TUTO 44
Kana ki Mikiti Kaufela Yetabisa Mulimu?
Jehova ubata kuli luikole bupilo mane ni kuezanga mikiti ka linako zeñwi. Kono kana ki mikiti kaufela ni mazazi a lipumulo atabisa Mulimu? Lukona kubonisa cwañi kuli lwalata Jehova mwa taba ye?
1. Ki kabakalañi mikiti yemiñata haisa tabisi Jehova?
Mwendi mwakona kukomoka kuziba kuli buñata bwa mikiti yeatile kacenu izwa fa lituto zesiyo mwa Bibele kamba mane neikalile kueziwa ki batu bane basalapeli Mulimu wa niti. Mwendi mikiti yeo mane neieziwanga ki bulapeli bwa buhata. Mikiti yeo mwendi iswalisana ni tumelo ya mioya kamba mane tuto ya kuli mutu unani moyo osashwi. Yemiñwi kwa mikiti yeo iswalisana ni litaba zeama buloi kamba mulimu wa matohonolo. (Isaya 65:11) Jehova ulemusa balapeli bahae kuli: “Muikauhanye ku bona . . . mi mutuhele kuswala nto yesilafezi.”—2 Makorinte 6:17. a
2. Jehova uikutwa cwañi ka za mikiti yebubanisa batu?
Jehova ululemusa kuli lusike ‘lwasepa batu.’ (Mubale Jeremia 17:5.) Mikiti yemiñwi ya lipumulo ki ya kukuteka babusi kamba masole. Babañwi baezanga mikiti ya kukuteka naha yabona kamba mikiti ya tukukuluho. (1 Joani 5:21) Mi babañwi bona bayemelanga litaba za naha. Jehova naakaikutwa cwañi haiba lukuteka mutu kamba kopano sihulu yelwanisana ni mulelo wahae?
3. Ki mikwa mañi yekona kutahisa kuli Mulimu asike atabela mikiti yemiñwi?
Bibele yahanisa ‘kunwa maswe, mikiti yelilata, ni likangisano za macwala.’ (1 Pitrosi 4:3) Kwa mikiti yemiñwi, batu hababangi ni buiswalo mi baezanga buhule. Kuli luzwelepili kuba balikani ba Jehova, luswanela kuambuka mikiti yemasila yeo.
MUBATISISE
Mubone lika zekona kumitusa kutabisa Jehova ka kueza likatulo zende ka za mazazi a lipumulo ni mikiti yemiñwi.
4. Muhane mikiti yesatabisi Jehova
Mubale Maefese 5:10, mi kihona mukanyakisisa lipuzo zelatelela:
-
Ki lika mañi zeluswanela kunyakisisa halunahana za kuitabisa fa mazazi a lipumulo?
-
Ki ifi mikiti ya mazazi a lipumulo yeatile hahulu mwa sibaka semupila?
-
Mubona cwañi, kana mikiti yeo yatabisa Jehova?
Ka mutala, kana mwaziba mubonelo wa Mulimu ka za mikiti ya mazazi a kupepwa? Bibele haibonisi kuli kunani mulapeli wa Jehova yakile aeza mukiti wa kuhupula lizazi la kupepwa, kono ibulela ka za mikiti yemibeli ya kuhupula lizazi la kupepwa yeneezizwe ki batu bane basalapeli Jehova. Mubale Genese 40:20-22 ni Mateu 14:6-10. Mi kihona mukanyakisisa lipuzo zelatelela:
-
Ki lika mañi zeatile hahulu zeezahalanga kwa mikiti ya kuhupula lizazi la kupepwa?
-
Ka kuya ka Bibele, Jehova uikutwa cwañi ka za mazazi a kupepwa?
Kono mukana mwaipuza kuli, ‘Kana luli Jehova hatabeli haiba nieza mukiti wa kuhupula lizazi la kupepwa kamba mukiti feela omuñwi olwanisana ni milao yahae?’ Mubale Exoda 32:1-8. Mi mubuhe VIDIO kihona mukanyakisisa lipuzo zelatelela.
-
Ki kabakalañi haluswanela kuisa pilu kwa lika zatabela Jehova?
-
Ki lika mañi zeluswanela kueza?
Zekona kulutusa kuziba haiba mukiti olubata kueza hautabisi Mulimu
-
Kana utomile fa lituto zesazwi mwa Bibele? Kuli muzibe kalabo kwa puzo yeo, mubatisise kousimuluha.
