Kaizeli yomuñwi yabizwa Gwen naabulezi kuli: “Nenisa zibi kuli nikakona kueza zeñata cwana mwa sebelezo yaka ku Jehova.” Manzwi ao, abonisa mobaikutwela bo Gwen babasimuluha kwa England ka za kusebeleza kwa Albania, a kokutokwahala hahulu bakutazi ba Mubuso.

 Bo Gwen ki babañwi ba Lipaki za Jehova babañata babatutezi kwa Albania kuyo tusa kukubukanya “lika za butokwa za macaba kaufela.” (Hagai 2:7) Ki lika mañi zesusuelize bakutazi bao kuunga muhato wo? Ki licinceho mañi zene baezize kuli baange muhato wo? Mi ki lika mañi zetusize babatutezi kokutokwahala hahulu bakutazi ba Mubuso kuba ni tabo yebatusanga kutiyela miinelo yetaata?

 Bahasanyi kaufela babatutezi kwa Albania basusuezwa ki nto yeswana ye: Balata Jehova mi babata kutusa batu babañwi kumuziba.

 Pili basika tuta kale, nebaangile mihato yenee batusize kuekeza kwa bukombwa bwabona, mi kueza cwalo neku bakonisize kuyo sebeleza mwa naha isili. Bo Gwen batalusa kuli: “Nenikalile kuswalisana ni sikwata sene siitusisa puo ya Sialbania, mwa tolopo yene nipila ku yona. Kihona niya kwa mukopano omutuna kwa Albania. Hasamulaho, nakutela kwa Albania ka nakonyana ilikuli niyo ziba hande puo yeo.”

 Kaizeli yabizwa Manuela hanaanani lilimo ze 23, atutela kwa sibaka sisili mwa naha yahabo bona ya Italy, kuyo tusa puteho mone kunani bahasanyi babanyinyani. Utalusa kuli: “Nenisebelelize mwa sibaka seo ka lilimo zeene. Senilemuha kuli kwa Albania nekutokwahala hahulu bakutazi ba Mubuso. Kacwalo, nayo eza bupaina mwa naha yeo ka likweli lisikai.”

 Kaizeli yabizwa Federica, naanani lilimo ze 7 feela hautwa piho ka za Albania fa mukopano omutuna. Utalusa kuli: “Muzwale yanaafile piho yeo naabulezi kuli bahasanyi kwa Albania nebasweli kukalisa lituto za Bibele zeñata ni kuli batu babatabela nebayanga kwa mikopano ya puteho. Nataluseza bashemi baka kuli nenibata kuya kwa Albania. Nihaike kuli taba yeo nei bakomokisize, bo ndate banibulelela kuli: ‘Utaluseze Jehova takazo yahao ka tapelo, mi haiba ki tato yahae, ukateeleza.’ Hamulaho wa likweli lisikai kuzwa fo, lubasi lwaluna lwakupiwa kuyo sebeleza kwa Albania!” Sekufitile lilimo zeñata, mi bo Federica ka nako ya cwale banyezwi ku bo Orges. Sibeli sabona ki bakutazi ba nako kaufela kwa Albania.

 Muzwale yabizwa Gianpiero hasaatuhezi musebezi, atutela kwa Albania ni musalaa hae Gloria. Utalusa kuli: “Neluhuliselize bana baluna babashimani kwa Italy. Babalaalu ku bona nebatutezi kwa naha isili kone kutokwahala hahulu bakutazi ba Mubuso. Nelususuelizwe hahulu ki taba yeñwi mwa Tawala ya Mulibeleli yenenani toho ya taba yeli: ‘Kana Mwa Kona ku Silela Mwa Masedonia?’ Kacwalo, lwanyakisisa mone lukaitusiseza masheleñi ane nifilwe hanituhela musebezi, kuli luyo sebeleza kwa Albania.”

 Batu babatutelanga kokutokwahala hahulu bakutazi ba Mubuso baitukisezanga hande ni kueza licinceho zeñwi kuli baange muhato wo. (Luka 14:28) Zeñwi za lika zebaswanela kueza ki kufumana linzila za kuipilisa ka zona. Bo Gwen bababulezwi kwamulaho, nebatutile ni kukala kuina ni bahulwani babona hane basali kwa England, ilikuli babulukange masheleñi. Bo Sophia ni bakubona bo Christopher ni bona basimuluha kwa England, mi habaiheta kwamulaho, batalusa kuli: “Nelulekisize mota yaluna ni lika zeñwi za mwa ndu. Mulelo waluna neli kupila kwa Albania nihaiba feela silimo silisiñwi.” Nebatabile hahulu kuli nebakonile kupila nako yetelele mwa naha yeo.

