Mulimu] bana ba hao ka tokomelo, u be ni ngambolo ka ona, niha u inzi mwa ndu ya hao, niha u zamaya mwa nzila, niha u yoo lobala, niha u zuha.”—Deuteronoma 6:7.

Ku isa hahulu pilu kwa tuto ya mwanaa mina haki ku ikenya mwa litaba za hae. Ku bonisa kuli mu na ni lilato la ku bata ku tusa mwanaa mina. Mi ku eza cwalo ku ka tusa hahulu mwanaa mina ka ku kusufaza kwa matuku aa kona ku mu kenela bakeñisa ku eza lituto ze ñata za kwa sikolo.

 [Siswaniso se si fa likepe 16, 17]

Mu ikambote ni baluti ni baelezi ba mwanaa mina ka za matuku a hae a tiswa ki ku eza misebezi ye miñata ya kwa sikolo