Ki kwa makalelo a mbumbi. Kacwalo, ki nako ya kuli lubasi lwa Josefa, balikani, ni bana bahabo yena, batame musipili wakuya kwa mukiti oeziwanga hañwi ka silimo kwa Jerusalema. Bayo eza mukiti wa Paseka sina moulaelela Mulao. (Deuteronoma 16:16) Musipili wa kuzwa kwa Nazareta kuya kwa Jerusalema ueza likilomita ze 120. Batu kaufela bapatehile kuitukiseza kufunduka, mi batabile. Jesu wa lilimo ze 12, unyolezwi hahulu kuyo fumaneha kwa mukiti wo ni kuya kwa tempele hape.

Ku Jesu ni lubasi lwahae, mukiti wo haki wa lizazi lililiñwi feela. Hamulaho wa Paseka, lizazi lelitatama ki lona leukalisa Mukiti wa Linkwa Zesika ya Mumela, wa mazazi a 7. (Mareka 14:1) Mukiti wo ungiwa sina kalulo ya nako ya Paseka. Musipili wa kuzwa habo bona kwa Nazareta, nako ya kuina mwa Jerusalema, ni musipili wa kukutela habo bona linganga nako yebato kwana lisunda zepeli. Kono silimo se, nako yeo ibile yetelele ni kufita kabakala zeezahala ku Jesu. Kubile cwalo bakeñisa butata bobulemuhiwa habanze bakuta kuzwa kwa Jerusalema.

Josefa ni Maria banahana kuli Jesu u mwa sikwata sa bahabo bona ni balikani habanze bazamaya hamoho kuliba kwa mutulo. Kono habapumula ka nako ya busihu, balemuha kuli hayo. Kacwalo, bakala kumubata-bata mwahalaa balikani babona, kono haba mufumani. Mwanaa bona hayo! Josefa ni Maria bakutela kwa Jerusalema kuyo mubata.

Bamubata lizazi kaufela kono haba mufumani. Mane nihaiba mwa lizazi lelitatama haba mufumani. Mi cwale fa lizazi labulaalu, bamufumana mwa tempele, ili yenani mizuzu yemiñata. Babona Jesu inze ainzi mwahalaa baluti ba Sijuda. Uteeleza ku bona, ubabuza lipuzo, mi ubakomokisa ka kutwisiso yahae.

Maria umubuza kuli: “Mwanaka, kiñi hau luezize cwana? Bona, ndataho ni na lukubatile hahulu.”—Luka 2:48.

Jesu ukomoka kuli nebasa zibi kwainzi. Ubabuza kuli: “Nemu nibatelañi? Kana nemusa zibi kuli nilukela kuba mwa ndu ya Ndate?”—Luka 2:49.

Cwale hase bakopani, Jesu ukutela habo kwa Nazareta hamoho ni Josefa ni Maria, mi uzwelapili kuipeya kwatasaa bona. Uzwelapili kuba ni butali ni kuhula. Nihasali mwanana cwalo, ushemubiwa ki Mulimu ni batu. Kaniti, kuzwa feela kwa bwanana bwahae, Jesu utoma mutala omunde wa kubata za Mulimu, ni wa kukuteka bashemi bahae.