 Bahasanyi babañwi bakutalezanga kwa Albania likweli lisikai feela kihona bakakutela kwa naha yahabo bona kuyo sebeza ni kubuluka masheleñi, mi hasamulaho bakutelanga kwa Albania. Ki mona mwanaaezezanga Muzwale yabizwa Eliseo ni kaizeli yabizwa Miriam. Bo Eliseo batalusa kuli: “Bo Miriam basimuluha kwa sibaka sesiñwi sesipotelwanga hahulu kwa Italy, mi kubunolo hahulu kufumana misebezi ya swalelele mwa sibaka seo. Neluyanga kwa sibaka seo ka nako ya mbumbi ni kuyo sebeza ka likweli zetaalu mi hasamulaho, mwa likweli ze 9 zesiyezi, nelukutelanga kwa Albania kuyo itusisa masheleñi ane lubulukile hane lunze lusebeza. Neluezize cwalo ka lilimo zeketalizoho.”

 Bahasanyi babatutezi kwa sibaka kokutokwahala hahulu bakutazi ba Mubuso hase bafitile kwa sibaka seo, baswanela kutwaela mupilelo wa kwateñi, mi kusebelisa kelezo yebafiwa ki Lipaki za Jehova ba mwa sibaka seo, ni kulatelela mutala wabona kubatusanga kutula miinelo yetaata. Bo Sophia bababulezwi kwamulaho, batalusa kuli: “Ka nako ya maliha mwa Albania, kubatanga hahulu mwa mandu kufita mokubatelanga kwa naha yaluna. Nenicincize mutinelo waka ka kulikanyisa mutinelo wa likaizeli ba mwa silalanda.” Muzwale yabizwa Grzegorz ni musalaa hae Sona, nebazwile kwa Poland ni kuyo tusa mwa tolopo yende hahulu ya Prizren, kwa Kosovo. b Bo Grzegorz batalusa kuli: “Bahasanyi mwa silalanda se, banani buikokobezo, sishemo, ni pilu-telele! Balutusa kuituta puo yebulelwa kwanu, mane ni kululuta lika zeñwi. Ka mutala, neba lubonisize lintolo molukona kuleka lika zecipile, ni kulutaluseza mwakulekela lika fa musika wa mwa silalanda.”

 Babatutelanga kwa linaha lisili baikolanga silikani sesinde ni Lipaki za Jehova ba mwa naha yeo ni kubaziba hande. Bo Sona batalusa kuli: “Niiponezi mo lilato la Jehova likona kucinceza bupilo bwa batu. Kubona mo mizwale ni likaizeli bacincelize litumelo zabona ni mupilelo wabona hamulaho wa kuituta ka za Jehova, kutiisize tumelo yaka. Mwa puteho, luikutwanga kuli lwaiswa pilu, mi lubatanga linzila za kutusa ka zona. Lusebeleza Mulimu ka kuswalisana ni mizwale ni likaizeli baluna babali balikani.” (Mareka 10:29, 30) Bo Gloria batalusa kuli: “Kunani likaizeli babañata boniziba bane balwanisizwe hahulu ki batu ba mwa silalanda babatoile Lipaki za Jehova. Kubona lilato labona ku Jehova kwanisusuezanga.”

 Babatutelanga kokutokwahala hahulu bakutazi ba Mubuso hape bakona kuituta lika zeñwi za butokwa zene basazibi. Ka mutala, bakona kulemuha kuli kueza lika zeñwi zekona kubonahala kuba zetaata ilikuli bapete zeñata mwa sebelezo yabona ku Jehova kubatahiseza tabo. Bo Stefano babulela cwana ka za taba yeo: “Mwa naha yaluna, hañata nenikutazanga ka kuitusisa sipangaliko sa kuambola teñi ni batu babali mwa ndu mutu haali fa munyako, mi nenibulelanga feela litaba lisikai. Kono batu ba kwa Albania balata hahulu kuikambota ni batu babañwi ka nako yetelele sihulu habanwa kofi. Bakeñisa kuli ni mutu wa maswabi hahulu, kwa makalelo neku nibelanga taata kuambola ni batu babañwi mi nenisa zibi za kubulela. Kono hamulaho wa nako, nakala kuiyakatwa hahulu batu, mi cwale seniikolanga kubuisana ni bona. Kukutaza kunitahiseza tabo yetuna.”

