Mwakona Kufelisa Maikuto A Kuikalelwa za Kwapili

MUIKUTWANGA cwañi hamukopana ni miinelo yetaata? Licaziba babañata cwale sebalumela kuli kalabo yemukona kufa kwa puzo yeo ikabonisa haiba munani sepo kamba muikalelwa za kwapili. Kaufelaa luna lwakopananga ni miinelo yetaata mwa bupilo, mi babañwi bakopananga ni miinelo yetaata yemiñata kufita babañwi. Kono ki kabakalañi batu babañwi habakonanga kutiyela miinelo yetaata hahulu yebakopana ni yona hailifo babañwi bona habakopana ni miinelo yeminyinyani bapalelwanga kuitiyela?

Ka mutala, luungeñi kuli musweli kubata musebezi. Hamulaho wa kubuisana ni babakenya batu musebezi, hamufiwi musebezi wo. Mukaikutwa cwañi ka za taba yeo hasamulaho? Mukona kuikutwa kuli batu bao haba milati feela mi hakuna feela mutu yakona kumikenya musebezi, ni kuli hamuna kufumana musebezi. Mi mane ona taba yeo ya kusakenywa musebezi ikona kutahisa kuli muikutwe kuli hamuna kukona feela kukondisa mwa bupilo. Mukona kuikutwa kuli hamu ba butokwa. Mubonelo ocwalo utahiswa ki maikuto a kuikalelwa za kwapili.

Zekona Kumitusa Kufelisa Maikuto A Kuikalelwa za Kwapili

Ki lika mañi zekona kumitusa kufelisa maikuto a kuikalelwa za kwapili? Pili, mutokwa kulemuha haiba kikale mukalisa kuba ni mubonelo ofosahezi. Kihona mukabata nzila ya kufelisa ka yona maikuto ao. Ka mutala, mulike kuutwisisa libaka hane musika kenywa musebezi. Muipuze kuli: ‘Kana ki niti luli kuli libaka hanisika kenywa musebezi kikuli hakuna mutu yabata kunikenya musebezi? Kamba esi mwendi mutu yakenya batu musebezi naabata feela batu babanani buikoneli bobuñwi?’

Kuli muzibe haiba munani mubonelo oswanela, munyakisise litaba zemuziba kuli ki za niti. Muipuze kuli: ‘Kana ki niti luli kuli hanikoni kueza hande mwa lika zeñwi bakeñisa kuli nto yeñwi neipalile? Kamba kana kunani lika zeñwi zenieza hande inge cwalo lika zeama silikani saka ni Mulimu, silikani saka ni lubasi lwaka kamba balikani?’ Musike mwaikutwa kuli hamukoni feela kukondisa mwa bupilo. Hamukoni feela kuziba haiba mukafumana musebezi kamba kutokwa. Kunani lika zeñwi zemuswanela kueza kuli mufelise maikuto a kuikalelwa za kwapili.

Mukolwe Kuli Mwakona Kupeta Likonkwani Zamina

Cwanoñu fa, licaziba bafile taluso yesika kwana ya sekutalusa kuba ni sepo. Batalusa kuli kuba ni sepo kutalusa kuikolwisa kuli lukakona kupeta likonkwani zeluitomezi. Sina moluka itutela mwa taba yetatama, kuba ni sepo kuama lika zeñata kwandaa kukwanisa feela likonkwani zeluitomezi. Kono taluso yeo yakona kulutusa kuba ni mubonelo omunde kakuli ilutusa kulemuha kuli lwakona kupeta likonkwani zeluitomezi.

Kuli lukolwe kuli lwakona kupeta likonkwani zeluitomezi, luswanela kukala ka kuitomela likonkwani zenyinyani. Haiba lukona kupeta likonkwani zeo, lukaba ni buikolwiso bwa kuli lukakona kupeta likonkwani zeñwi zetuna zeluitomezi. Haiba muikutwa kuli hamusika kona kupeta likonkwani zamina, mulike kunyakisisa likonkwani zemuitomezi. Muipuze kuli: ‘Ki lika mañi zenibata kueza kwapili?’ Lukona kupateha hahulu mwa bupilo kuli mane lupalelwa kuba ni nako ya kunyakisisa lika zeswanela kuba za butokwa hahulu ku luna. Lilimo-limo kwamulaho, Bibele neibonisize butokwa bwa kueza cwalo ka kubulela kuli: ‘Mulemuhe lika za butokwa hahulu nikufita.’—Mafilipi 1:10.

