Pilato naabulelezi buñata bobubata kuli Jesu abulaiwe kuli: “Hanisika fumana mulatu mwa lika zemu mutama ka zona. Mane, ni yena Heroda hasika fumana mulatu ku yena.” (Luka 23:14, 15) Cwale kuli alukulule Jesu, Pilato ulika muezezo omuñwi hape, ubulelela sicaba kuli: “Munani sizo sa kuli nimilukululele mutu ka lizazi la Paseka. Cwale kana mubata kuli nimilukululele Mulena wa Majuda?”—Joani 18:39.

Pilato ulemuha kuli kunani lipantiti yabizwa Barabasi, yazibahala ka busholi, kufetuhela mubuso, ni ka bukebenga. Ka mukwa ocwalo, Pilato ubuza kuli: “Ki ufi yemubata kuli nimilukululele, Barabasi kamba Jesu yebali ki Kreste.” Sicaba ka kususuezwa ki baprisita babahulu, sikupa kuli kulukululwe Barabasi isiñi Jesu. Pilato hape ubuza kuli: “Ki mañi ku bababeli ba, yemubata kuli nimilukululele?” Sicaba sihuwa kuli: “Barabasi”!—Mateu 27:17, 21.

Ka kukomoka, Pilato ubuza kuli: “Cwale Jesu yebali ki Kreste, yena nimueze cwañi?” Sicaba sihuwa sili: “Apahekiwe fa kota!” (Mateu 27:22) Ka bumai, babata kuli kubulaiwe mutu yasina mulatu. Pilato ubabuza kuli: “Libaka ki lifi? Ki bumaswe mañi bwaezize muuna yo? Hanisika fumana ku yena mulatu waswanela kubulaelwa; cwale nika mufa koto ni kumulukulula.”—Luka 23:22.

Kusina taba ni kuli Pilato ukuta-kutezi kulika kulukulula Jesu, sicaba sesifilikani sahuwa ka kuyelela, sali: “Apahekiwe fa kota!” (Mateu 27:23) Baeteleli ba bulapeli basusuelize sicaba kuli sikupe kusulula mali a mutu! Mi isiñi mali a sikebenga. Ki mali a mutu yasina mulatu, ili yo mazazi aketalizoho kwamulaho naamuhezwi mwa Jerusalema sina Mulena. Haiba balutiwa ba Jesu bateñi fa, baikuzelize feela ni kuipata.

Pilato ulemuha kuli buikatazo bwahae habutusi sesiñwi. Batu bazwelapili kuhuwa, ka mukwa ocwalo, uunga mezi ni kutapa kwa mazoho fapilaa batu kaufela. Ubabulelela kuli: “Hanina mulatu mwa mali a mutu yo. Muiponele mina beñi.” Nihaeza cwalo batu habacinci mubonelo wabona. Kono bali: “Mali ahae abe fahalimwaa litoho zaluna ni za bana baluna.”—Mateu 27:24, 25.

Mubusisi yo ubata kutabisa sicaba kufita kueza nto yaziba kuli ilukile. Ka mukwa ocwalo, sicaba sakupa kuli, Pilato abalukululele Barabasi.  Pilato ulaela kuli Jesu atubulwe liapalo ni kushapiwa.

Hase bafelize kushapa Jesu, masole baisa Jesu mwa ndu ya mubusisi. Sikwata sa masole sakopana ni kuzwelapili kunyandisa Jesu. Baluka kuwani ya miiutwa ni kuitinisa Jesu kwa toho. Masole hape baswalisa Jesu lutaka mwa lizoho lahae la bulyo ni kumuapesa siapalo sa mubala wa bufubelu bobutona sesiswana ni sesitiniwangwa ki mulena. Babulela ka kumunenauna bali: “Lumela, wena Mulena wa Majuda!” (Mateu 27:28, 29) Hape bakwela Jesu mati ni kumunataka mwa pata. Baanga lutaka lwanaasweli, ni kumunata lona mwa toho ilikuli miutwa ye kwa “kuwani” ikene mwa toho yahae.

Kuzwelapili kuba ni likute ni kutiya kwa Jesu hanze anyandiswa cwalo kukomokisa hahulu Pilato, mi hape ulika kumulukulula, Pilato uli: “Hamubone! Nimitiseza yena kwande kuli muzibe kuli hanifumani mulatu ku yena.” Kana Pilato unahana kuli kutisa Jesu kwande inze aholofezi ni kulota mali cwalo, kukatahiseza sicaba kucinca mubonelo wasona? Jesu hanze ayemi fapilaa sicaba sesilunya se, Pilato Ubulela Kuli: “Hamubone! Mutu ki Yo!”—Joani 19:4, 5.

Nihaike kuli Jesu unatakilwe ni kuholofazwa, uzwelapili kuba ni likute ni buiswalo kuli mane Pilato ulemuha taba yeo, kakuli manzwi ahae abonisa kuli wamukuteka ni kumushwela makeke.