 Kaizeli yabizwa Leah ni muunaa hae William, nebazwile kwa America ni kututela kwa Albania. Utalusa kuli: “Kusebeleza mwa sibaka se kulutusize kuba ni mubonelo omunde wa lika. Luitutile zeñata inge cwalo mwakuboniseza moya wa kuamuhela baenyi, kubonisa likute, ni mwakubela ni balikani babande! Luitutile mikutalezo yeminca, mwakuitusiseza hande Mañolo, ni mwakuambolela ni batu.” Bo William, batalusa kuli: “Buñata bwa batu babapotelanga naha ya Albania baitebuhanga hahulu makamba ayona amande. Niikolanga kupotela libaka za malundu kwa Albania. Kono nilata hahulu kusebeleza kwa Albania kabakala batu babapila kwateñi! Batu babañata mwa minzi ya mwa kalulo yaluna ya simu, baziba feela litaba lisikai za mwa Bibele, ili litaba zene bautwile ka nako yene kubanga ni mingendenge yeipitezi. Haluyo kutalezanga mwateñi, fokuñwi lutandanga lizazi mutumbi inze lukutaza kwa mabasi a mwa minzi yeo.”

 Batu babatutelanga kokutokwahala hahulu bakutazi ba Mubuso, babanga ni tabo yetuna kubona batu habaamuhela taba yende. (1 Matesalonika 2:19, 20) Bo Laura, bane batutezi kwa Albania hane basali kaizeli yomunca wa likwasha, batalusa kuli: “Nenisebelelize mwa tolopo ya Fier nako yekuswani feela. Hamulaho feela wa silimo ni licika, batu babatabela ba 120 nebakwanisize zetokwahala kuli babe bahasanyi! Neniitutanga ni ba 16 kwa batu bao!” Kaizeli yomuñwi wa libizo la Sandra, haiheta kwamulaho, utalusa kuli: “Nenikutalize ku musali yomuñwi yanaasebeleza fa musika. Hamulaho wa kuba yomuñwi wa Lipaki za Jehova, akutela kwa munzi wahabo yena. Nako yefelile hane niikambotile ni yena, naanitalusize kuli naazamaisa lituto za Bibele ze 15!”

 Mizwale ni likaizeli babañwi bane batutezi kwa Albania, kokutokwahala hahulu bakutazi ba Mubuso lilimonyana kwamulaho, basasebeleza mwa naha ye mi baikola hahulu sebelezo yabona. Babanga ni tabo kuziba kuli batu bone bakutalize ku bona lilimo zeñata kwamulaho, nebaezize zwelopili ni kuba babañwi ba Lipaki za Jehova. (Muekelesia 11:6) Bo Christopher, bababulezwi kwamulaho, batalusa kuli: “Nenikopani ni muuna yomuñwi yene nikalile kuituta ni yena Bibele hanitutela feela kwa Albania. Nenisusuelizwe hahulu hanaa nitaluselize ka butungi litaba za mwa Bibele zene nikile naikambota ni yena. Ka nako ya cwale, yena ni musalaa hae ki batanga ba Jehova babakolobelizwe.” Bo Federica, bababulezwi kwamulaho, batalusa kuli: “Mwa puteho yeñwi neniatumezwi ki kaizeli yomuñwi mi anibuza haiba neni muhupula. Anitaluseza kuli nenikutalize ku yena lilimo ze 9 kwamulaho. Hamulaho wa nako kuzwa fonitutela mwa tolopo isili, akala kuituta Bibele, mi aeza zwelopili ni kukolobezwa. Neninahananga kuli lilimo zaluna zapili mwa Albania neli za mbango. Kono mubonelo waka neufosahalile!”

 Mizwale ni likaizeli bane batutezi kwa Albania kamba kwa Kosovo baitebuha kubona mo Jehova afuyaulezi buikatazo bwabona ni kubatusa kupila bupilo bobunde hahulu. Hamulaho wa kusebeleza mwa Albania ka lilimo zeñata, bo Eliseo batalusa ka bukuswani zebaipumani ku zona: “Luna batu, lukona kupumiwa ka bunolo kuli lukakondisa haiba lueza lika sina batu ba mwa lifasi le. Kono taba yeo haki ya niti. Lukona feela kuba ni tabo mwa bupilo ni kukondisa ka kusebelisa likuka za Jehova. Kusebeleza kokutokwahala hahulu bakutazi ba Mubuso kunihupulisanga buniti mwa manzwi ao. Niikutwa kuli nieza musebezi wa butokwa mi waitebuhiwa. Ninani balikani ba niti, babanani likonkwani zeswana ni zaka.” Bo Sandra balumelelana ni manzwi ao, mi batalusa kuli: “Ka nako yenitutela kokutokwahala hahulu bakutazi ba Mubuso, neniikutwile kuli Jehova naanifile tohonolo ya kueza nto yene ninyolezwi hahulu mwa bupilo, ili kusebeza sina mulumiwa. Haniinyazi nihanyinyani kuli neniikatulezi kututela kwa Albania. Ninani tabo yetuna luli.”