Batu baketululanga babañwi bakeñisa litaba za buhata zebautwanga ka za bona. Halunyakisiseñi mitala yelatelela:

• Babelekisi babañwi ka mafosisa balumela kuli basali habakoni kueza misebezi yetokwa mutu yanani buikoneli bobutuna, maata, kamba zibo yetuna.

• Mwa lilimo za kwamulaho mwa Europe, batu nebatamelelize Majuda kuli nebasilafalize masima a mezi ni kuyambukiseza batu matuku. Ka nako ya puso ya ba Nazi, Majuda hape nebatamelelizwe litaba za buhata. Mi ka nako yeo, nebatamelelizwe kuli nebapalelwisa zwelopili mwa litaba za sifumu sa naha ya Germany. Litaba zeo kaufela nelitahisize kuli Majuda batoiwe hahulu, mi babañwi basa batoile ni ka nako ye.

• Batu babañata banahananga ka mafosisa kuli mañi ni mañi kaufela yali sihole haana tabo mi ufilikani nako kaufela.

Batu babalumela litaba za buhata zecwalo fokuñwi bafanga mitala yebonisa bupaki bwa zebalumela, litaba zeo niha lisi za niti. Mi banahana kuli mutu yasalumelelani ni mubonelo wabona, hakuna zaziba.

“Mutu yasina zibo haki yomunde.”—LIPROVERBIA 19:2.

Timana ye ilulutañi? Haiba haluzibi buniti bwa taba, lukaeza likatulo zemaswe. Haiba lulumela litaba za buhata kufita kulumela litaba za niti, lukaba ni moya wa kuatulanga babañwi.

Haiba lwaziba litaba za niti ka za batu, haluna kulumela litaba za buhata zebaka lubulelela babañwi ka za bona. Mi haluka lemuha kuli lubulelezwi litaba za buhata ka za sikwata sa batu babañwi, lukakala kunyakisisa ka tokomelo litaba zeluziba ka za batu babañwi hape ilikuli lubone haiba ki za niti kamba kutokwa.

• Muhupulange kuli haiba mutu yasimuluha mwa sikwata sesiñwi sa batu ki mutu yamaswe, taba yeo haitalusi kuli batu kaufela baba mwa sikwata seo ki batu babamaswe.

• Muhupulange kuli kunani litaba zeñwi zemusa zibi ka za batu babañwi.

• Mubatange bupaki kwa batu babasepeha.