ຄາເມຣອນ: ສະບາຍ​ດີ​ຈອນ ດີໃຈ​ທີ່​ໄດ້​ພົບ​ເຈົ້າ​ອີກ. ຂ້ອຍ​ດີໃຈ​ທີ່​ເຮົາ​ໄດ້​ຮຽນ​ຄຳພີ​ໄບເບິນ​ນຳ​ກັນ​ທຸກ​ອາທິດ. a ເຈົ້າ​ສະບາຍ​ດີ​ບໍ?

ຈອນ: ຂ້ອຍ​ສະບາຍ​ດີ. ເຈົ້າ​ເດ?

ຄາເມຣອນ: ຂ້ອຍ​ກໍ​ສະບາຍ​ດີ. ເທື່ອ​ແລ້ວ​ເຮົາ​ລົມ​ກັນ​ວ່າ​ເປັນ​ຫຍັງ​ພະຍານ​ພະ​ເຢໂຫວາ​ບອກ​ວ່າ​ການ​ປົກຄອງ​ຂອງ​ພະເຈົ້າ​ເລີ່ມ​ປົກຄອງ​ໃນ​ປີ 1914. b ຕອນ​ນັ້ນ ເຮົາ​ໄດ້​ອ່ານ​ຄຳ​ພະຍາກອນ​ໃນ​ປຶ້ມ​ດານີເອນ​ບົດ 4 ນຳ​ກັນ. ເຈົ້າ​ຈື່​ເລື່ອງ​ທີ່​ເຮົາ​ອ່ານ​ໄດ້​ບໍ?

ຈອນ: ເລື່ອງ​ຄວາມ​ຝັນ​ຂອງ​ກະສັດ ເນບູກາດເນັດຊາ​ກ່ຽວກັບ​ຕົ້ນໄມ້​ໃຫຍ່​ແມ່ນ​ບໍ?

ຄາເມຣອນ: ແມ່ນ​ແລ້ວ. ໃນ​ຄວາມ​ຝັນ​ຂອງ​ກະສັດ​ເນບູກາດເນັດຊາ ລາວ​ເຫັນ​ຕົ້ນໄມ້​ໃຫຍ່​ຕົ້ນ​ໜຶ່ງ​ທີ່​ສູງ​ຈົນ​ຮອດ​ຟ້າ. ລາວ​ເຫັນ​ຜູ້​ສົ່ງ​ຂ່າວ​ຂອງ​ພະເຈົ້າ​ສັ່ງ​ໃຫ້​ຕັດ​ຕົ້ນໄມ້​ນັ້ນ​ເຫຼືອ​ໄວ້​ແຕ່​ຕໍ. ເມື່ອ​ຄົບ “ເຈັດ​ວາລະ” ກໍ​ປົ່ງ​ຂຶ້ນ​ໃໝ່. c ເຮົາ​ລົມ​ກັນ​ແລ້ວ​ວ່າ​ຄຳ​ພະຍາກອນ​ນີ້​ເກີດຂຶ້ນ​ແທ້​ສອງ​ເທື່ອ. ເຈົ້າ​ຈື່​ໄດ້​ບໍ​ວ່າ​ຄຳ​ພະຍາກອນ​ນີ້​ເປັນ​ຈິງ​ເທື່ອ​ທຳອິດ​ແນວ​ໃດ?

ຈອນ: ເທື່ອ​ທຳອິດ​ເກີດຂຶ້ນ​ແທ້​ກັບ​ກະສັດ​ເນບູກາດເນັດຊາ​ເອງ​ແມ່ນ​ບໍ? ລາວ​ເສຍ​ສະຕິ​ໄປ​ເຈັດ​ປີ.

ຄາເມຣອນ: ແມ່ນ​ແລ້ວ. ກະສັດ​ເນບູກາດເນັດຊາ​ເສຍ​ສະຕິ​ໄປ​ຊ່ວງ​ໜຶ່ງ​ເຮັດ​ໃຫ້​ການ​ປົກຄອງ​ຂອງ​ລາວ​ຢຸດ​ໄປ​ຊົ່ວຄາວ. ແຕ່​ຄຳ​ພະຍາກອນ​ນີ້​ຈະ​ເປັນ​ຈິງ​ທີ່​ໃຫຍ່​ກວ່າ ຄື​ການ​ປົກຄອງ​ຂອງ​ພະເຈົ້າ​ຢຸດ​ຊົ່ວຄາວ​ໃນ​ຊ່ວງ​ເວລາ​ໜຶ່ງ ເປັນ​ເວລາ​ເຈັດ​ວາລະ ເລີ່ມ​ຕັ້ງແຕ່​ຕອນ​ທີ່​ເມືອງ​ເຢຣູຊາເລັມ​ຖືກ​ທຳລາຍ​ໃນ​ປີ 607 ກ່ອນ ຄ.ສ ຕັ້ງແຕ່​ນັ້ນ​ມາ​ກໍ​ບໍ່​ມີ​ກະສັດ​ທີ່​ເປັນ​ຕົວແທນ​ຂອງ​ພະ​ເຢໂຫວາ. ພະເຈົ້າ​ປົກຄອງ​ປະຊາຊົນ​ຂອງ​ເພິ່ນ​ຢູ່​ເທິງ​ໂລກ ແຕ່​ເມື່ອ​ຄົບ​ເຈັດ​ວາລະ ພະເຈົ້າ​ຈະ​ຕັ້ງ​ຜູ້​ປົກຄອງ​ຄົນ​ໃໝ່​ຂຶ້ນ​ໃນ​ສະຫວັນ​ເພື່ອ​ປົກຄອງ​ປະຊາຊົນ​ຂອງ​ເພິ່ນ. ນີ້​ໝາຍ​ຄວາມ​ວ່າ​ການ​ປົກຄອງ​ຂອງ​ພະເຈົ້າ​ໃນ​ສະຫວັນ​ຈະ​ເລີ່ມ​ປົກຄອງ​ຕອນ​ທີ່​ເຈັດ​ວາລະ​ສິ້ນ​ສຸດ​ລົງ. ດັ່ງນັ້ນ ຖ້າ​ເຮົາ​ຮູ້​ວ່າ​ເຈັດ​ວາລະ​ສິ້ນ​ສຸດ​ຕອນ​ໃດ ເຮົາ​ກໍ​ຈະ​ຮູ້​ວ່າ​ເວລາ​ທີ່​ການ​ປົກຄອງ​ຂອງ​ພະເຈົ້າ​ເລີ່ມ​ປົກຄອງ. ເຈົ້າ​ພໍ​ຈະ​ຈື່​ໄດ້​ບໍ?

ຈອນ: ຈື່​ໄດ້.

ຄາເມຣອນ: ຖ້າ​ເປັນ​ແບບ​ນັ້ນ ໃຫ້​ເຮົາ​ມາ​ເບິ່ງ​ນຳ​ກັນ​ເລີຍ​ເນາະ​ວ່າ​ເຈັດ​ວາລະ​ດົນ​ປານ​ໃດ. ຂ້ອຍ​ໄດ້​ທົບທວນ​ເລື່ອງ​ນີ້​ອີກ​ເທື່ອ​ໜຶ່ງ​ຈະ​ພະຍາຍາມ​ອະທິບາຍ​ໃຫ້​ເຈົ້າ​ຟັງ​ເດີ.

ຈອນ: ໂດຍ.

ຄາເມຣອນ: ຕອນ​ທີ່​ຄຳ​ພະຍາກອນ​ນີ້​ເປັນ​ຈິງ​ເທື່ອ​ທຳອິດ​ກ່ຽວກັບ​ກະສັດ​ເນບູກາດເນັດຊາ ເຈັດ​ວາລະ​ຄື​ເຈັດ​ປີ​ຕາມ​ໂຕ​ອັກສອນ. ແຕ່​ຕອນ​ທີ່​ຄຳ​ພະຍາກອນ​ນີ້​ເປັນ​ຈິງ​ທີ່​ໃຫຍ່​ກວ່າ​ກັບ​ການ​ປົກຄອງ​ຂອງ​ພະເຈົ້າ ເຈັດ​ວາລະ​ຕ້ອງ​ຍາວ​ນານ​ກວ່າ​ເຈັດ​ປີ.

ຈອນ: ເປັນ​ຫຍັງ​ຈຶ່ງ​ເວົ້າ​ແບບ​ນັ້ນ?

