ບົດຄວາມສຶກສາທີ 41
ເພງທີ 13 ພະຄລິດເປັນແບບຢ່າງຂອງເຮົາ
ຮຽນແບບຕົວຢ່າງຂອງພະເຢຊູໃນໄລຍະ 40 ມື້ສຸດທ້າຍທີ່ເພິ່ນຢູ່ໃນໂລກນີ້
“ເພິ່ນມາໃຫ້ເຂົາເຈົ້າເຫັນຫຼາຍເທື່ອຕະຫຼອດ 40 ມື້ ແລະເວົ້າກັບເຂົາເຈົ້າເລື່ອງການປົກຄອງຂອງພະເຈົ້າ.”—ກຈກ. 1:3
ຈຸດສຳຄັນ
ເຮົາຈະຮຽນແບບຕົວຢ່າງຂອງພະເຢຊູແນວໃດໃນສິ່ງທີ່ເພິ່ນເຮັດໃນໄລຍະ 40 ມື້ສຸດທ້າຍທີ່ເພິ່ນຢູ່ໂລກນີ້.
1-2. ເກີດຫຍັງຂຶ້ນຕອນທີ່ລູກສິດ 2 ຄົນຂອງພະເຢຊູເດີນທາງໄປບ້ານເອມມາອຸດ?
ໃນວັນທີ 16 ເດືອນນີຊານ ປີ 33 ພວກລູກສິດຂອງພະເຢຊູໂສກເສົ້າເສຍໃຈແລະຢ້ານ. ລູກສິດ 2 ຄົນຂອງເພິ່ນໄດ້ເດີນທາງໄປບ້ານເອມມາອຸດທີ່ຢູ່ໄກຈາກເມືອງເຢຣູຊາເລັມປະມານ 11 ກິໂລແມັດ. ສອງຄົນນີ້ທໍ້ໃຈຫຼາຍຍ້ອນພະເຢຊູຜູ້ທີ່ເຂົາເຈົ້າໄດ້ຕິດຕາມຫາກໍຕາຍ. ເຂົາເຈົ້າເຄີຍຫວັງໄວ້ວ່າເມຊີອາຈະເຮັດສິ່ງດີໆເພື່ອຄົນຢິວ ແຕ່ຕອນນີ້ເພິ່ນພັດຕາຍຊ້ຳ. ແຕ່ອີກຈັກໜ້ອຍຈະມີສິ່ງທີ່ບໍ່ຄາດຄິດເກີດຂຶ້ນ ແລະຄວາມຮູ້ສຶກຂອງເຂົາເຈົ້າກຳລັງຈະປ່ຽນໄປ.
2 ມີຜູ້ຊາຍແປກໜ້າຄົນໜຶ່ງເຂົ້າມາລົມກັບລູກສິດ 2 ຄົນນີ້ແລ້ວກໍຍ່າງໄປນຳກັນກັບເຂົາເຈົ້າ. ສອງຄົນນີ້ເລົ່າໃຫ້ຜູ້ຊາຍຄົນນັ້ນຟັງກ່ຽວກັບສິ່ງທີ່ເກີດຂຶ້ນກັບພະເຢຊູ ແລ້ວຜູ້ຊາຍຄົນນັ້ນກໍເລີ່ມເວົ້າໃນສິ່ງທີ່ເຂົາເຈົ້າຈະບໍ່ມີວັນລືມ. ລາວເວົ້າເຖິງຄຳພະຍາກອນຕ່າງໆໃນຄຳພີໄບເບິນທີ່ບອກວ່າເປັນຫຍັງເມຊີອາຕ້ອງທົນທຸກທໍລະມານແລະຕາຍ. ເມື່ອທັງສາມຄົນໄປຮອດບ້ານເອມມາອຸດ ລູກສິດ 2 ຄົນຈຶ່ງຮູ້ວ່າຜູ້ຊາຍຄົນນັ້ນແມ່ນພະເຢຊູຜູ້ທີ່ຖືກປຸກໃຫ້ຄືນມາຈາກຕາຍ! ເຂົາເຈົ້າດີໃຈຫຼາຍຍ້ອນເມຊີອາມີຊີວິດແລ້ວ.—ລກ. 24:13-35
3-4. ພະເຢຊູຊ່ວຍພວກລູກສິດຂອງເພິ່ນແນວໃດ ແລະຜົນເປັນຈັ່ງໃດ? ແລະເຮົາຈະຮຽນຫຍັງໃນບົດນີ້? (ກິດຈະການ 1:3)
3 ພະເຢຊູມາປາກົດໂຕໃຫ້ພວກລູກສິດຂອງເພິ່ນເຫັນຫຼາຍເທື່ອຕະຫຼອດ 40 ມື້ກ່ອນທີ່ເພິ່ນຈະກັບໄປສະຫວັນ. a (ອ່ານກິດຈະການ 1:3) ໃນໄລຍະນັ້ນ ພະເຢຊູໃຫ້ກຳລັງໃຈພວກລູກສິດຂອງເພິ່ນທີ່ກຳລັງໂສກເສົ້າເສຍໃຈແລະຢ້ານ ເຊິ່ງການເຮັດແບບນີ້ເຮັດໃຫ້ເຂົາເຈົ້າມີຄວາມສຸກຫຼາຍແລະກ້າທີ່ຈະປະກາດແລະສອນຂ່າວດີເລື່ອງການປົກຄອງຂອງພະເຈົ້າ.
