TUTO 01
Bibele Ikona Kumitusa Cwañi?
Buñata bwaluna lwabuzanga lipuzo ka za bupilo, ili zeama manyando ebakopana ni ona batu, lifu, ni kubata kuziba zekaezahala kwapili. Hape lubilaezwanga ki lika zelukopana ni zona zazi ni zazi, zecwale ka molukona kuipiliseza kamba molukona kubela ni tabo mwa bupilo. Batu babañata balemuhile kuli Bibele yaalaba lipuzo zabona zetuna mi hape litaba ze mwateñi zakona kubatusa kupila bupilo bobunde zazi ni zazi. Bibele yakona kutusa batu kaufela.
1. Ki lipuzo mañi zeñwi zeialaba Bibele?
Bibele ialaba lipuzo za butokwa zelatelela ze: Bupilo nebukalile cwañi? Mulelo wa bupilo ki ufi? Ki kabakalañi batu habanyanda? Ki lika mañi zeezahalanga ku mutu hashwa? Ki kabakalañi hakunani lindwa zeñata, haiba kaufelaa luna lubata kupila ka kozo? Ki lika mañi zekaezahala kwa lifasi kwapili? Bibele ilususueza kubata likalabo za lipuzo zeo, mi batu babañata-ñata bafumani likalabo zebakolwisize luli.
2. Bibele ikona kulutusa cwañi kuikola bupilo zazi ni zazi?
Bibele ilufa likelezo zende. Ka mutala, iluta mabasi kuziba zekona kubatusa kuba ni tabo yetuna. Ilubonisa zeluswanela kueza haluikutwa kukatala mwa munahano ni zekona kulutusa kuikola musebezi waluna. Mukaituta zeiluta Bibele ka za litaba zeo ni litaba zeñwi zeñata halunze lunyakisisa litaba ze mwa broshuwa ye. Kueza cwalo kuka mitusa kulumela kuli ‘Liñolo kamukana [zeñozwi mwa Bibele kaufela] latusa.’—2 Timotea 3:16.
Broshuwa ye haiyoli Bibele. Kono mane imisusueza kuli munyakisise zeibulela Bibele. Kacwalo, lumikupa kuli mubale mañolo abonisizwe mwa lituto ze ni kuabapanya ni litaba zemusweli kuituta.
MUBATISISE
Munyakisise mo Bibele seituselize batu, zekona kumitusa kuikola kuibala, ni libaka hakuli kwa butokwa kutusiwa ki babañwi kuli muiutwisise.
3. Bibele yakona kuluetelela
Bibele iswana sina liseli lelituna. Yakona kulutusa kueza likatulo zende ni kulutusa kuziba zekaezahala kwapili.
Mubale Samu 119:105, mi kihona mukanyakisisa lipuzo zelatelela:
-
Muñoli wa samu ye naanani mubonelo ocwañi ka za Bibele?
-
Munani mubonelo mañi ka za Bibele?
4. Bibele yakona kualaba lipuzo zaluna
Musali yomuñwi naalemuhile kuli Bibele neialabile lipuzo zene mukatalize ka lilimo zeñata. Mubuhe VIDIO, mi kihona mukanyakisisa lipuzo zelatelela.
-
Ki lipuzo mañi zanaanani zona musali yelubuhile mwa vidio?
-
Kuituta Bibele neku mutusize cwañi?
Bibele ilususueza kubuzanga lipuzo. Mubale Mateu 7:7, mi kihona mukanyakisisa puzo yelatelela:
-
Ki lipuzo mañi zemunani zona zeikona kualaba Bibele?
5. Mwakona kuikola kubala Bibele
Batu babañata baikola kubala Bibele mi isweli yabatusa luli. Mubuhe VIDIO, mi kihona mukanyakisisa lipuzo zelatelela.
-
Babanca belubuhile mwa vidio nebanani mubonelo mañi ka za kubala Bibele?
-
Ki kabakalañi hase banani mubonelo usili cwale ka za kubala Bibele?
Bibele ibulela kuli litaba ze mwateñi zakona kuluetelela, kuluomba-omba ni kulufa sepo. Mubale Maroma 15:4, mi kihona mukanyakisisa puzo yelatelela:
-
Kana litaba ze mwa Bibele zeomba-omba ni zefa sepo zamitabisa?
6. Babañwi bakona kulutusa kuutwisisa hande Bibele
Kwandaa kuipalela feela Bibele banosi, batu babañata balemuhile kuli nzila yeñwi yekona kubatusa kuutwisisa Bibele, ki kunyakisisanga litaba ze mwateñi ni babañwi. Mubale Likezo 8:26-31, mi kihona mukanyakisisa puzo yelatelela:
-
Ki lika mañi zekona kulutusa kuutwisisa Bibele? Mubone litimana 30 ni 31.
Muuna wa Muetopia naatokwa tuso kuli autwisise Mañolo. Ni kacenu, batu babañata balemuhile kuli kuituta Bibele ni babañwi kwabatusa
BABAÑWI BABULELANGA KULI: “Kuituta Bibele ki kusinya feela nako.”
-
Mukona kualaba cwañi mutu yabulela cwalo? Mi ki kabakalañi hamukona kumualaba cwalo?
LITABA KA BUKUSWANI
Bibele ifa likelezo zetusa mwa bupilo, ialaba lipuzo za butokwa, mi iomba-omba batu ni kubafa sepo.
Mulundulule
-
Ki likelezo zecwañi zelukona kufumana mwa Bibele?
-
Ki lipuzo mañi zeñwi zeialaba Bibele?
-
Ki lika mañi zemutabela kuituta mwa Bibele?
MUBONE LITABA ZEÑWI
Mwa Bibele kunani litaba zekona kulutusa kacenu.
“Lituto ze Mwa Bibele Lilutusa Kuba ni Butali ka Nako Kaufela” (Tawala ya Mulibeleli No. 1 2018)
Mubone mo Bibele neituselize muuna yomuñwi yanaakatazwanga ki minahano kuzwa feela kwa bwanana bwahae.
Munyakisise litaba za mwa Bibele zetusa batu baba mwa lubasi.
“Lika ze 12 Zekona Kutusa Mabasi Kuikola Bupilo” (Muzuhe! No. 2 2018)
Muitute mo Bibele italuseza taba yebasa utwisisi hande batu ka za yabusa lifasi.
Ki Kabakalañi Haluswanela Kuituta Bibele?—Vidio Kaufela (3:14)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