Haiba lulemuha lika zeluswanela kuunga kuba za butokwa hahulu, kuka lubela bunolo kuitomela likonkwani zeama silikani saluna ni Mulimu, lubasi lwaluna, mubeleko ni sikolo. Kono kwa makalelo, ki kwa butokwa kusaitomela likonkwani zeñata hahulu, mi luswanela kuitomela likonkwani zeluziba kuli lwakona kulikwanisa ka bunolo. Haiba sikonkwani selu itomezi sitaata, lukona kupalelwa kusipeta mi lwakona kuzwafa. Kacwalo, hañata ki kwa butokwa hahulu kuitomela likonkwani zenyinyani, ili zeka lutusa kupeta likonkwani zetuna.

Ibile feela kuli lunani takazo yetuna ya kueza nto yeñwi, lukaeza molukonela kaufela kubata nzila yeka lutusa kueza nto yeo. Hase luitomezi likonkwani zende zelubata kupeta, luswanela kueza molukonela kaufela kupeta likonkwani zeo. Haiba lunyakisisa moluka tusezwa haluka peta likonkwani zaluna, lukabata kueza ka taata kuli lukwanise likonkwani zeo. Ki niti kuli lukana lwakopana ni miinelo yetaata halunze lulika kupeta likonkwani zaluna, kono haluswaneli kuzwafa.

Nihakulicwalo, luswanela hape kubata linzila zeka lutusa kupeta likonkwani zaluna. Muñoli yomuñwi yabizwa C. R. Snyder yaezize patisiso yetuna yebonisa butokwa bwa kuba ni sepo, utalusa kuli ki kwa butokwa hahulu kuba ni linzila zeshutana-shutana zeka lutusa kupeta likonkwani zaluna. Kacwalo, haiba nzila yeñwi yene lunahana kuli ika lutusa kupeta sikonkwani saluna ipala, lwakona kulika nzila yeñwi hape.

Muñoli yo hape utalusa kuli fokuñwi ki kwa butokwa kucinca likonkwani zaluna. Haiba lupalelwa kukwanisa sikonkwani sesiñwi mi luzwelapili kubilaezwa ki taba yeo, lukazwafa. Kono haiba luitomela sikonkwani sisili selukona kukwanisa, fo luba ni nto yeñwi yeluka bata kupeta kwapili.

Mwa Bibele kunani mutala omunde ka za taba yeo. Mulena Davida naatabela hahulu kuyahela Jehova Mulimu wahae tempele. Kono Mulimu naataluselize Davida kuli mwanaa hae Salumoni ki yena yanaaka fiwa tohonolo yeo. Davida mwendi naaikutwile bumaswe kuli naasike alumelezwa kueza cwalo, kono naasika nyema kamba kuñañelela kuli alumelezwe kueza musebezi wo. Naaitusisize maata ahae kaufela kukubukanya masheleñi ni lika zanaaka tokwa mwanaa hae kuli afeze musebezi wo.—1 Malena 8:17-19; 1 Makolonika 29:3-7.

Niha lukona kuba ni mubonelo omunde ni kuitomela likonkwani zelubata kupeta mwa bupilo, kukona kulubela taata kuba ni sepo. Kabakalañi? Bakeñisa kuli halukoni kufelisa miinelo yetaata yemiñata yetahisa kuli batu basike baba ni sepo. Kacwalo, ki lika mañi zekona kulutusa kuzwelapili kuba ni sepo kusina taba ni miinelo yetaata yelukopana ni yona yecwale ka bubotana, lindwa, ketululo, makulanu ni lifu?

[Siswaniso]

Haiba musafiwi musebezi one mubata, kana muikutwanga kuli hamuna kufumana musebezi nikamuta?

 [Siswaniso]

Mulena Davida hanaalemuhile kuli nekusike kwakonahala kupeta likonkwani zahae zeñwi, naaitomezi likonkwani lisili