ຄາເມຣອນ: ລອງ​ຄິດ​ເບິ່ງ​ວ່າ ເຈັດ​ວາລະ​ເລີ່ມ​ຕອນ​ທີ່​ເມືອງ​ເຢຣູຊາເລັມ​ຖືກ​ທຳລາຍ​ໃນ​ປີ 607 ກ່ອນ ຄ.ສ. ຖ້າ​ເຮົາ​ນັບ​ໄປ​ອີກ​ເຈັດ​ປີ​ກໍ​ເປັນ​ປີ 600 ກ່ອນ ຄ.ສ ແຕ່​ໃນ​ປີ​ນັ້ນ​ບໍ່​ມີ​ເຫດການ​ຫຍັງ​ສຳຄັນ​ເກີດຂຶ້ນ​ເລີຍ​ທີ່​ຈະ​ເຊື່ອມ​ໂຍງ​ກ່ຽວກັບ​ການ​ປົກຄອງ​ຂອງ​ພະເຈົ້າ. ນອກ​ຈາກນັ້ນ ເທື່ອ​ແລ້ວ​ນີ້​ເຮົາ​ໄດ້​ລົມ​ກັນ​ວ່າ​ຫຼາຍ​ຮ້ອຍ​ປີ​ຕໍ່​ມາ​ເຊິ່ງ​ກໍ​ຄື​ຕອນ​ທີ່​ພະ​ເຢຊູ​ຢູ່​ເທິງ​ໂລກ ເພິ່ນ​ເອງ​ກໍ​ບອກ​ວ່າ​ເຈັດ​ວາລະ​ຍັງ​ບໍ່​ສິ້ນ​ສຸດ.

ຈອນ: ໂອ້ ຂ້ອຍ​ຈື່​ໄດ້​ແລ້ວ.

ຄາເມຣອນ: ແທນ​ທີ່​ຈະ​ເປັນ​ປີ​ຕາມ​ໂຕ​ອັກສອນ ເຈັດ​ວາລະ​ກໍ​ຕ້ອງ​ໝາຍເຖິງ​ໄລຍະ​ເວລາ​ທີ່​ດົນ​ກວ່າ​ນັ້ນ.

ຈອນ: ແລ້ວ​ດົນ​ປານ​ໃດ?

ຄາເມຣອນ: ໃນ​ປຶ້ມ​ພະ​ນິມິດ​ເຊິ່ງ​ກ່ຽວ​ຂ້ອງ​ກັນ​ຫຼາຍ​ກັບ​ປຶ້ມ​ດານີເອນ​ຊ່ວຍ​ໃຫ້​ເຮົາ​ຮູ້​ວ່າ​ເຈັດ​ວາລະ​ນັ້ນ​ດົນ​ສ່ຳ​ໃດ. ໃນ​ປຶ້ມ​ພະ​ນິມິດ​ບອກ​ວ່າ​ສາມ​ວາລະ​ເຄິ່ງ​ເທົ່າ​ກັບ 1.260 ມື້. d ດັ່ງນັ້ນ ເຈັດ​ວາລະ​ກໍ​ຄື​ສອງ​ເທົ່າ​ຂອງ​ສາມ​ວາລະ​ເຄິ່ງ​ເຊິ່ງ​ກໍ​ຄື 2.520 ມື້. ເຈົ້າ​ນຳ​ທັນ​ບໍ?

ຈອນ: ທັນ​ຢູ່. ແຕ່​ນີ້​ບໍ່​ໄດ້​ບອກ​ວ່າ​ການ​ປົກຄອງ​ຂອງ​ພະເຈົ້າ​ເລີ່ມ​ປົກຄອງ​ໃນ​ປີ 1914.

ຄາເມຣອນ: ໂອເຄ. ໃຫ້​ເຮົາ​ມາ​ເບິ່ງ​ນຳ​ກັນ​ວ່າ​ເລື່ອງ​ນີ້​ກ່ຽວ​ຂ້ອງ​ກັນ​ແນວ​ໃດ. ບາງ​ເທື່ອ​ຄຳ​ພະຍາກອນ​ໃນ​ຄຳພີ​ໄບເບິນ 1 ມື້​ໝາຍເຖິງ 1 ປີ. e ຖ້າ​ເຮົາ​ເຮັດ​ຕາມ​ຫຼັກ​ທີ່​ວ່າ​ໃຫ້​ເອົາ​ມື້​ແທນ​ປີ ເຈັດ​ວາລະ​ກໍ​ຕ້ອງ​ເທົ່າ​ກັບ 2.520 ປີ. ເມື່ອ​ນັບ​ຈາກ​ປີ 607 ກ່ອນ ຄ.ສ ໄປ​ຈົນ​ຄົບ 2.520 ປີ ກໍ​ຈະ​ມາ​ຮອດ​ປີ ຄ.ສ 1914 ພໍ​ດີ. f ນີ້​ເຮັດ​ໃຫ້​ເຮົາ​ຮູ້​ວ່າ​ເຈັດ​ວາລະ​ສິ້ນ​ສຸດ​ໃນ​ປີ 1914 ເຊິ່ງ​ເປັນ​ປີ​ທີ່​ພະ​ເຢຊູ​ເລີ່ມ​ປົກຄອງ​ເປັນ​ກະສັດ​ໃນ​ການ​ປົກຄອງ​ຂອງ​ພະເຈົ້າ ແລະ​ຕັ້ງແຕ່​ປີ 1914 ເປັນ​ຕົ້ນ​ມາ​ໄດ້​ເກີດ​ເຫດການ​ສຳຄັນ​ຕ່າງ​ໆ​ໃນ​ໂລກ ເຊິ່ງ​ເປັນ​ເຫດການ​ສຳຄັນ​ທີ່​ຄຳພີ​ໄບເບິນ​ບອກ​ລ່ວງ​ໜ້າ​ໄວ້​ວ່າ​ຈະ​ເກີດຂຶ້ນ​ໃນ​ສະໄໝ​ສຸດທ້າຍ.

