“Haki ba Lifasi”

“Lifasi libatoile, kakuli haki ba lifasi.”—JOANI 17:14.

Taluso ya manzwi a: Bakeñisa kuli Jesu naasi wa lifasi, naasika ikenya mwa litaba za naha kamba misunga yene liteñi mwahalaa batu. Naabulezi kuli: “Kambe Mubuso waka ki wa lifasi le, likombwa zaka nelika nilwanela kuli nisike nafiwa kwa Majuda. Kono cwale, sina mokuinezi, Mubuso waka hauzwi mwa lifasi le.” (Joani 18:36) Jesu hape naaelelize balateleli bahae kuambuka nto ifi kamba ifi yelibulela Linzwi la Mulimu kuli ifosahalile, inge cwalo mibonelo yefosahalile, lipulelo zemaswe, ni muzamao omaswe.—Mateu 20:25-27.

Bakreste ba Kwa Makalelo Nebasi ba Lifasi: Muñoli wa litaba za bulapeli yabizwa Jonathan Dymond, naabulezi kuli Bakreste ba kwa makalelo “nebahanile kuya kwa ndwa kusina taba ni zeneka eziwa ku bona, ibe kuli nebaka sheununwa, kulengiwa mwa tolongo, kamba kubulaiwa.” Nebaikatulezi kunyandiswa kufita kuba ba lifasi. Hape bakeñisa kuli nebalatelela likuka za Bibele za muzamao, nebashutana ni batu babañwi. Muapositola Pitrosi naabulelezi Bakreste kuli: “Bakomoka hababona kuli hamuzwelipili kumata ni bona mwa mupilelo opongani wa mutakafululele, mi kabakaleo baminyefula.” (1 Pitrosi 4:4) Caziba wa litaba zakale yabizwa Will Durant, naañozi ka za Bakreste kuli: “Tumelo ni bukeni bwa tukwata twa Bakreste ne li kataza lizwalo la bahedeni ba ne ba lata minyaka.”

Ki bo Mañi Babasi ba Lifasi Kacenu? Buka ya New Catholic Encyclopedia neibulezi cwana ka za kusaikenya mwa ndwa kwa Bakreste kuli: “Kufosahalile kuhana kuya kwa ndwa kabakala lizwalo.” Magazini yebizwa Reformierte Presse ibulela kuli piho ya kopano yetalima litaba zeama liswanelo za sicaba ya African Rights ibonisa kuli likeleke kaufela nelinani kabelo kwa pulayano yenebile teñi mwa naha ya Rwanda ka silimo sa 1994, “kwandaa Lipaki za Jehova.”

Muuna yali muluti fa sikolo sesiñwi hanaaambola za pulao yetuna ya ba Nazi, naabulezi kuli: “Hakuna sikwata kamba kopano ya batu ba mwa naha yenenyazize buhata bone bubulezwi ni lika zemaswe kaufela zeneezahezi.” Hamulaho wa kueza lipatisiso kwa miziyamu yebizwa United States Holocaust Memorial Museum, naañozi kuli: “Puzo yaka ialabilwe.” Naalemuhile kuli Lipaki za Jehova nebakumalezi tumelo yabona kusina taba ni nyandiso.

Muzamao wabona ona ucwañi? Magazini ya kwa America ya Katolika ya U.S. Catholic ibulela kuli: “Buñata bwa babanca kacenu mwa Keleke ya Katolika habalumelelani ni zeiluta keleke fa taba ya batu babasika nyalana babapila hamoho [ni] taba ya batu babalobala hamoho basika nyalana.” Magazini yeo neibulezi za dikoni mwa keleke yanaaize: “Kubonahala kuli batu babafitelela 50 pesenti bapilanga hamoho pili basika nyalana kale.” Buka ya The New Encyclopædia Britannica ibulela ka za Lipaki za Jehova kuli: “Baanga kuli ki kwa butokwa hahulu kulatelela zeibulela Bibele ka za somano ni linyalo.”