• SILIMO SENE BAPEPILWE: 1963

• NAHA KONE BAPEPEZWI: BRITAIN

• LIKA ZENE BAEZANGA KWAMULAHO: NEBAIKOLA BUPILO BWA MBOMBOLELWA

BUPILO BWAKA BWA KWAMULAHO:

Ki na wa bu 6 mwa lubasi lwa batu ba 9, mi nenipepezwi mwa Croydon, ili tolopo ya South London. Bashemi baka nebasimuluha kwa soli sa Caribbean island kwa St. Vincent. Bo ma nebalapela kwa Keleke ya Methodist. Nenisina takazo ya kuituta za Mulimu nihaike kuli nenili mutu yanaatabela hahulu kuziba lika zeñata mwa bupilo. Sikolo hasipumula, nenilata hahulu kuyanga kwa lisa la mwa silalanda saluna ni kubala libuka zeshutana-shutana zene nikalimanga kwa sifalana sa libuka.

Lilimonyana kuzwa fonifeleza sikolo, naba ni mulelo wa kubata kutusa batu babaziyelehile. Nakala kusebelisana ni sikwata sene sitalima za kutusa batu babasina maino ni liyanga. Naya kwa yunivesiti kuyo eza kosi ya bualafi mwa litaba za sayansi. Hase nifelize kosi yaka, nakala kupila bupilo bobunde hahulu bwa mbombolelwa, mi nahuliswa hañata-ñata fa musebezi. Bakeñisa kuli nenisebeleza mwa liluko lene litalima za kubatisisa litaba fa Intaneti, nenitokwa kuba ni kompyuta, ni sibaka kokufumaneha Intaneti. Kacwalo, neniyanga ni fulai kwa libaka zenitabela ni kuyo ina kwateñi lisunda lisikai mwa hotela inze niikola kubuha libaka zende mane ni kueza lipapali zetiisa mubili mwa libaka zende. Neniikutwa kuli bupilo nebuzamaya hande luli. Kono nenisa hupulanga batu bane banyanda mwa bupilo.

BIBELE MONE ICINCELIZE BUPILO BWAKA:

Ka lilimo zeñata neniipuzanga lipuzo zecwale ka za kuli, ‘Lupilelañi, mi mulelo wa bupilo ki ufi?’ Kono nenisika lika kubata likalabo za lipuzo zeo mwa Bibele. Zazi leliñwi ka silimo sa 1999, kaizelaa ka Margaret, yanaali Paki ya Jehova, ato nipotela ni balikani bahae bane bali Lipaki, ili bane babonisize kuli baniisa pilu. Nalumela kuituta Bibele ni mulikanaa kaizelaa ka, kono nenisika eza zwelopili kapili bakeñisa kuli neni patehiswanga hahulu ki lika zene nieza mwa bupilo.

Ka silimo sa 2002, mwa mbumbi, natutela kwa mboela-wiko wa England. Hase nifitile kwa England, naekeza kwa lituto zaka kwa yunivesiti mwa liluko la kubatisisa litaba, mi mulelo waka neli wa kuba dokota. Nakala kuyanga kamita kwa Ndu ya Mubuso ni mwanaa ka wamushimani. Nihaike kuli neniikola litaba zene niituta kwa sikolo sesipahami, kuituta Bibele neku nitusize kuziba hande miinelo yetaata yebakopana ni yona batu, ni moika tatululelwa. Neniutwisisize hande liñolo la Mateu 6:24, lelibulela kuli haukoni kusebeleza malena bababeli. Mutu ukona feela kuiketela kusebeleza Mulimu kamba bufumu. Mi taba yeo neinitusize kuziba zeniswanela kubeya mwa sibaka sapili.

Silimo sesifelile, nenifumanehanga kwa tuto ya Bibele ya mwa ndu ili ko Lipaki za Jehova nebaitutanga buka ya Is There a Creator Who Cares About You? * Neniikolwisisize kuli ki Jehova feela yena Mubupi waluna yakona kufelisa miinelo yetaata yebakopana ni yona batu. Ka nako yene nili kwa yunivesiti, nenilutiwanga kuli mutu hatokwi kulumela ku Mulimu kuli azibe mulelo wa bupilo. Neninyemisizwe hahulu ki lituto zecwalo. Hamulaho wa likweli zepeli, natuhela kueza kosi yene nieza kwa yunivesiti ilikuli niise hahulu pilu kwa lika za kwa moya.

