“Hamutahe ku na, mina kaufela babambindana ni babaimezwi, mi nika mikatulusa. Muitwese coko yaka mi muitute ku na, kakuli ninani musa mi niwile pilu, mi mukakatuluha. Kakuli coko yaka ibunolo, mi mulwalo waka ububebe.”—Mateu 11:28-30, Bibele ya Toloko ya Lifasi Lelinca.

 “Mu tahe ku na mina kaufela babakatezi ni babaimezwi, mi nika miimulula. Mu itwese coko ya ka, mi mu itute ku na; kakuli ni na ni musa ni pilu ye bunolo, mi mukafumanela mioya yamina pumulo. Kakuli coko ya ka ibubebe, mi mulwalo wa ka ha u na bukiti.”—Mateu 11:28-30, New International Version.

 Jesu ka lilato naamemile bateelezi bahae kuli batahe ku yena. Naaba sepisize kuli hane bakaituta ku yena nebaka katuluha ni kutuseha.

 “Hamutahe ku na, mina kaufela babambindana ni babaimezwi.” Batu banaamemile Jesu neba ‘imezwi’ kabakala milao ni lizo za batu zene bahapelezwa ki babahulu babona ba bulapeli kuli balilatelele. (Mateu 23:4; Mareka 7:7) Batu-tu feela ni bona neba imezwi ki lipilaelo kakuli nebatokwa kubeleka ka taata kuli bafumanele mabasi abona zene batokwa.

 “Nika mikatulusa.” Jesu naasepisize batu bane baamuhezi memo yahae yende kuli naaka bakatulusa. Naaezize cwalo ka kubatusa kuutwisisa zanaatokwa luli Mulimu kuli baeze. (Mateu 7:24, 25) Zibo yeo nei balukuluzi kwa lituto za buhata ni lizo za bulapeli zene baimeza. (Joani 8:31, 32) Nihaike kuli nebatokwa kuikataza kuituta lituto za Jesu ni kulisebelisa, kueza cwalo, nekuba katulusize.

 “Muitwese coko yaka mi muitute ku na.” Mwa linako zene iñolwa Bibele, hañata babeleki nebaitusisanga coko, ili kota yebetilwe yene babeyanga fa maheta kuli bashimbele fateñi lika zebukiti. Kabaka leo, linzwi la “coko” nelitalusa kuba mwatasaa zamaiso ni ketelelo ya mutu yomuñwi. (Livitike 26:13; Isaya 14:25; Jeremia 28:4) Pulelo ya kuli “muitute ku na” hape ikona kutalusa kuli “mube balutiwa baka (baituti).” Kacwalo Jesu naasusueza bateelezi bahae kuli babe balutiwa bahae ka kumulatelela ni kulikanyisa mutala wahae.—Joani 13:13-15; 1 Pitrosi 2:21.

 “Mukakatuluha.” Jesu naasika sepisa kuli miinelo yetaata yene bakopana ni yona bateelezi bahae neika fela honafo feela. Nihakulicwalo, naabaomba-ombile ni kubatusa kuba ni sepo. (Mateu 6:25-32; 10:29-31) Batu bane babile balutiwa bahae ni bane baamuhezi lituto zahae nebalemuhile kuli kusebeleza Mulimu nesi mushimbo, kono kueza cwalo nekuba tahiseza tabo.—1 Joani 5:3.

 “Kakuli coko yaka ibunolo, mi mulwalo waka ububebe.” Ka kushutana ni baeteleli ba bulapeli bane bapilile mwa linako zahae, Jesu naikokobeza mi naanani musa. (Joani 7:47-49) Naasina buhali mi naasaezangi lika ka mwanaabatela feela yena. Kono naanani sishemo mi naatumeleha. Naanani mubonelo omunde ka za lika zene bakona kueza balateleli bahae. (Mateu 7:12; Mareka 6:34; Luka 9:11) Hape naababonisize mone bakona kutusezwa ki sishemo sa Mulimu ni kuikola kukatuluha kokutiswa ki kuba ni lizwalo lelinde. (Mateu 5:23, 24; 6:14) Tulemeno twa Jesu totunde netu sika tahisa feela kuli batu batahe ku yena, kono hape netu batusize kuamuhela coko yahae yebubebe ni kuba balutiwa bahae.

 Jesu naabulezi manzwi a kwa Mateu 11:28-30 ka nako yanaaeza musebezi omutuna wa kukutaza mwa Galilea mwa silimo sa 31 C.E. Muapositola Mateu neli feela yena muñoli wa Evangeli yanaañozi manzwi a. Ka kuba mutu yanaabanga mutelisi ni Mujuda, Mateu naaziba hande mo batu-tu feela nebanyandisezwa ki bulapeli bwa Sijuda ni batelisi ba Maroma. Kacwalo, lwakona kuba ni buikolwiso bwa kuli Mateu naasusuelizwe hanaaboni mo Jesu naaitusiselize maata anaafilwe ki Ndatahe yena Jehova, a kwa kumema batu bane baikokobeza ni bane baezwa maswe kuli batahe ku yena.—Mateu 11:25-27.

 Buka ya Evangeli ya Mateu ibonisa tulemeno totunde twanaabonisize Jesu ka kuba Mesia yanaasepisizwe ni mulena wa Mubuso wa Mulimu.—Mateu 1:20-23; Isaya 11:1-5.

 Mubuhe vidio yekuswani ye kuli mubone litaba zeñwi zefumaneha mwa buka ya Mateu.