ຈອນ: ເຫດການ​ຫຍັງ?

ຄາເມຣອນ: ໃນ​ປຶ້ມ​ມັດທາຍ 24:7 ພະ​ເຢຊູ​ບອກ​ວ່າ​ຕອນ​ທີ່​ເພິ່ນ​ເລີ່ມ​ປົກຄອງ​ໃນ​ສະຫວັນ “ຈະ​ມີ​ການ​ສູ້ຮົບ​ກັນ​ລະຫວ່າງ​ປະເທດ​ຕໍ່​ປະເທດ​ແລະ​ອານາຈັກ​ຕໍ່​ອານາຈັກ ຈະ​ເກີດ​ການ​ຂາດແຄນ​ອາຫານ​ຫຼາຍ​ແຫ່ງ ແລະ​ຈະ​ເກີດ​ແຜ່ນດິນ​ໄຫວ​ໃນ​ບ່ອນ​ຕ່າງ​ໆ.” ຈາກ​ຂໍ້​ນີ້​ພະ​ເຢຊູ​ບອກ​ລ່ວງ​ໜ້າ​ວ່າ​ຈະ​ເກີດ​ການ​ຂາດແຄນ​ອາຫານ ຈະ​ເກີດ​ແຜ່ນດິນ​ໄຫວ ເຮົາ​ເຫັນ​ເຫດການ​ເຫຼົ່າ​ນີ້​ແຈ້ງ​ຂຶ້ນ​ໃນ​ຊ່ວງ​ຮ້ອຍ​ປີ​ທີ່​ຜ່ານ​ມາ. ເຈົ້າ​ວ່າ​ແມ່ນ​ແທ້​ບໍ?

ຈອນ: ແມ່ນ​ແທ້​ເນາະ.

ຄາເມຣອນ: ໃນ​ຂໍ້​ນີ້ ພະ​ເຢຊູ​ບອກ​ລ່ວງ​ໜ້າ​ວ່າ​ຈະ​ເກີດ​ສົງຄາມ​ໃນ​ຊ່ວງ​ທີ່​ເພິ່ນ​ຂຶ້ນ​ເປັນ​ກະສັດ ແລະ​ປຶ້ມ​ພະ​ນິມິດ​ບອກ​ວ່າ ສົງຄາມ​ນີ້​ບໍ່​ແມ່ນ​ສົງຄາມ​ນ້ອຍ​ໆ​ແຕ່​ຈະ​ເປັນ​ສົງຄາມ​ທີ່​ສົ່ງ​ຜົນ​ກະທົບ​ທົ່ວ​ໂລກ ເຊິ່ງ​ຈະ​ເກີດຂຶ້ນ​ໃນ​ຊ່ວງ​ສະໄໝ​ສຸດທ້າຍ. g ເຈົ້າ​ຈື່​ໄດ້​ບໍ​ວ່າ​ສົງຄາມ​ໂລກ​ຄັ້ງ​ທີ 1 ເກີດຂຶ້ນ​ປີ​ໃດ?

ຈອນ: ປີ 1914 ເປັນ​ປີ​ດຽວ​ກັນ​ທີ່​ເຈົ້າ​ບອກ​ວ່າ​ພະ​ເຢຊູ​ເລີ່ມ​ປົກຄອງ​ແມ່ນ​ບໍ ຂ້ອຍ​ບໍ່​ເຄີຍ​ຄິດ​ເລີຍ​ວ່າ​ເລື່ອງ​ນີ້​ຈະ​ກ່ຽວ​ຂ້ອງ​ກັນ.

