Lisamu 94:1-23
94 Jehova, wena Mulimu yakutiseza bumaswe,+Wena Mulimu yakutiseza bumaswe, ubenye!
2 Yema, wena Muatuli wa lifasi.+
Ukutiseze babaikuhumusa sesi baswanela.+
3 Babamaswe bakaanga nako yekuma kai, wena Jehova,Babamaswe bakaanga nako yekuma kai inze banyakalala?+
4 Bambwasauka ni kubulela ka buikuhumuso;Kaufela babaeza zemaswe baitumbaeta.
5 Bapyata batu bahao, wena Jehova,+Ni kuhatelela saanda sahao.
6 Babulaya mbelwa ni muzwahule,Mi babulaya babasina bo ndataa bona.
7 Babulela kuli: “Jah haaboni;+Mulimu wa Jakobo haalemuhi sesiñwi.”+
8 Amuutwisise taba ye, mina babasina ngana;Mina likuba, mukabonisa lili kutwisiso?+
9 Yaezize* zebe, kana haakoni kuutwa nji?
Yaezize liito, kana haakoni kubona?+
10 Yahakulula macaba, kana haakoni kukalimela?+
Ki Yena yafa batu zibo!+
11 Jehova waziba mihupulo ya batu,Kuli ki moya feela obululwa.+
12 Tabo ki ya mutu yeuhakulula, wena Jah,+Yeuluta mulao wahao,+
13 Kuli umufe kozo mwa mazazi a ziyezi,Kufitela yamaswe ayepelwa mukoti.+
14 Kakuli Jehova haana kufulalela batu bahae,+Kamba kuyubeka saanda sahae.+
15 Kakuli katulo ikaba yelukile hape,Mi batu kaufela ba lipilu zenani niti baka ilatelela.
16 Ki mañi yaka nitusa ka kulwanisa babamaswe?
Ki mañi yaka nitusa ka kulwanisa babaeza zemaswe?
17 Kambe Jehova naasika nitusa,Nenika shwa kapili-pili.+
18 Hane niize: “Lihutu laka laatelela,”
Lilato lahao lelisa feli, wena Jehova, nelizwezipili kunitiisa.+
19 Hane niimezwi* ki lipilaelo,*Neu niomba-ombile ni kunikatulusa.+
20 Kana lubona* lolusika luka lwakona kuswalisana ni wenaInze lulela kutahisa butata mwa libizo la mulao?*+
21 Balwanisa maswe yalukile+Mi baatulela lifu mutu yasina mulatu.*+
22 Kono Jehova ukaba masabelo aka atiile,*Mulimu waka ki licwe laka la masabelo.+
23 Ukatahisa kuli likezo zabona zemaswe libakutele.+
Uka bayundisa* ka lunya lwabona.
Jehova Mulimu waluna uka bayundisa.*+
Litaluso ze kwatasi
^ Linzwi ka linzwi, “Yacezi.”
^ Kamba “Hane niatezwi mwa pilu.”
^ Kamba “minahano yebilaeza.”
^ Kamba “babusi; baatuli.”
^ Kamba “ka taelo.”
^ Linzwi ka linzwi, “Mi baatula mali a mutu yasina mulatu kuli anani mulatu (bumaswe).”
^ Kamba “sibaka sesilumbile sa silelezo.”
^ Linzwi ka linzwi, “Uka bakuzisa.”
^ Linzwi ka linzwi, “uka bakuzisa.”