Liñolo la mwa Bibele lene linisusuelize hahulu kueza licinceho ki Liproverbia 3:5, 6 lelili: “Usepe Jehova ka pilu yahao kaufela, mi usike waitinga fa kutwisiso yahao. Umuhupulange mwa linzila zahao kaufela, Mi yena ukalukisa linzila zahao.” Nenitusizwe hahulu ki kuituta za Mulimu ya lilato kufita kuba ni lika za kwa mubili ni libubo lakona kuba ni lona mutu la kuba dokota. Kuituta mulelo wa Jehova ka za lifasi ni zanaaezize Jesu kuli afane bupilo bwahae bakeñisa luna, neku nisusuelize kuneela bupilo bwaka ku Mubupi waluna. Nenikolobelizwe mwa April 2003. Hamulaho wa fo, nakala kunolofaza mupilelo waka hanyinyani-hanyinyani.

MONITUSELIZWE:

Silikani saka ni Jehova ki sa butokwa hahulu. Kuziba Jehova kunitusize kuba ni kozo ni tabo. Mi hape kuswalisana ni batu babasebeleza Mulimu kunitusize kuba ni tabo yetuna luli.

Litaba zenisweli kuituta mwa Bibele ni kwa mikopano ya Sikreste linitusa kufeza linyolwa laka la kwa moya. Niikola kutaluseza babañwi ka za tumelo yaka. Ka nako yacwale sikonkwani saka ki kutusa batu kuziba mobakona kufumanela tabo ka nako yacwale mane ni kuba ni sepo yende ya kwapili. Kuzwa feela mwa June 2008, nizwezipili kutusa mwa musebezi wa kukutaza, mi ninani tabo yetuna kufita yene ninani yona sapili. Niitumela hahulu ku Jehova kuli unitusize kuziba mulelo wa bupilo.

• SILIMO SENE BAPEPILWE: 1973

• NAHA KONE BAPEPEZWI: AUSTRIA

• ZENE BAEZANGA KWAMULAHO: PAPALI YA KUWINA MASHELEÑI

Nenihulezi

mwa toloponyana ya Braunau, mwa Austria. Batu mwa tolopo yeo banani hahulu masheleñi, mi hape nekusina hahulu bukebenga. Bashemi baka nebalapela kwa Keleke ya Katolika, mi neniyanga ni bona kwa keleke yeo.

Neniikutwanga bumaswe kabakala lika zeneezahezi ku na inze nisali mwanana. Nako yeñwi ka silimo sa 1984, hane nituha nikwanisa lilimo ze 11, nelusweli kulaha mbola ni mulikanaa ka yomutuna. Ka lona lizazi leo manzibwana, anatiwa ki mota mi ashwa. Nenikomokisizwe hahulu ki mwanaashwezi mulikanaa ka. Hamulaho wa lilimonyana kuzwa fa kozi yeo, nenizwezipili kunahana zeezahalanga batu habashwa.

Ka nako yenifeza sikolo, nakena musebezi wa kulukisa lika zeitusisa malaiti. Nihaike kuli neniikenyize mwa likwinano za mali, nenisina butata bwa kutokwa masheleñi. Hape nenitandanga nako inze nieza lipapali, mi nenilata hahulu kuteeleza kwa lipina zelilata. Nako kaufela neniyanga kwa mikiti. Nenipila bupilo bwa minyaka ni buhule, kono nenisina tabo.

BIBELE MONE ICINCELIZE BUPILO BWAKA:

Zazi leliñwi mwa silimo sa 1995, muuna muhulu yomuñwi wa musupali ya naali Paki, ato nipotela mi anibonisa buka yeñwi mone kunani kalabo ya puzo yeli, Ki lika mañi zeezahalanga ku luna halushwa? Naamuhela buka yeo bakeñisa kuli nenisa ikutwa hahulu bumaswe ka za lifu la mulikanaa ka. Nabala kauhanyo yenebulela za lifu, mi hasamulaho nafeza kubala buka mutumbi.

Zene nibalile mwa buka yeo neli nitusize kufumana likalabo kwa lipuzo zene ninani zona ka za lifu. Mi mane neniitutile litaba zeñata. Bakeñisa kuli nenihuliselizwe mwa Keleke ya Katolika, neninani tumelo yetuna ka za Jesu. Kono kuituta Bibele neku nitusize kusutelela hahulu ku Jehova yena Ndatahe Jesu. Nenitabile hahulu hane nizibile kuli Jehova walutokomela mi ubata kuli lumuzibe. (Mateu 7:7-11) Neniitutile kuli Jehova unani maikuto. Hape neniitutile kuli watalelezanga lisepiso zahae. Taba yeo neitahisize kuli nibe ni takazo ya kuituta za bupolofita bwa mwa Bibele ilikuli nibone mobutalelelizwe. Zene niitutile nelitiisize tumelo yaka ku Mulimu.

Nenilemuhile kuli Lipaki za Jehova ki bona feela bane batabela kutusa batu kuutwisisa hande niti ya mwa Bibele. Neniñozi mañolo anaabonisizwe mwa lihatiso za Lipaki ni kuabala mwa Bibele yaka ya Katolika. Kubatisisanga ka nzila yeo kwanitusa kulemuha kuli nifumani niti.