4 ເຮົາຈະໄດ້ຮັບປະໂຫຍດຫຼາຍຈາກການຮຽນຮູ້ກ່ຽວກັບສິ່ງທີ່ພະເຢຊູເຮັດໃນໄລຍະ 40 ມື້ນັ້ນ. ໃນບົດນີ້ ເຮົາຈະເບິ່ງວ່າພະເຢຊູໃຊ້ເວລາຂອງເພິ່ນແນວໃດເພື່ອ (1) ໃຫ້ກຳລັງໃຈພວກລູກສິດ (2) ຊ່ວຍເຂົາເຈົ້າໃຫ້ເຂົ້າໃຈຄຳພີໄບເບິນຫຼາຍຂຶ້ນ ແລະ (3) ຝຶກເຂົາເຈົ້າສຳລັບວຽກທີ່ເຂົາເຈົ້າຈະຕ້ອງເຮັດໃນອະນາຄົດ. ໃນແຕ່ລະຈຸດເຮົາຈະເບິ່ງວ່າເຮົາຈະຮຽນແບບພະເຢຊູໄດ້ແນວໃດ.
ໃຫ້ກຳລັງໃຈຄົນອື່ນ
5. ເປັນຫຍັງລູກສິດຂອງພະເຢຊູຈຶ່ງຕ້ອງການກຳລັງໃຈ?
5 ພວກລູກສິດຂອງພະເຢຊູຕ້ອງການກຳລັງໃຈແທ້ໆ. ຍ້ອນຫຍັງ? ຍ້ອນວ່າບາງຄົນໄດ້ປະຖິ້ມເຮືອນຊານ ຄອບຄົວ ແລະທຸລະກິດເພື່ອຕິດຕາມເພິ່ນ. (ມທ. 19:27) ບາງຄົນຖືກປະຕິບັດແບບບໍ່ຍຸຕິທຳຍ້ອນເຂົ້າມາເປັນລູກສິດຂອງພະເຢຊູ. (ຢຮ. 9:22) ເຂົາເຈົ້າເຕັມໃຈເສຍສະລະແລະຍອມເຈິກັບຄວາມຍາກລຳບາກຍ້ອນເຂົາເຈົ້າເຊື່ອວ່າພະເຢຊູເປັນເມຊີອາຕາມທີ່ພະເຈົ້າສັນຍາໄວ້. (ມທ. 16:16) ແຕ່ເມື່ອພະເຢຊູຖືກຂ້າ ຄວາມຫວັງຂອງເຂົາເຈົ້າກໍພັງທະລາຍ ແລະເຂົາເຈົ້າກໍທໍ້ໃຈຫຼາຍ.
6. ຫຼັງຈາກພະເຢຊູຄືນມາຈາກຕາຍ ເພິ່ນໄດ້ເຮັດຫຍັງ?
6 ພະເຢຊູເຂົ້າໃຈວ່າເປັນເລື່ອງປົກກະຕິທີ່ພວກລູກສິດຈະໂສກເສົ້າເສຍໃຈທີ່ເພິ່ນຕາຍ ແລະເພິ່ນກໍຮູ້ວ່າເຫດຜົນທີ່ເຂົາເຈົ້າຮູ້ສຶກແບບນັ້ນບໍ່ແມ່ນຍ້ອນຂາດຄວາມເຊື່ອ. ດັ່ງນັ້ນ ໃນມື້ທີ່ພະເຢຊູຖືກປຸກໃຫ້ຄືນມາຈາກຕາຍ ເພິ່ນໄດ້ໃຫ້ກຳລັງໃຈເຂົາເຈົ້າ. ຕົວຢ່າງເຊັ່ນ: ພະເຢຊູໃຫ້ມາຣິອາຄົນມັກດາເລນເຫັນເພິ່ນຕອນທີ່ລາວຮ້ອງໄຫ້ຢູ່ບ່ອນຝັງສົບຂອງເພິ່ນ. (ຢຮ. 20:11, 16) ພະເຢຊູຍັງໄປຫາລູກສິດ 2 ຄົນທີ່ເດີນທາງໄປບ້ານເອມມາອຸດ. ນອກຈາກນັ້ນ ເພິ່ນຍັງມາໃຫ້ເປໂຕເຫັນ. (ລກ. 24:34) ເຮົາຮຽນຫຍັງຈາກຕົວຢ່າງຂອງພະເຢຊູ? ໃຫ້ເຮົາເບິ່ງວ່າເກີດຫຍັງຂຶ້ນຕອນທີ່ເພິ່ນມາຫາມາຣິອາຄົນມັກດາເລນ.
7. ພະເຢຊູເຫັນມາຣິອາກຳລັງເຮັດຫຍັງ ແລະເພິ່ນໄດ້ເຮັດຫຍັງເພື່ອລາວ? (ໂຢຮັນ 20:11-16) (ເບິ່ງຮູບນຳ)
7 ອ່ານໂຢຮັນ 20:11-16. ໃນຕອນເຊົ້າໆຂອງວັນທີ 16 ເດືອນນີຊານ ຜູ້ຍິງບາງຄົນໄດ້ໄປບ່ອນຝັງສົບຂອງພະເຢຊູ. (ລກ. 24:1, 10) ໃຫ້ເຮົາເບິ່ງສິ່ງທີ່ເກີດຂຶ້ນກັບມາຣິອາຄົນມັກດາເລນເຊິ່ງເປັນຜູ້ຍິງຄົນໜຶ່ງໃນນັ້ນ. ຕອນທີ່ມາຣິອາໄປຮອດບ່ອນຝັງສົບ ສົບຂອງພະເຢຊູບໍ່ໄດ້ຢູ່ຫັ້ນ. ລາວຈຶ່ງຟ້າວແລ່ນໄປບອກເປໂຕກັບໂຢຮັນ ສອງຄົນນີ້ຈຶ່ງແລ່ນໄປບ່ອນຝັງສົບແລະມາຣິອາກໍແລ່ນນຳຫຼັງເຂົາເຈົ້າໄປ. ເມື່ອເປໂຕກັບໂຢຮັນບໍ່ເຫັນສົບຂອງພະເຢຊູ ເຂົາເຈົ້າກໍກັບເມືອເຮືອນ ແຕ່ມາຣິອາຍັງຢູ່ຫັ້ນຕໍ່ແລະຮ້ອງໄຫ້. ມາຣິອາບໍ່ຮູ້ວ່າພະເຢຊູຢູ່ຫັ້ນແລະກຳລັງເບິ່ງລາວ. ພະເຢຊູເຫັນມາຣິອາກຳລັງຮ້ອງໄຫ້ເສຍໃຈ ເພິ່ນຈຶ່ງຢາກປອບໃຈລາວ. ດັ່ງນັ້ນ ພະເຢຊູຈຶ່ງໃຫ້ມາຣິອາເຫັນ ແລ້ວເພິ່ນກໍເຮັດບາງຢ່າງທີ່ໃຫ້ກຳລັງໃຈລາວຫຼາຍ. ພະເຢຊູເວົ້າກັບລາວແລະມອບໝາຍວຽກສຳຄັນໃຫ້ລາວເຮັດ ນັ້ນແມ່ນໃຫ້ລາວໄປບອກພວກລູກສິດຄົນອື່ນວ່າເພິ່ນຄືນມາຈາກຕາຍແລ້ວ.—ຢຮ. 20:17, 18
ຮຽນແບບພະເຢຊູໂດຍສັງເກດເບິ່ງແລະເຫັນອົກເຫັນໃຈຄົນທີ່ກຳລັງທໍ້ໃຈ (ເບິ່ງຂໍ້ 7)
8. ເຮົາຈະຮຽນແບບພະເຢຊູໄດ້ແນວໃດ?
8 ເຮົາຈະຮຽນແບບພະເຢຊູໄດ້ແນວໃດ? ເຮົາສາມາດຮຽນແບບພະເຢຊູໄດ້ໂດຍສັງເກດເບິ່ງວ່າຄົນອື່ນກຳລັງເຈິບັນຫາຫຍັງຢູ່ແລະເວົ້າໃຫ້ກຳລັງໃຈເຂົາເຈົ້າດ້ວຍຄວາມເຫັນອົກເຫັນໃຈ. ຖ້າເຮົາເຮັດແບບນັ້ນ ເຮົາກໍຈະຊ່ວຍພີ່ນ້ອງໃຫ້ມີແຮງທີ່ຈະຮັບໃຊ້ພະເຢໂຫວາຕໍ່ໆໄປໄດ້. ໃຫ້ເຮົາເບິ່ງປະສົບການຂອງພີ່ນ້ອງຍິງຊື່ໂຈເຊລິນທີ່ນ້ອງສາວຂອງລາວຕາຍຍ້ອນອຸບັດຕິເຫດ. ລາວເວົ້າວ່າ: “ຂ້ອຍໂສກເສົ້າຢູ່ຫຼາຍເດືອນ.” ພີ່ນ້ອງຜົວເມຍຄູ່ໜຶ່ງທີ່ຮູ້ວ່າໂຈເຊລິນຮູ້ສຶກແນວໃດໄດ້ຊວນລາວໄປເຮືອນເຂົາເຈົ້າແລ້ວກໍຕັ້ງໃຈຟັງດ້ວຍຄວາມເຫັນອົກເຫັນໃຈຕອນທີ່ລາວລະບາຍຄວາມຮູ້ສຶກອອກມາ. ເຂົາເຈົ້າຊ່ວຍລາວໃຫ້ໝັ້ນໃຈວ່າລາວມີຄ່າຫຼາຍຕໍ່ພະເຢໂຫວາ. ໂຈເຊລິນເວົ້າຕື່ມອີກວ່າ: “ຂ້ອຍຮູ້ສຶກຄືກັບວ່າພະເຢໂຫວາໃຊ້ພີ່ນ້ອງຄູ່ນີ້ໃຫ້ຊ່ວຍຂ້ອຍອອກມາຈາກທະເລທີ່ປັ່ນປ່ວນໃນມື້ທີ່ມືດຄຶ້ມແລະໃຫ້ມາຢູ່ໃນເຮືອຊູຊີບທີ່ປອດໄພ. ເຂົາເຈົ້າຊ່ວຍຂ້ອຍໃຫ້ມີແຮງທີ່ຈະຮັບໃຊ້ພະເຢໂຫວາອີກ.” ເຮົາກໍໃຫ້ກຳລັງໃຈຄົນອື່ນໄດ້ຄືກັນໂດຍຕັ້ງໃຈຟັງເຂົາເຈົ້າລະບາຍຄວາມຮູ້ສຶກແລະເວົ້າກັບເຂົາເຈົ້າດ້ວຍຄວາມເຫັນອົກເຫັນໃຈໂດຍມີເປົ້າໝາຍທີ່ຈະຊ່ວຍເຂົາເຈົ້າໃຫ້ຮັບໃຊ້ພະເຢໂຫວາຕໍ່ໆໄປ.—ຣມ. 12:15
ຊ່ວຍຄົນອື່ນໃຫ້ຮູ້ວິທີຫາເຫດຜົນຈາກຄຳພີໄບເບິນ
9. ລູກສິດຂອງພະເຢຊູເຈິຂໍ້ທ້າທາຍຫຍັງ ແລະພະເຢຊູຊ່ວຍເຂົາເຈົ້າແນວໃດ?
9 ລູກສິດຂອງພະເຢຊູເຊື່ອໃນຄຳສອນຂອງພະເຈົ້າແລະພະຍາຍາມເຕັມທີທີ່ຈະເອົາສິ່ງທີ່ໄດ້ຮຽນມາໃຊ້ໃນຊີວິດ. (ຢຮ. 17:6) ເຖິງຈະເປັນແນວນັ້ນ ເຂົາເຈົ້າກໍຍັງບໍ່ເຂົ້າໃຈວ່າເປັນຫຍັງພະເຢຊູຈຶ່ງຕ້ອງຕາຍຢູ່ເທິງເສົາທໍລະມານໃນຖານະຜູ້ທີ່ເຮັດຜິດຮ້າຍແຮງ. ພະເຢຊູຮູ້ວ່າການທີ່ເຂົາເຈົ້າສົງໄສແບບນີ້ບໍ່ແມ່ນຍ້ອນເຂົາເຈົ້າມີຫົວໃຈທີ່ບໍ່ດີ ແຕ່ຍ້ອນເຂົາເຈົ້າຍັງບໍ່ເຂົ້າໃຈເຕັມທີ. (ລກ. 9:44, 45; ຢຮ. 20:9) ດັ່ງນັ້ນ ເພິ່ນຈຶ່ງສອນເຂົາເຈົ້າໃຫ້ຫາເຫດຜົນຈາກພະຄຳພີ. ໃຫ້ເຮົາມາເບິ່ງວ່າເພິ່ນເຮັດແບບນັ້ນແນວໃດກັບລູກສິດ 2 ຄົນຕອນທີ່ເດີນທາງໄປບ້ານເອມມາອຸດ.
10. ພະເຢຊູຊ່ວຍລູກສິດຂອງເພິ່ນແນວໃດໃຫ້ໝັ້ນໃຈວ່າເພິ່ນເປັນເມຊີອາແທ້ໆ? (ລູກາ 24:18-27)
10 ອ່ານລູກາ 24:18-27. ຂໍໃຫ້ສັງເກດວ່າພະເຢຊູບໍ່ໄດ້ບອກລູກສິດ 2 ຄົນນັ້ນທັນທີວ່າເພິ່ນແມ່ນໃຜ ແຕ່ເພິ່ນໃຊ້ຄຳຖາມເພື່ອຖາມເຂົາເຈົ້າ. ຍ້ອນຫຍັງ? ອາດເປັນໄປໄດ້ວ່າເພິ່ນຢາກໃຫ້ເຂົາເຈົ້າເລົ່າຄວາມຮູ້ສຶກທີ່ຢູ່ໃນໃຈອອກມາ ແລະເຂົາເຈົ້າກໍເຮັດແບບນັ້ນແທ້ໆ. ເຂົາເຈົ້າບອກເພິ່ນວ່າ ເຂົາເຈົ້າຫວັງໄວ້ວ່າເມຊີອາຈະມາປົດປ່ອຍຄົນອິດສະຣາເອນໃຫ້ເປັນອິດສະຫຼະຈາກການກົດຂີ່ຂອງພວກໂຣມ. ຫຼັງຈາກເຂົາເຈົ້າເວົ້າສິ່ງທີ່ກັງວົນອອກມາໝົດແລ້ວ ພະເຢຊູກໍໃຊ້ພະຄຳພີເພື່ອຊ່ວຍເຂົາເຈົ້າໃຫ້ເຂົ້າໃຈຄຳພະຍາກອນຕ່າງໆທີ່ເກີດຂຶ້ນແທ້. b ໃນຕອນແລງຂອງມື້ດຽວກັນນັ້ນ ພະເຢຊູກໍໄດ້ໃຊ້ເວລາອະທິບາຍເພື່ອຊ່ວຍພວກລູກສິດຂອງເພິ່ນໃຫ້ໝັ້ນໃຈໃນຄຳພະຍາກອນເຫຼົ່ານີ້. (ລກ. 24:33-48) ເຮົາຮຽນຫຍັງຈາກເລື່ອງນີ້?
11-12. (ກ) ເຮົາໄດ້ບົດຮຽນຫຍັງຈາກວິທີທີ່ພະເຢຊູສອນຄວາມຈິງໃນຄຳພີໄບເບິນ? (ເບິ່ງຮູບນຳ) (ຂ) ຜູ້ນຳການສຶກສາຂອງນໍເຕ້ຊ່ວຍລາວແນວໃດ?
11 ເຮົາຈະຮຽນແບບພະເຢຊູໄດ້ແນວໃດ? ເມື່ອເຮົາສອນນັກສຶກສາ ໃຫ້ເຮົາໃຊ້ຄຳຖາມເພື່ອຈະຮູ້ວ່າລາວຄິດແລະຮູ້ສຶກແນວໃດແທ້ໆ. (ສພສ. 20:5) ເມື່ອຮູ້ແລ້ວ ໃຫ້ຊ່ວຍນັກສຶກສາໃຫ້ເຫັນວ່າລາວຈະຊອກຫາຂໍ້ຄຳພີທີ່ເຂົ້າກັບສະຖານະການຂອງລາວໄດ້ແນວໃດ. ຢ່າບອກນັກສຶກສາວ່າຕ້ອງເຮັດແບບນັ້ນເຮັດແບບນີ້. ແທນທີ່ຈະເຮັດແນວນັ້ນ ໃຫ້ຊ່ວຍລາວໃຫ້ຮູ້ວິທີຫາເຫດຜົນຈາກຄຳພີໄບເບິນແລະເບິ່ງວ່າຈະເອົາສິ່ງທີ່ໄດ້ຮຽນໄປໃຊ້ໃນຊີວິດໄດ້ແນວໃດ. ໃຫ້ເຮົາມາເບິ່ງປະສົບການຂອງພີ່ນ້ອງຊາຍຄົນໜຶ່ງທີ່ຊື່ນໍເຕ້ຈາກປະເທດການາ.
