Jesu upetile zeñata mwa bukombwa bwahae bobutuna bwa mwa Galilea. Kono Jesu habulela kuli “nilukela kuyo shaela taba yende ya Mubuso wa Mulimu ni kwa mileneñi yemiñwi,” utalusa libaka zeñwi kwandaa Galilea. Ka mukwa ocwalo, uya inze “akutaza mwa masinagoge a Judea.” (Luka 4:43, 44) Ye ki nako yeswanela kakuli mbumbi ituha ikalisa mi kutuha kuezwa mukiti mwa Jerusalema.

Halubala libuka za Evangeli, lufumana kuli litaba zebulela za bukombwa bwa Jesu mwa Galilea ki zeñata kufita zebulela za bukombwa bwahae mwa Judea. Batu babañata mwa Judea niha basa tabeli zaeza Jesu, hatuheli kukutaza ka tukufalelo ni kueza misebezi yeminde kwaya kaufela.

Cwale Jesu utuha aya kwa muleneñi omutuna wa Judea, ona wa Jerusalema, kuyo fumaneha kwa mukiti wa Paseka wa silimo sa 31 C.E. Mwa sibaka sesitezi batu sesili bukaufi ni Munyako wa Lingu, kunani kasa kakanani malibela kakabizwa Betesda. Bakuli babañata, libofu, ni lihole batahanga kwa kasa kao. Kabakalañi? Kakuli kulumelwa kuli batu bakona kufoliswa habakena mwa kasa kao mezi hanyanganyiswa.

Seli lizazi la Sabata, mi Jesu ubona muuna kwa kasa kao, ili yasakulile lilimo ze 38. Jesu umubuza kuli: “Kana walata kufola?” Yena ualaba kuli: “Muñaaka, hanina yakona kunikenya mwa kasa mezi hanyanganyiswa, kono nisabata feela kukena mwateñi yomuñwi wanilaka.”—Joani 5:6, 7.

Jesu ubulela nto yekona kukomokisa muuna yo ni mutu yautwa kaufela, uli: “Yema! Uunge bulobalo bwahao mi uzamaye.” (Joani 5:8) Mi muuna yo ueza honacwalo. Honafo, wafola mi uunga bulobalo bwahae ni kukala kuzamaya!

Kufita kutabela nto yende yeezahezi, Majuda hababona muuna yo, babulela kuli: “Le ki la Sabata, mi mulao haulumelezi kuli ulwale bulobalo bo.” Muuna yo ubaalaba kuli: “Yena yanifolisize ki yena yanaa nibulelezi kuli: ‘Uunge bulobalo bwahao mi uzamaye.’” (Joani 5:10, 11) Majuda bao banyaza mutu yafolisa la Sabata.

Bamubuza bali: “Ki mañi mutu yo yakubulelezi kuli: ‘Uunge bulobalo bwahao mi uzamaye’?” Bamubuzezañi cwalo? Kakuli Jesu “naakeni mwa buñata bwa batu,” mi muuna yafolisizwe yo hazibi libizo la Jesu. (Joani 5:12, 13) Kono muuna yo naakakopana hape ni Jesu. Hasamulaho, ukopana ni Jesu mwa tempele, mi cwale saaziba libizo la mutu yanaa mufolisize kwa kasa.

Muuna yanaafolisizwe yo ufumana Majuda bane bamubuzize ka za mutu yamufolisize. Ubabulelela kuli neli Jesu. Habautwa cwalo, Majuda baya ku Jesu. Kana bayela kuyo buza Jesu ka za sesi mukonisa kueza lika zekomokisa zeo? Batili. Babata kufa Jesu mulatu kabakala kueza sesinde la Sabata. Mi mane bakalisa kumukataza!