-
Kana ufa batu, kopano, kamba lisupo za naha likute leliswanela kufiwa feela ku Mulimu? Lukuteka Jehova kufita nto ifi kamba ifi, mi lumusepile kuli ki yena feela yakafelisa matata a batu mwa lifasi.
-
Kana lizo ni likezo za fa mukiti wo zalwanisana ni likuka za mwa Bibele? Luswanela kuzwelapili kuba ni muzamao okenile.
5. Mutuse babañwi kuli bakuteke zemulumela
Kukona kumibela taata kuhana kueza mukiti omuñwi babañwi haba mihapeleza kueza mukiti osatabisi Jehova. Mubataluseze likatulo zamina ka maseme ni ka pilu-telele. Kuli muzibe momukona kuezeza cwalo, mubuhe VIDIO.
Mubale Mateu 7:12, mi kihona mukanyakisisa lipuzo zelatelela:
-
Ka kuya ka timana ye, kana mwaswanela kubulelela bahabo mina kuli basike baeza mukiti wa lizazi la pumulo?
-
Ki lika mañi zemuswanela kueza kuli mukolwise lubasi lwamina kuli niha musaezi ni bona mukiti omuñwi, mwabalata mi mubaanga kuba ba butokwa?
6. Jehova ubata kuli lube babatabile
Jehova ubata kuli lubange ni linako zende ni lubasi lwaluna ni balikani. Mubale Muekelesia 8:15, mi kihona mukanyakisisa puzo yelatelela:
-
Timana ye ibonisa cwañi kuli Jehova ubata kuli lube babatabile?
Jehova ubata kuli batu bahae babange ni nako ya kuitabisa ni kuikola linako zende hamomo. Mubuhe VIDIO kuli mubone buniti bwa taba yeo sihulu ka nako ya mikopano ya macaba.
Mubale Magalata 6:10, mi kihona mukanyakisisa lipuzo zelatelela:
-
Kana luswanela kuezanga mikiti yetumile hahulu kuli ‘luezeze babañwi lika zende’?
-
Kana nemukaba ni tabo kufa feela mutu mpo fa lizazi la pumulo kamba kumufa ka nako ifi kamba ifi?
-
Lipaki za Jehova babañata fokuñwi balukisanga kuezeza bana babona lika zende kamba mane kubafa limpo. Haiba munani bana, ki lika mañi zende zemukona kubaezeza?
BABAÑWI BABULELANGA KULI: “Hanina taba ni kousimuluha mukiti. Sa butokwa kikuli luba ni nako yende ni lubasi ni balikani.”
-
Nemuka alaba cwañi mutu yabulela cwalo?
LITABA KA BUKUSWANI
Jehova ubata kuli lubange ni nako yende ni lubasi lwaluna ni balikani. Kono hape ubata kuli luambuke kuezanga mikiti yesa mutabisi.
Mulundulule
-
Ki lipuzo mañi zeluswanela kuipuza kuli luzibe mikiti yasatabeli Jehova?
-
Lukona kutusa cwañi lubasi ni balikani baluna kuutwisisa libaka halusa ezi ni bona mikiti ya pumulo?
-
Muziba cwañi kuli Jehova ubata kuli lube babatabile ni kubanga ni nako ya kuitabisa?
MUBONE LITABA ZEÑWI
Munyakisise mikiti yemiñwi ya lipumulo yebasa ezangi Bakreste.
“Ki Kabakalañi Lipaki za Jehova Habasa Ezangi Mikiti Yemiñwi ya Pumulo?” (Taba ya fa webusaiti)
Munyakisise mabaka amane atahisa kuli lulumele kuli mikiti ya kuhupula lizazi la kupepwa haitabisi Mulimu.
Mubone mo banana babalata Jehova bakona kumutabiseza ka nako ya mikiti ya pumulo.
Bakreste babañata baiketezi kusaezanga mukiti wa Kirisimasi. Muikutwa cwañi ka za katulo yabona?
“Nebafumani Nto Yeñwi Yende Hahulu” (Tawala ya Mulibeleli, December 1, 2012)
a Kuli muzibe zekona kumitusa kuziba zemuswanela kueza mwa miinelo yemiñwi sihulu batu habaeza mukiti omuñwi wa pumulo, mubone Litaluso za Kwa Mafelelezo 5.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