12 ນໍເຕ້ຮຽນຄຳພີໄບເບິນຕອນອາຍຸ 16 ປີ ແຕ່ບໍ່ດົນລາວກໍຖືກຄອບຄົວຕໍ່ຕ້ານ. ອັນໃດຊ່ວຍນໍເຕ້ບໍ່ໃຫ້ຍອມແພ້ແລະຮຽນຄຳພີໄບເບິນຕໍ່ໄປ? ຜູ້ນຳການສຶກສາຂອງລາວໃຊ້ມັດທາຍບົດ 10 ເພື່ອອະທິບາຍວ່າຄລິດສະຕຽນແທ້ຈະຖືກຂົ່ມເຫງ. ນໍເຕ້ເວົ້າວ່າ: “ເມື່ອຂ້ອຍເລີ່ມຖືກຂົ່ມເຫງ ຂ້ອຍກໍໝັ້ນໃຈວ່າຂ້ອຍໄດ້ເຈິຄວາມຈິງແລ້ວ.” ນອກຈາກນັ້ນ ຜູ້ນຳການສຶກສາຂອງລາວຍັງຊ່ວຍລາວໃຫ້ຫາເຫດຜົນຈາກມັດທາຍ 10:16 ເພື່ອລາວຈະສາມາດເວົ້າເລື່ອງຄວາມເຊື່ອກັບຄົນໃນຄອບຄົວດ້ວຍຄວາມນັບຖືແລະແບບລະມັດລະວັງ. ຫຼັງຈາກນໍເຕ້ຮັບບັບເຕມາແລ້ວລາວຢາກເປັນໄພໂອເນຍ ແຕ່ພໍ່ຂອງລາວຢາກໃຫ້ລາວຮຽນຕໍ່ມະຫາວິທະຍາໄລ. ແທນທີ່ຜູ້ນຳການສຶກສາຈະບອກວ່າຄວນເຮັດຫຍັງ ລາວພັດໃຊ້ຄຳຖາມເພື່ອຊ່ວຍນໍເຕ້ໃຫ້ຫາເຫດຜົນຈາກຫຼັກການໃນຄຳພີໄບເບິນ. ຜົນເປັນແນວໃດ? ນໍເຕ້ຕັດສິນໃຈຮັບໃຊ້ເຕັມເວລາ ແລ້ວພໍ່ກໍໄລ່ລາວອອກຈາກເຮືອນ. ນໍເຕ້ຮູ້ສຶກແນວໃດກັບສິ່ງທີ່ເກີດຂຶ້ນ? ລາວເວົ້າວ່າ: “ຂ້ອຍໝັ້ນໃຈວ່າຂ້ອຍຕັດສິນໃຈຖືກແລ້ວ.” ເລື່ອງນີ້ເຮັດໃຫ້ເຫັນວ່າເມື່ອເຮົາໃຊ້ເວລາຊ່ວຍຄົນອື່ນໃຫ້ຮູ້ຈັກຫາເຫດຜົນຈາກພະຄຳພີ ເຮົາຈະຊ່ວຍລາວໃຫ້ເປັນຄລິດສະຕຽນທີ່ມີຄວາມເຊື່ອເຂັ້ມແຂງແລະຮັບໃຊ້ພະເຢໂຫວາຕໍ່ໄປ.—ອຟຊ. 3:16-19
ຮຽນແບບພະເຢຊູໂດຍຊ່ວຍຄົນອື່ນໃຫ້ຫາເຫດຜົນຈາກຄຳພີໄບເບິນ (ເບິ່ງຂໍ້ 11) f
ຝຶກພີ່ນ້ອງຊາຍໃຫ້ມີຄຸນສົມບັດເພື່ອຈະເປັນ “ຂອງຂວັນທີ່ເປັນມະນຸດ”
13. ພະເຢຊູໄດ້ເຮັດຫຍັງເພື່ອໃຫ້ແນ່ໃຈວ່າວຽກປະກາດຍັງຈະມີຢູ່ຕໍ່ໄປຫຼັງຈາກທີ່ເພິ່ນກັບໄປສະຫວັນແລ້ວ? (ເອເຟໂຊ 4:8)
13 ຕອນທີ່ຢູ່ໃນໂລກນີ້ ພະເຢຊູໄດ້ເຮັດວຽກທຸກຢ່າງຕາມທີ່ພະເຢໂຫວາມອບໝາຍໃຫ້ເຮັດ. (ຢຮ. 17:4) ພະເຢຊູບໍ່ໄດ້ຄິດວ່າມີແຕ່ເພິ່ນຜູ້ດຽວເທົ່ານັ້ນທີ່ສາມາດເຮັດໃນສິ່ງທີ່ພະເຢໂຫວາຕ້ອງການ. ໃນໄລຍະ 3 ປີເຄິ່ງທີ່ພະເຢຊູຮັບໃຊ້ຢູ່ໃນໂລກນີ້ ເພິ່ນໄດ້ຝຶກຄົນອື່ນໃຫ້ເຮັດວຽກ. ກ່ອນພະເຢຊູຈະກັບໄປສະຫວັນ ເພິ່ນໄດ້ມອບໝາຍວຽກໃຫ້ລູກສິດຂອງເພິ່ນເຮັດ ເຊິ່ງບາງຄົນອາດຈະອາຍຸ 20 ປາຍປີເທົ່ານັ້ນ. ເພິ່ນມອບໝາຍເຂົາເຈົ້າໃຫ້ເບິ່ງແຍງແກະທີ່ມີຄ່າຂອງພະເຢໂຫວາແລະນຳໜ້າໃນການປະກາດແລະການສອນ. (ອ່ານເອເຟໂຊ 4:8) ພະເຢຊູໃຊ້ 40 ມື້ສຸດທ້າຍແນວໃດເພື່ອຊ່ວຍພວກລູກສິດທີ່ສັດຊື່ພັກດີແລະດຸໝັ່ນໃຫ້ມີຄຸນສົມບັດທີ່ຈະເປັນ “ຂອງຂວັນທີ່ເປັນມະນຸດ”?
