ເຈົ້າຮູ້ບໍ?
ເພງສຳຄັນຫຼາຍສ່ຳໃດສຳລັບຄົນອິດສະຣາເອນໃນສະໄໝບູຮານ?
ຄົນອິດສະຣາເອນໃນສະໄໝບູຮານມັກເພງຫຼາຍ. ຄຳພີໄບເບິນເວົ້າເຖິງບາງຄົນທີ່ຫຼິ້ນດົນຕີແລະບາງຄົນທີ່ຮ້ອງເພງ. ທີ່ຈິງ ປຶ້ມຫຼາຍຫົວໃນຄຳພີໄບເບິນເປັນເພງ. ຕົວຢ່າງເຊັ່ນ: ປຶ້ມເພງສັນລະເສີນ ປຶ້ມເພງຂອງໂຊໂລໂມນ ແລະປຶ້ມເພງໂສກເສົ້າ. ປຶ້ມກ່ຽວກັບເພງໃນສະໄໝທີ່ຂຽນຄຳພີໄບເບິນເວົ້າວ່າ ເພງມີສ່ວນສຳຄັນຫຼາຍໃນຊີວິດປະຈຳວັນຂອງຄົນອິດສະຣາເອນບູຮານ.
ເພງໃນຊີວິດປະຈຳວັນ. ຄົນອິດສະຣາເອນຫຼິ້ນເຄື່ອງດົນຕີແລະຮ້ອງເພງເພື່ອສະແດງເຖິງອາລົມຄວາມຮູ້ສຶກ. (ອຊຢ. 30:29) ພວກຜູ້ຍິງຕີກອງແທມບູຣິນ ເຕັ້ນແລະຮ້ອງເພງຢ່າງມີຄວາມສຸກໃນການສະຫຼອງຕ່າງໆເຊັ່ນ: ຕອນທີ່ກະສັດຂຶ້ນປົກຄອງ ທະຫານອິດສະຣາເອນຕໍ່ສູ້ຊະນະ ແລະໃນເທດສະການຕ່າງໆ. (ຜຕສ. 11:34; 1ຊມ. 18:6, 7; 1ກສ. 1:39, 40) ຄົນອິດສະຣາເອນຍັງຮ້ອງເພງໄວ້ທຸກນຳເພື່ອສະແດງຄວາມໂສກເສົ້າຕອນທີ່ຄົນຕາຍ. (2ຂຄ. 35:25) ເຫັນໄດ້ແຈ້ງວ່າຄົນອິດສະຣາເອນມັກເພງຫຼາຍ.
ເພງໃນວັງຂອງກະສັດ. ກະສັດຂອງອິດສະຣາເອນມັກດົນຕີຫຼາຍ. ຕົວຢ່າງເຊັ່ນ: ກະສັດຊາອູນເອີ້ນດາວິດມາວັງເພື່ອດີດພິນໃຫ້ລາວຟັງ. (1ຊມ. 16:18, 23) ຕໍ່ມາ ເມື່ອດາວິດໄດ້ເປັນກະສັດ ລາວໄດ້ເຮັດເຄື່ອງດົນຕີ ແຕ່ງເພງທີ່ມ່ວນໆ ແລະຕັ້ງວົງດົນຕີກັບນັກຮ້ອງເພື່ອໃຫ້ຫຼິ້ນດົນຕີແລະຮ້ອງເພງຢູ່ວິຫານຂອງພະເຢໂຫວາ. (2ຂຄ. 7:6; ອມ. 6:5) ກະສັດໂຊໂລໂມນມີນັກຮ້ອງທັງຜູ້ຍິງແລະຜູ້ຊາຍຢູ່ໃນວັງຂອງລາວ.—ປຍຈ. 2:8
ເພງໃນການນະມັດສະການ. ວິທີທີ່ສຳຄັນວິທີໜຶ່ງທີ່ຄົນອິດສະຣາເອນໃຊ້ໃນການນະມັດສະການພະເຢໂຫວາແມ່ນການຮ້ອງເພງແລະຫຼິ້ນເຄື່ອງດົນຕີ. ທີ່ຈິງ ມີນັກດົນຕີ 4.000 ຄົນຢູ່ວິຫານໃນເມືອງເຢຣູຊາເລັມ. (1ຂຄ. 23:5) ເຂົາເຈົ້າຕີແສ່ງ ຫຼິ້ນເຄື່ອງດົນຕີທີ່ມີສາຍ ດີດພິນ ແລະເປົ່າແກ. (2ຂຄ. 5:12) ບໍ່ແມ່ນແຕ່ນັກດົນຕີເຫຼົ່ານີ້ເທົ່ານັ້ນທີ່ນະມັດສະການພະເຢໂຫວາໂດຍໃຊ້ດົນຕີ ຄົນອິດສະຣາເອນຫຼາຍຄົນຮ້ອງເພງຕອນທີ່ເຂົາເຈົ້າເດີນທາງໄປເມືອງເຢຣູຊາເລັມເພື່ອສະຫຼອງເທດສະການຕ່າງໆຢູ່ຫັ້ນ. ເພງທີ່ເຂົາເຈົ້າຮ້ອງຊື່ວ່າເພງສຳລັບຍ່າງຂຶ້ນ. (ພສ. 120–134) ນອກຈາກນັ້ນ ຕາມທີ່ບອກໄວ້ໃນບົດຂຽນຂອງຄົນຢິວ ຄົນອິດສະຣາເອນຍັງຮ້ອງເພງຮາເລ aໃນໄລຍະເທດສະການປັດສະຄາ.
ໃນທຸກມື້ນີ້ ເພງກໍຍັງເປັນສິ່ງທີ່ສຳຄັນສຳລັບປະຊາຊົນຂອງພະເຢໂຫວາ. (ຢກບ. 5:13) ເຮົາຮ້ອງເພງເພື່ອນະມັດສະການພະເຢໂຫວາ. (ອຟຊ. 5:19) ເພງເຮັດໃຫ້ເຮົາເປັນອັນໜຶ່ງອັນດຽວກັບພີ່ນ້ອງຢູ່ທົ່ວໂລກ. (ກລຊ. 3:16) ເພງເຮັດໃຫ້ເຮົາເຂັ້ມແຂງເມື່ອເຈິກັບຄວາມຍາກລຳບາກ. (ກຈກ. 16:25) ການຮ້ອງເພງເປັນວິທີທີ່ດີຫຼາຍທີ່ສະແດງວ່າເຮົາມີຄວາມເຊື່ອແລະຮັກພະເຢໂຫວາ.
a ຄົນອິດສະຣາເອນເອີ້ນເພງສັນລະເສີນບົດ 113 ຫາ 118 ວ່າເພງຮາເລເຊິ່ງເປັນເພງສັນລະເສີນພະເຢໂຫວາ.