ຄາເມຣອນ: ເມື່ອ​ເຮົາ​ເຊື່ອມ​ໂຍງ​ຄຳ​ພະຍາກອນ​ເຫຼົ່າ​ນີ້​ເຂົ້າ​ນຳ​ກັນ ຄຳ​ພະຍາກອນ​ກ່ຽວກັບ​ເຈັດ​ວາລະ​ກັບ​ຄຳ​ພະຍາກອນ​ອື່ນ​ໆ​ເລື່ອງ​ສະໄໝ​ສຸດທ້າຍ​ມັນ​ກໍ​ສອດ​ຄ່ອງ​ກັນ​ແທ້​ໆ. ພະຍານ​ພະ​ເຢໂຫວາ​ໝັ້ນໃຈ​ວ່າ​ພະ​ເຢຊູ​ເລີ່ມ​ປົກຄອງ​ເປັນ​ກະສັດ​ໃນ​ການ​ປົກຄອງ​ຂອງ​ພະເຈົ້າ​ປີ​1914 ແລະ​ສະໄໝ​ສຸດທ້າຍ​ເລີ່ມ​ຕົ້ນ​ໃນ​ປີ​ນັ້ນ. h

ຈອນ: ຂ້ອຍ​ຄື​ຊິ​ໄດ້​ໃຊ້​ເວລາ​ເພື່ອ​ເຂົ້າໃຈ​ເລື່ອງ​ທັງໝົດ​ນີ້.

ຄາເມຣອນ: ຂ້ອຍ​ເຂົ້າໃຈ​ເຈົ້າ. ຂ້ອຍ​ເຄີຍ​ບອກ​ເຈົ້າ​ວ່າ ຂ້ອຍ​ເອງ​ກໍ​ຕ້ອງ​ໃຊ້​ເວລາ​ຄື​ກັນ​ກວ່າ​ຈະ​ເຂົ້າໃຈ​ເລື່ອງ​ທັງໝົດ​ນີ້. ແຕ່​ຂ້ອຍ​ກໍ​ຫວັງ​ວ່າ​ເລື່ອງ​ທີ່​ເຮົາ​ໄດ້​ລົມ​ກັນ​ມື້​ນີ້​ຈະ​ຊ່ວຍ​ໃຫ້​ເຈົ້າ​ເຫັນ​ວ່າ ເຖິງ​ຄຳພີ​ໄບເບິນ​ບໍ່​ໄດ້​ບອກ​ເຈາະຈົງ​ກ່ຽວກັບ​ປີ 1914 ແຕ່​ທີ່​ພະຍານ​ພະ​ເຢໂຫວາ​ເຊື່ອ​ແບບ​ນີ້​ກໍ​ອາໄສ​ຫຼັກຖານ​ຈາກ​ຄຳພີ​ໄບເບິນ.

ຈອນ: ໂດຍ. ຂ້ອຍ​ມັກ​ທີ່​ເຈົ້າ​ໃຊ້​ພະຄຳພີ​ສະເໝີ​ຕອນ​ທີ່​ອະທິບາຍ​ຄວາມ​ເຊື່ອ​ຂອງ​ເຈົ້າ. ບໍ່​ມີ​ຕອນ​ໃດ​ທີ່​ເຈົ້າ​ຄິດ​ເອົາ​ເອງ ແຕ່​ຂ້ອຍ​ສົງໄສ​ວ່າ​ເປັນ​ຫຍັງ​ພະເຈົ້າ​ຄື​ບໍ່​ບອກ​ກົງ​ໆ​ໃນ​ຄຳພີ​ໄບເບິນ​ເລີຍ​ວ່າ​ປີ 1914 ຈະ​ເປັນ​ປີ​ທີ່​ພະ​ເຢຊູ​ເລີ່ມ​ປົກຄອງ​ໃນ​ສະຫວັນ?

ຄາເມຣອນ: ເປັນ​ຄຳ​ຖາມ​ທີ່​ດີ​ຫຼາຍ. ທີ່ຈິງ​ມີ​ຫຼາຍ​ເລື່ອງ​ທີ່​ຄຳພີ​ໄບເບິນ​ບໍ່​ໄດ້​ບອກ​ຊັດເຈນ ແຕ່​ເປັນ​ຫຍັງ​ພະເຈົ້າ​ໃຫ້​ຄົນ​ຂຽນ​ຄຳພີ​ໄບເບິນ​ໃນ​ແບບ​ທີ່​ຄົນ​ອ່ານ​ຈະ​ຕ້ອງ​ພະຍາຍາມ​ເຂົ້າໃຈ. ດຽວ​ເລື່ອງ​ນີ້​ເຮົາ​ຈະ​ລົມ​ກັນ​ໃນ​ເທື່ອ​ໜ້າ​ດີ​ບໍ.

ຈອນ: ໄດ້.