14. ພະເຢຊູຊ່ວຍລູກສິດຂອງເພິ່ນແນວໃດໃນໄລຍະ 40 ມື້ສຸດທ້າຍທີ່ເພິ່ນຢູ່ໂລກນີ້? (ເບິ່ງຮູບນຳ)
14 ພະເຢຊູໃຫ້ຄຳແນະນຳພວກລູກສິດແບບກົງໆ ແຕ່ເຮັດດ້ວຍຄວາມຮັກ. ຕົວຢ່າງເຊັ່ນ: ເມື່ອພະເຢຊູສັງເກດເຫັນວ່າລູກສິດບາງຄົນສົງໄສວ່າເພິ່ນຄືນມາຈາກຕາຍແທ້ໆບໍ ເພິ່ນກໍຊ່ວຍເຂົາເຈົ້າໃຫ້ຮູ້ໂດຍໃຫ້ຄຳແນະນຳເຂົາເຈົ້າ. (ລກ. 24:25-27; ຢຮ. 20:27) ເພິ່ນຍັງບອກເຂົາເຈົ້າໃຫ້ເອົາໃຈໃສ່ເບິ່ງແຍງປະຊາຊົນຂອງພະເຢໂຫວາແທນທີ່ຈະສົນໃຈເລື່ອງການຫາເງິນຫຼືເຮັດທຸລະກິດຂອງໂຕເອງ. (ຢຮ. 21:15) ເພິ່ນເຕືອນເຂົາເຈົ້າບໍ່ໃຫ້ສົນໃຈຫຼາຍເກີນໄປວ່າຄົນອື່ນຈະໄດ້ຮັບສິດທິພິເສດຫຍັງໃນການຮັບໃຊ້ພະເຢໂຫວາ. (ຢຮ. 21:20-22) ເມື່ອລູກສິດບາງຄົນມີຄວາມຄິດທີ່ບໍ່ຖືກຕ້ອງກ່ຽວກັບການປົກຄອງຂອງພະເຈົ້າ ເພິ່ນກໍປັບຄວາມຄິດຂອງເຂົາເຈົ້າແລະຊ່ວຍເຂົາເຈົ້າໃຫ້ຈົດຈໍ່ຢູ່ກັບການປະກາດຂ່າວດີ. (ກຈກ. 1:6-8) ຜູ້ເບິ່ງແຍງໄດ້ບົດຮຽນຫຍັງຈາກພະເຢຊູ?
ຮຽນແບບພະເຢຊູໂດຍຝຶກພີ່ນ້ອງຊາຍໃຫ້ມີຄຸນສົມບັດທີ່ຈະຮັບເອົາໜ້າທີ່ຮັບຜິດຊອບຫຼາຍຂຶ້ນ (ເບິ່ງຂໍ້ 14)
15-16. (ກ) ຜູ້ເບິ່ງແຍງຈະຮຽນແບບພະເຢຊູແນວໃດ? (ຂ) ແພັດທຣິກໄດ້ຮັບປະໂຫຍດແນວໃດຈາກຄຳແນະນຳ?
15 ຜູ້ເບິ່ງແຍງຈະຮຽນແບບພະເຢຊູໄດ້ແນວໃດ? ຜູ້ເບິ່ງແຍງຕ້ອງຝຶກແລະຊ່ວຍພີ່ນ້ອງຊາຍລວມທັງຜູ້ທີ່ອາຍຸຍັງນ້ອຍໃຫ້ມີຄຸນສົມບັດທີ່ຈະເຮັດໜ້າທີ່ຮັບຜິດຊອບຫຼາຍຂຶ້ນ. c ຜູ້ເບິ່ງແຍງບໍ່ຄວນຄາດໝາຍວ່າຄົນທີ່ເຂົາເຈົ້າຝຶກຈະສົມບູນແບບ. ເຂົາເຈົ້າຕ້ອງໃຫ້ຄຳແນະນຳໃນແບບທີ່ສະແດງຄວາມຮັກເພື່ອພີ່ນ້ອງຊາຍເຫຼົ່ານີ້ທີ່ອາຍຸຍັງນ້ອຍຈະມີປະສົບການແລະເຫັນວ່າເປັນເລື່ອງສຳຄັນຫຼາຍທີ່ຕ້ອງຮັບໃຊ້ຄົນອື່ນດ້ວຍຄວາມຖ່ອມ ສັດຊື່ ແລະເຕັມໃຈ.—1ຕມ. 3:1; 2ຕມ. 2:2; 1ປຕ. 5:5
16 ໃຫ້ເຮົາມາເບິ່ງວ່າພີ່ນ້ອງຊາຍຊື່ແພັດທຣິກໄດ້ຮັບປະໂຫຍດແນວໃດຈາກຄຳແນະນຳ. ຕອນເປັນໄວລຸ້ນລາວເວົ້າບໍ່ມ່ວນແລະບໍ່ໄດ້ສະແດງຄວາມອ່ອນໂຍນແມ່ນແຕ່ກັບພີ່ນ້ອງຍິງ. ຜູ້ເບິ່ງແຍງຄົນໜຶ່ງສັງເກດເຫັນວ່າແພັດທຣິກຈຳເປັນຕ້ອງປ່ຽນແປງໂຕເອງ. ລາວຈຶ່ງໃຫ້ຄຳແນະນຳແບບກົງໆ ແຕ່ເວົ້າດ້ວຍຄວາມກະລຸນາ. ແພັດທຣິກເວົ້າວ່າ: “ຂ້ອຍດີໃຈທີ່ຜູ້ເບິ່ງແຍງຊ່ວຍຂ້ອຍໃຫ້ເຫັນຈຸດທີ່ຂ້ອຍຕ້ອງປ່ຽນແປງໂຕເອງ. ຂ້ອຍເຄີຍຮູ້ສຶກທໍ້ໃຈທີ່ເຫັນພີ່ນ້ອງຊາຍຄົນອື່ນໄດ້ເຮັດວຽກມອບໝາຍບາງຢ່າງທີ່ຂ້ອຍຢາກເຮັດ. ແຕ່ຄຳແນະນຳຂອງຜູ້ເບິ່ງແຍງຊ່ວຍຂ້ອຍໃຫ້ເຫັນວ່າເປັນເລື່ອງສຳຄັນແທ້ໆທີ່ຈະເປັນຄົນຖ່ອມແລະສະແດງຄວາມຮັກຕໍ່ພີ່ນ້ອງແທນທີ່ຈະສົນໃຈຕຳແໜ່ງແລະໜ້າທີ່ຮັບຜິດຊອບໃນປະຊາຄົມ.” ຜົນກໍຄື ແພັດທຣິກຖືກແຕ່ງຕັ້ງໃຫ້ເປັນຜູ້ເບິ່ງແຍງຕອນອາຍຸ 23 ປີ.—ສພສ. 27:9
17. ພະເຢຊູສະແດງໃຫ້ເຫັນແນວໃດວ່າເພິ່ນໝັ້ນໃຈໃນພວກລູກສິດ?
17 ພະເຢຊູບໍ່ພຽງແຕ່ມອບໝາຍໃຫ້ພວກລູກສິດບອກຂ່າວດີກັບຄົນອື່ນ ແຕ່ເພິ່ນຢາກໃຫ້ເຂົາເຈົ້າສອນນຳ. (ເບິ່ງຄຳວ່າ “ສອນພວກເຂົາ” ໃນຂໍ້ມູນສຳລັບສຶກສາຢູ່ມັດທາຍ 28:20) d ພວກລູກສິດອາດຮູ້ສຶກວ່າເຂົາເຈົ້າບໍ່ມີຄຸນສົມບັດທີ່ຈະເຮັດວຽກນີ້ ແຕ່ພະເຢຊູໝັ້ນໃຈວ່າເຂົາເຈົ້າສາມາດເຮັດວຽກນີ້ໄດ້ ເພິ່ນຈຶ່ງເວົ້າກັບເຂົາເຈົ້າດ້ວຍຄວາມໝັ້ນໃຈວ່າ: “ຂ້ອຍຈະໃຊ້ພວກເຈົ້າໄປຄືກັບທີ່ພໍ່ຂອງຂ້ອຍໄດ້ໃຊ້ຂ້ອຍມາ.”—ຢຮ. 20:21
18. ຜູ້ເບິ່ງແຍງຈະຮຽນແບບພະເຢຊູໄດ້ແນວໃດ?
18 ຜູ້ເບິ່ງແຍງຈະຮຽນແບບພະເຢຊູໄດ້ແນວໃດ? ຜູ້ເບິ່ງແຍງທີ່ມີປະສົບການຈະຝຶກຄົນອື່ນໃຫ້ເຮັດໜ້າທີ່ຮັບຜິດຊອບຫຼາຍຂຶ້ນ. (ຟລປ. 2:19-22) ຕົວຢ່າງເຊັ່ນ: ຜູ້ເບິ່ງແຍງອາດມອບໝາຍໃຫ້ໄວລຸ້ນຊ່ວຍອະນາໄມແລະເບິ່ງແຍງຫໍປະຊຸມ. ຫຼັງຈາກມອບໝາຍວຽກໃຫ້ເຂົາເຈົ້າເຮັດແລ້ວ ຜູ້ເບິ່ງແຍງສາມາດໝັ້ນໃຈໃນພີ່ນ້ອງເຫຼົ່ານັ້ນໄດ້ໂດຍຝຶກເຂົາເຈົ້າໃຫ້ຮູ້ຈັກເຮັດວຽກແລະໝັ້ນໃຈວ່າເຂົາເຈົ້າສາມາດເຮັດວຽກນັ້ນໄດ້. ຜູ້ເບິ່ງແຍງໃໝ່ຄົນໜຶ່ງຊື່ມັດທິວເຫັນຄ່າທີ່ຜູ້ເບິ່ງແຍງທີ່ມີປະສົບການໄດ້ຝຶກລາວໃຫ້ເຮັດວຽກຕ່າງໆໃນປະຊາຄົມແລະໝັ້ນໃຈວ່າລາວຈະເຮັດວຽກນັ້ນໄດ້ດີ. ລາວເວົ້າວ່າ: “ຂ້ອຍໄດ້ຮັບປະໂຫຍດຫຼາຍແທ້ໆ. ເມື່ອຂ້ອຍເຮັດຜິດພາດ ຜູ້ເບິ່ງແຍງຊ່ວຍຂ້ອຍໃຫ້ເຫັນວ່າຂ້ອຍສາມາດຮຽນຮູ້ຈາກຂໍ້ຜິດພາດແລະຄວນປັບປຸງໃຫ້ດີຂຶ້ນແນວໃດໃນເທື່ອຕໍ່ໄປ.” e
19. ເຮົາຄວນຕັ້ງໃຈທີ່ຈະເຮັດຫຍັງ?
