Liñolo la Jakobo 5:1-20
5 Cwale hamuteeleze mina bafumi, mulile mi mubokolole kabakala manyando amitahela.+
2 Bufumu bwamina bubolile, mi liapalo zamina licilwe ki mafele.+
3 Gauda ni silivera yamina licilwe ki mafumi, mi mafumi azona akaba bupaki bobu milwanisa mi akaca nama ya mibili yamina. Semukubukanyize sikaswana sina mulilo mwa mazazi a mafelelezo.+
4 Hamubone! Lituwelo zemusika lifa babeleki babakutuzi masimu amina lizwelapili kulila, mi mihuwo ya bakutuli ya kukupa tuso ifitile mwa mazebe a Jehova* wa limpi.+
5 Mupilile ka bumbombo ni ka kukolwisa litakazo zamina mwa lifasi. Mununisize lipilu zamina nihaiba mwa lizazi la kubulaiwa.+
6 Munyazize; mubulaile yalukile. Kana hamihanyezi?
7 Ka mukwa ocwalo mizwale, mube ni pilu-telele, kuisa nako ya kubateñi kwa Mulena.+ Hamubone! Mulimi uzwelapili kulibelela miselo ya butokwa ya lifasi, inze abonisa pilu-telele kufitela pula ya makalelo ni ya matabula itaha.+
8 Ni mina mube ni pilu-telele;+ mutiise lipilu zamina, kakuli nako ya kubateñi kwa Mulena isutelezi.+
9 Musike mwabilaelana* mizwale, kuli musike mwaatulwa.+ Hamubone! Muatuli uyemi fapilaa munyako.
10 Mizwale, mulikanyise mutala wa mone banyandezi+ ni mone baboniselize pilu-telele+ bapolofita bane babulezi ka libizo la Jehova.*+
11 Hamubone! Luunga babaitiisize kuli banani tabo.*+ Muutwile za buitiiso bwa Jobo+ mi muboni mwanaa muezelize Jehova* kwa mafelelezo,+ muboni kuli Jehova* unani lilato lelituna* ni makeke.+
12 Fahalimwaa zeo kaufela, mizwale baka, mutuhele kukonka, ibe ka lihalimu kamba ka lifasi kamba ka buitamo bufi kamba bufi. Kono “Eni” yamina ibe eni honacwalo, ni “Awa” yamina ibe awa honacwalo,+ kuli musike mwawela mwa katulo.
13 Kana kunani yanyanda mwahalaa mina? Azwelepili kulapela.+ Kana kunani yatabile? Aopele lisamu.+
14 Kana kunani yakula mwahalaa mina? Abize baana-bahulu+ ba puteho, mi bamulapelele, bamutoze oli+ ka libizo la Jehova.*
15 Mi tapelo yefiwa ka tumelo ikafolisa yakula,* mi Jehova* uka muzusa. Hape, haiba unani libi zaezize, ukaswalelwa.
16 Ka mukwa ocwalo, muipulele libi zamina+ patalaza yomuñwi ku yomuñwi mi mulapelelane, kuli mufoliswe. Kupo ya mutu yalukile inani maata amatuna.*+
17 Elia neli mutu yanani maikuto aswana ni aluna, kono hanaalapezi ka taata kuli pula isike yanela, neisika nela mwa naha ka lilimo zetaalu ni likweli ze 6.+
18 Kihaa lapela hape, mi lihalimu lanelisa pula mi naha yatahisa miselo.+
19 Mizwale baka, haiba yomuñwi ku mina akeluswa mwa niti mi yomuñwi amukutisa,
20 muzibe kuli mutu kaufela yakutisa muezalibi kuli azwe mwa nzila yahae ya bufosi+ ukapilisa muezalibi yo kwa lifu mi ukakwahela libi zeñata.+
Litaluso ze kwatasi
^ Mubone Litaba Zeekelizwe A5.
^ Kamba “mwatongokana.”
^ Mubone Litaba Zeekelizwe A5.
^ Kamba “mukekecima omutuna.”
^ Mubone Litaba Zeekelizwe A5.
^ Mubone Litaba Zeekelizwe A5.
^ Kamba “bafuyauzwi.”
^ Mubone Litaba Zeekelizwe A5.
^ Kamba mwendi, “yakatezi.”
^ Mubone Litaba Zeekelizwe A5.
^ Linzwi ka linzwi, “inani maata amatuna haisebeza.”
