Bibele ibulela kuli tato ya Mulimu kikuli batu ‘baambuke muzamao wa buhule.’ (1 Matesalonika 4:3) Linzwi la “muzamao wa buhule” sina moliitusiselizwe mwa Bibele, likopanyeleza bubuki, kalombe, somano mwahalaa muuna ni musali babasika nyalana.

•  Ki kabakalañi taba ya kuli batu babapila hamoho baswanela kunyalana kamba kutokwa haili ya butokwa ku Mulimu?

•  Kana batu baswanela kupila hamoho pili basika nyalana kale kuli babone nji baswanelana?

•  Kana batu babanyalani bakona kutiisa linyalo labona?

•   Mulimu ki yena yalukisize tukiso ya linyalo. Naatomile linyalo muta naakopanyize batu bapili hamoho. (Genese 2:22-24) Naasabati kuli muuna ni musali bapile hamoho inge basika eza buitamo bwa linyalo.

•   Mulimu waziba zebatokwa batu. Naalukisize kuli bo muuna ni musali babanyalani bapile hamoho kuya kuile ili nto yene katusa ni kusileleza lubasi kaufela. Halunyakisiseñi mutala wo. Sina feela litaelo zezwa ku mutu yapangile nto yeñwi halikona kumitusa kuziba mwa kulukiseza hande nto yeo, litaelo za Mulimu ni zona lilutusa kuziba molukona kubela ni tabo mwa lubasi. Batu babamamela likuka za Mulimu batusehanga kamita.—Isaya 48:17, 18.

•   Kueza somano ni mutu yemusika nyalana ni yena kutahisanga butata bobutuna. Ka mutala kukona kuzwa mwateñi lika zecwale ka mulwalo osika libelelwa, matuku a sihule, ni masitapilu. a

•   Mulimu ufile baana ni basali buikoneli bwa kuba ni bana ka kueza somano. Mulimu uunga bupilo kuba bwa butokwa, mi buikoneli bwa kuba ni bana ki mpo yende hahulu. Mulimu ubata kuli luitusise hande mpo yeo ka kukuteka tukiso ya linyalo.—Maheberu 13:4.

 Batu habatokwi kupila hamoho ka nakonyana pili basika eza kale buitamo bwa linyalo ilikuli bakone kuba ni tabo mwa linyalo. Kono mane silikani sitiyanga haiba batu babanyalani balatana hahulu ni kueza mobakonela kaufela kutatulula miinelo yetaata yebakona kukopana ni yona. b Linyalo litiisa buitamo.—Mateu 19:6.

 Hakuna linyalo lelipetahalile. Nihakulicwalo, batu babanyalani bakona kutiisa linyalo labona haiba basebelisa likuka za Bibele. Munyakisise mitala isikai ye:

•   Muise hahulu pilu kwa lika zebatabela bakumina kufita zamina feela.—1 Makorinte 7:3-5; Mafilipi 2:3, 4.

•   Mubonise lilato ni likute ku bakumina.—Maefese 5:25, 33.

•   Muitusisange lipulelo zende.—Liproverbia 12:18.

•   Mube ni pilu-telele mi muswalelange kapili.—Makolose 3:13, 14.