19 ພະເຢຊູໃຊ້ໄລຍະ 40 ມື້ສຸດທ້າຍທີ່ເພິ່ນຢູ່ໂລກນີ້ເພື່ອໃຫ້ກຳລັງໃຈ ສອນ ແລະຝຶກຄົນອື່ນ. ຂໍໃຫ້ເຮົາຕັ້ງໃຈທີ່ຈະຮຽນແບບພະເຢຊູຢ່າງໃກ້ຊິດຕໍ່ໆໄປ. (1ປຕ. 2:21) ພະເຢຊູຈະຊ່ວຍເຮົາໃຫ້ເຮັດແບບນັ້ນໄດ້ແທ້ໆ. ເພິ່ນສັນຍາວ່າ: “ຂ້ອຍຈະຢູ່ກັບພວກເຈົ້າສະເໝີຈົນຮອດສະໄໝສຸດທ້າຍຂອງໂລກນີ້.”—ມທ. 28:20
ເພງທີ 15 ສັນລະເສີນລູກຫົວປີຂອງພະເຢໂຫວາ!
a ປຶ້ມຂ່າວດີ 4 ຫົວແລະປຶ້ມອື່ນໆໃນຄຳພີໄບເບິນເຮັດໃຫ້ເຮົາຮູ້ວ່າຫຼັງຈາກທີ່ພະເຢຊູຟື້ນຄືນມາຈາກຕາຍແລ້ວ ເພິ່ນໄດ້ປາກົດໂຕໃຫ້ລູກສິດຫຼາຍຄົນເຫັນ ເຊັ່ນ: ມາຣິອາຄົນມັກດາເລນ (ຢຮ. 20:11-18) ລູກສິດຄົນອື່ນທີ່ເປັນຜູ້ຍິງ (ມທ. 28:8-10; ລກ. 24:8-11) ລູກສິດ 2 ຄົນ (ລກ. 24:13-15) ເປໂຕ (ລກ. 24:34) ພວກອັກຄະສາວົກຍົກເວັ້ນໂທມາ (ຢຮ. 20:19-24) ພວກອັກຄະສາວົກລວມທັງໂທມາ (ຢຮ. 20:26) ລູກສິດ 7 ຄົນ (ຢຮ. 21:1, 2) ລູກສິດຫຼາຍກວ່າ 500 ຄົນ (ມທ. 28:16; 1ກຣ. 15:6) ຢາໂກໂບນ້ອງຊາຍຂອງພະເຢຊູ (1ກຣ. 15:7) ອັກຄະສາວົກທຸກຄົນ (ກຈກ. 1:4) ພວກອັກຄະສາວົກຢູ່ໃກ້ເມືອງເບັດທານີ (ລກ. 24:50-52) ແລະເພິ່ນອາດໃຫ້ພວກລູກສິດເຫັນໃນໂອກາດອື່ນອີກແຕ່ບໍ່ໄດ້ຂຽນໄວ້ໃນຄຳພີໄບເບິນ.—ຢຮ. 21:25
b ສຳລັບຄຳພະຍາກອນຕ່າງໆກ່ຽວກັບເມຊີອາ ເບິ່ງບົດຄວາມ “ຄຳພະຍາກອນກ່ຽວກັບເມຊີອາພິສູດບໍວ່າພະເຢຊູເປັນເມຊີອາແທ້ໆ?” ໃນເວັບໄຊ jw.org. (ພາສາໄທ)
c ຜູ້ເບິ່ງແຍງບາງຄົນທີ່ອາຍຸຍັງນ້ອຍອາດຖືກແຕ່ງຕັ້ງໃຫ້ເປັນຜູ້ເບິ່ງແຍງໝວດແມ່ນແຕ່ຕອນທີ່ເຂົາເຈົ້າອາຍຸປະມານ 25-30 ປີ. ແຕ່ເຂົາເຈົ້າຕ້ອງມີປະສົບການໃນການເປັນຜູ້ເບິ່ງແຍງມາກ່ອນ.
d ພາສາໄທ
e ສຳລັບຄຳແນະນຳເລື່ອງການຊ່ວຍພີ່ນ້ອງຊາຍໃຫ້ມີຄຸນສົມບັດທີ່ຈະຮັບເອົາໜ້າທີ່ຮັບຜິດຊອບຕ່າງໆໃນອົງການ ໃຫ້ເບິ່ງຫໍສັງເກດການເດືອນສິງຫາ 2018 ໜ້າ 13-14 ຂໍ້ 15-17 ແລະຫໍສັງເກດການເດືອນເມສາ 2015 ໜ້າ 3-14.
f ຄຳອະທິບາຍຮູບ: ຫຼັງຈາກຜູ້ນຳການສຶກສາຊ່ວຍນັກສຶກສາໃຫ້ຫາເຫດຜົນຈາກຄຳພີໄບເບິນແລ້ວ ນັກສຶກສາກໍຕັດສິນໃຈເອົາເຄື່ອງຕົກແຕ່ງກ່ຽວກັບວັນຄລິດສະມາດໄປຖິ້ມ.
