Yesu nde abetaki lisolo ya mozwi moko ná Lazare. (Luka 16:19-31) Na lisolo yango, mibali yango mibale bazalaki komonisa lolenge mibale ya bato: (1) bakonzi ya mangomba ya Bayuda ya lolendo na ntango ya Yesu mpe (2) bato ya komikitisa oyo bandimaki nsango ya Yesu.

Na lisolo oyo

•  Yesu alobaki nini mpo na mozwi mpe Lazare?

•  Ezali likambo oyo esalemaki mpenza?

•  Lisolo yango emonisi nde ete lifelo ya mɔtɔ ezalaka?

•  Yesu alingaki koteya nini na lisese yango?

 Na Luka mokapo 16, Yesu alobeli lisolo ya mibali mibale oyo bomoi na bango ebongwani na ndenge ya kokamwa.

 Lisolo yango ezali boye na mokuse: Mobali moko ya mozwi atondi na bomengo. Mosɛngi-biloko moko na nkombo Lazare azali kofanda mingi liboso ya porte na ye, azali kozela bilei oyo mozwi yango azalaki kotika. Lazare ayaki kokufa, mpe baanzelu batye ye na ngámbo ya Abrahama. Mozwi mpe ayaki kokufa mpe bakundaki ye. Na ndenge ya lisolo, mibali yango mibale bazali komiyeba nsima ya liwa na bango. Mozwi azali kozika na mɔtɔ ya makasi, mpe asɛngi Abrahama atinda Lazare aya kotangisela ye mwa mai na lolemo mpo ayoka mpiɔ. Abrahama aboyi, mpe alobi ete sikoyo bomoi ya mibali yango ebongwani; Lazare akómi mozwi, mpe mozwi akómi mobola. