“Jesu ali ku yena: ‘Ki na nzila ni niti ni bupilo. Hakuna yataha ku Ndate haisi ka na.’”—Joani 14:6, Bibele ya Toloko ya Lifasi Lelinca.

 “Jesu alaba ali, ‘Ki na nzila ni niti ni bupilo.’ Hakuna yataha ku Ndate haisi ka na.’”—Joani 14:6, Bibele ya New International Version.

 Mutu yabata kulapela Ndate, yena Jehova a Mulimu, uswanela pili kulemuha lika za butokwa zapeta Jesu mwa mulelo wa Mulimu.

 “Ki na nzila.” Jesu ki yena yalukonisa kuatumela Mulimu ka “nzila” yeswanela. Ka mutala, batu babalapela ku Mulimu baswanela kueza cwalo ka kuitusisa libizo la Jesu. (Joani 16:23, 24) Lifu la Jesu likonisa batu kukutisezwa ku Mulimu, kamba kuba ni silikani sesinde ni yena. (Maroma 5:8-11) Jesu hape naatomile mutala omunde obaswanela kulikanyisa batu babata kutabisa Mulimu.—Joani 13:15.

 “Ki na . . . niti.” Jesu naabulelanga niti ka nako kaufela mi naapilanga ka kulumelelana ni niti. (1 Pitrosi 2:22) Batu nebakona kuituta niti ka za Mulimu ka kuteeleza ku Jesu. (Joani 8:31, 32) Jesu hape naali “niti” bakeñisa kuli naatalelelize bupolofita bwa mwa Bibele. Ka mukwa ocwalo, naatalelelize lisepiso za Mulimu.—Joani 1:17; 2 Makorinte 1:19, 20; Makolose 2:16, 17.

 “Ki na . . . bupilo.” Jesu naafile bupilo bwahae sina tiululo ilikuli batu bababonisa tumelo ku yena bafumane bupilo bobusa feli. (Joani 3:16, 36) Hape ki “bupilo” kwa batu babashwile, kakuli uka bazusa kwa bafu.—Joani 5:28, 29; 11:25.

 “Hakuna yataha ku Ndate haisi ka na.” Batu bababata kuba ni silikani sesinde ni Mulimu baswanela kulemuha musebezi wapeta Jesu. Mi baeza cwalo ka kulapela ku Mulimu ka kuitusisa libizo la Jesu, ili nto yebonisa kuli balemuha maata anani ona Jesu Kreste. (Joani 15:16) Hape balemuha kuli bakona feela kufumana bupilo kabakala Jesu.—Likezo 4:12; Mafilipi 2:8-11.

 Likauhanyo 13 kuisa 17 za buka ya Joani litalusa za likelezo zanaafile Jesu kwa baapositola bahae ba 11 babasepahala fa busihu bone butatamiwa ki lizazi lanaabulailwe. Mwa kauhanyo 14, Jesu naasusuelize balutiwa bahae kuzwelapili kubonisa tumelo ku yena ni ku Ndatahe, kubalata ni kubautwa. (Joani 14:1, 12, 15-17, 21, 23, 24) Naabonisize kuli naanani silikani sesitiile ni Ndatahe, mi ni ka nako ye, silikani sabona sisatiile. (Joani 14:10, 20, 28, 31) Nihaike kuli Jesu naatuha akutela kwa lihalimu, naasepisize balutiwa bahae kuli naasike abayubeka. (Joani 14:18) Hape naabasepisize kuli naaka bafa “mutusi,” ili ‘moya okenile, wanaaka balumela Ndatahe ka libizo lahae.’ (Joani 14:25-27) Ka kubulela cwalo, mane ni mwa linzila zeñwi, Jesu naatusize balateleli bahae kuitukiseza mone bakatulela miinelo yetaata yene bakakopana ni yona kwapili.