Litaba zene niitutile mwa Bibele neli nitusize kulemuha kuli Jehova ubata kuli nipile ka likuka zahae. Liñolo la Maefese 4:22-24, neli nitusize kulemuha kuli nenitokwa kutubula “butu bwakale” ili bone buzamaiswa ki ‘muzamao waka wakale’ mi nenitokwa “kuapala butu bobunca bone bubupilwe ka kulikana ni tato ya Mulimu.” Kacwalo natubula butu bwaka bwakale. Hape natuhela kubapalanga papali ya kuwina mali bakeñisa kuli itahisa kuli mutu alate hahulu masheleñi. (1 Makorinte 6:9, 10) Mi neniziba kuli, nenitokwa kutuhela kuswalisana ni balikana baka bakale haiba nenibata kueza licinceho, ni kukala kuswalisana ni balikani bane banani mikwa yeminde.

Nesi nto yebunolo kueza licinceho zeo. Kono nakala kuyanga kwa mikopano ya Lipaki za Jehova kwa Ndu ya Mubuso, ni kuba ni balikani mwa puteho yeo. Mi hape nenibanga ni nako ya kuituta Bibele ninosi. Kueza lika zeo neku nitusize kucinca mufuta wa lipina zene niteelezanga ku zona, kucinca likonkwani zaka, mane ni kukala kuapalanga ka nzila yende. Mi ka silimo sa 1995, nakolobezwa sina yomuñwi wa Lipaki za Jehova.

MONITUSELIZWE

Ka nako yacwale ninani mubonelo oswanela ka za masheleñi ni lika za kwa mubili. Nenili mutu wa kacimacima, kono cwale senili mutu yomunde. Mi hape hanisa bilaelanga hahulu ka za molika bela lika kwapili.

Nitabile kuli ni mwa sikwata sa batu mwa lifasi kaufela babasebeleza Jehova. Mi mwahalaa batu bao, kunani babakopana ni miinelo yetaata, kono bazwelapili kusebeleza Mulimu ka busepahali. Niitumela hahulu kuli ka nako yacwale niitusisa nako ni maata aka kaufela kusebeza Jehova ni kutusa batu babañwi, kufita kuipatela feela zaka.

• SILIMO SENE BAPEPILWE: 1963

• NAHA KONE BAPEPEZWI: ENGLAND

• ZENE BAEZIZE KWAMULAHO: NEBAZWAFISIZWE KI LIKA ZEÑWI MWA BUPILO

BUPILO BWAKA BWA KWAMULAHO

Nenipepezwi mwa England, kono hane ninani lilimo ze 7, bo ma batutela kwa Australia. Neluina kwa sibaka sesibizwa Gold Coast, ili sibaka sa mwa Queensland, kone bafitelanga baenyi mwa Australia. Nihaike kuli lubasi lwaluna nelushebile, kamita nelubanga ni lika zene lutokwa kwa mubili.

Kusina taba kuli nenihulezi mwa lubasi lolunde, nenisina tabo. Nenizwafisizwe hahulu ki lika zeñwi mwa bupilo. Bo ndate nebanwa hahulu bucwala. Nenisa balati hahulu bakeñisa kuli nebanwa hahulu bucwala, mi hape nebanyandisa bo ma. Hamulaho wa kuutwa lika zene bakopananga ni zona ka nako yene bali masole kwa Malaya, nakala kuutwisisa libaka hane baezanga lika zeñwi zesa swaneli.

Hane nili kwa sikolo, nakala kunwa hahulu bucwala. Hane nikwanisize lilimo ze 16, natuhela sikolo, mi nakala kuswalisana ni sikwata sa batu bane balwananga kwa likamba. Nakala kuitusisa milyani yekola, mi mane naba muzubi yomutuna wa kwai. Mi mane nenikalile kunwa hahulu bucwala. Mwa sibaka sa kuyanga kwa kunwa La Mukibelo ni La Sunda, nakala kuyanga zazi ni zazi.

Hane nili mwa lilimo za kunonoboka, mane ni hasamulaho wa kukwanisa lilimo ze 20, nakala kukakanya ka za haiba kunani Mubupi. Naipulelisa nali, ‘haiba Mulimu uteñi luli ki kabakalañi hatuhelela batu kunyanda ni kushwa?’ Mane neniñozi toko yeñwi ya kunyaza Mulimu kabakala bumaswe bo buliteñi mwa lifasi.

