Jesu uhulela mwa muleneñi omunyinyani hahulu wa Nazareta. Muleneñi wo, ufumaneha kwa mutulo, mwa sibaka sa malundu sa Galilea, ili kwa wiko wa lisa lelituna lelibizwa Liwate la Galilea.

Josefa ni Maria batisa Jesu mwa muleneñi wo kuzwa kwa Egepita, mwendi Jesu inze anani lilimo zepeli. Kubonahala kuli ka nako ye, ki yena feela mwanaa bona anosi. Kono hasamulaho, kupepiwa banyani bahae babashimani—bo Jakobo, Josefa, Simoni, ni Judasi. Josefa ni Maria hape bapepa bana babasizana, ili likaizeli za Jesu. Ka mukwa ocwalo, Jesu uba ni banyani bahae ba 6 kamba kufitelela.

Jesu unani bana bahabo yena babañwi hape. Lwaziba ka za Elizabeta ni mwanaa hae, yena Joani. Joani upila kwahule hahulu ni yena, kwa mboela, ili mwa Judea. Salome, ili yo mwendi ki munyanaa Maria mahe Jesu, upila bukaufi mwa Galilea. Muunaa Salome ki Zebedea. Bana babona bababeli babashimani, bo Jakobo ni Joani, ki bana bahabo Jesu. Haluzibi nji Jesu utandanga nako yeñata ni bona habanze bahula, kono hasamulaho baba balikani bahae babatuna, ili baapositola bahae.

Josefa utokwa kusebeza ka taata kuli ababalele lubasi lwahae lolusweli kuhula. Ki mubeti. Josefa uuta Jesu sina mwanaa hae luli, ka  mukwa ocwalo, Jesu ubizwa “mwanaa mubeti.” (Mateu 13:55) Josefa uluta Jesu musebezi wa bubeti, mi Jesu uba mubeti yomunde. Mane hasamulaho batu bamubiza “mubeti.”—Mareka 6:3.

Nto ya butokwa hahulu mwa lubasi lwa Josefa ki kulapela Jehova. Ka kumamela Mulao wa Mulimu, Josefa ni Maria baluta bana babona za Mulimu ‘habainzi mwa ndu yabona, ni habazamaya mwa nzila, ni habalobala, ni habazuha.’ (Deuteronoma 6:6-9) Mwa Nazareta kunani sinagoge. Lwaziba kuli Josefa kamita uyanga ni lubasi lwahae kwateñi kuyo lapela. Lubala kuli hasamulaho, Jesu naayanga kwa sinagoge ka kuya “ka mukwa wahae ka lizazi la Sabata.” (Luka 4:16) Hape lubasi lwa Josefa luikolanga hahulu kuya kwa tempele ya Jehova mwa Jerusalema.