Hane ninani lilimo ze 23, natuhela kuswalisana ni sikwata sene niswalisana ni sona. Hasamulaho wa fo, nakala kuezanga misebezi yeshutana-shutana, mi mane nayotanda silimo inze nili kwa sibaka sesiñwi sa kwa mawate, kono mane kueza cwalo nekusika nitusa nihanyinyani. Nenisina takazo ya kueza nto ifi kamba ifi mwa bupilo. Hakuna feela nto yene nitabela kueza mwa bupilo. Neniinga kuli hakuna tuso ya kuba ni ndu yetuna, musebezi ofumanisa masheleñi, kamba kuhuliswa fa musebezi. Nto feela yene “niomba-ombanga ki kunwa bucwala ni kuteeleza kwa lipina.

Nisahupula nako yene nibile ni takazo yetuna ya kubata kuziba mulelo wa bupilo. Nenili mwa naha ya Poland, mi nenipotela munganda wa tukufazo ozibahala hahulu mwa Auschwitz. Nenibalanga za likezo zemaswe zeneezahalanga mwa sibaka se. Kono hane nifitile kwa sibaka seo, neniikutwile hahulu bumaswe kutalima fo sifita. Nenikomokile kuli batu bakona kuba ni situhu kwa batu babañwi. Nihupula hane ninze nizamaya-zamaya cwalo mwa munganda wo nenienga enga miyoko mi nenisweli kuipuza kuli, ‘Ki kabakalañi lika zeswana sina ze haliezahala?’

BIBELE MONE ICINCELIZE BUPILO BWAKA

Ka silimo sa 1993, hase nikutile kuzwa kwa sibaka kone niile, nakalisa kubalanga Bibele ilikuli nifumane likalabo kwa lipuzo zene ninani zona. Hamulahonyana wa fo, napotelwa ki Lipaki za Jehova, mi banimemela kwa mukopano omutuna one uezahalela mwa sitediyamu mwa silalanda saluna. Nalumela kuya kwa mukopano wo.

Neniile kwa sitediyamu likwelinyana kwamulaho kuyo buha mbola, kono ka nako yacwale neniile kwateñi kabakala mukopano one uezahalela kwateñi. Lipaki za Jehova nebanani likute mi nebaapezi hande, mi hape bana babona ni bona neba ikutekile hande. Mi nenitabisizwe hahulu ki zene niboni ka nako ya sico sa musihali. Buñata bwa Lipaki nebacela mwa libapalelo, kono hase bakutile mwa lipula zabona, nenisika bona masila mwa libapalelo. Lipaki bao kaufela nebabonahala kuli nebaikola bupilo mi nebanani kozo, ili nto yene nibata hahulu mwa bupilo. Hanihupuli lingambolo zenefilwe zazi lale, kono nisahupula mikwa yeminde yene babonisize Lipaki zazi lale.

Manzibwana hase nikutile kwa ndu, nakala kunahana za muhabo na yanaabalanga Bibele ni kuya kwa likeleke zeshutana-shutana. Lilimo lisikai kwamulaho, naanitaluselize kuli ukaziba bulapeli bwa niti ka muselo wabona. (Mateu 7:15-20) Kacwalo, nakala kunahanisisa lika zetahisa kuli Lipaki za Jehova bashutane hahulu ni bulapeli kaufela. Neli lwapili kuikutwa kuba ni sepo mwa bupilo.

Hamulaho wa lisunda zepeli, Lipaki bababeli bane banimemile kwa mukopano, bataha kuto nipotela. Banikupa kuli niitutange Bibele ni bona, mi nalumela. Nakalisa kuyanga ni bona kwa mikopano ya puteho.

Hane ninze niituta Bibele, mubonelo waka ka za Mulimu wacinca hahulu. Neniitutile kuli haki yena yatahisa manyando mwa lifasi, mi mane utoile kubona batu babaeza lika zemaswe. (Genese 6:6; Samu 78:40, 41) Naikatulela kuli hanina kueza nto ni yekana yekatahisa kuli Jehova aikutwe bumaswe. Nenibata kutabisa pilu yahae. (Liproverbia 27:11) Natuhela kunwa hahulu bucwala, kuzuba kwai, mane ni muzamao wa buhule. Mwa March 1994, nakolobezwa sina yomuñwi wa Lipaki za Jehova.

MONITUSELIZWE:

Ka nako yacwale nitabile mi hakuna zenibilaeza. Hanisa nwanga bucwala kuli nitatulule matata aka. Kono niitutile kuli niswanela kunepela mushimbo waka ku Jehova.—Samu 55:22.

Mwa lilimo ze 7 zefelile, nibile mwa linyalo ni Paki yomunde wa libizo la Karen, mi hape lupilisana hande ni mwanaa bona wa musizana yabizwa Nella. Kaufelaa luna luikola kukutazanga hamoho mwa bukombwa, kutusa batu babañwi kuituta niti ka za Mulimu. Ka nako yacwale, bupilo bwaka bunani mulelo.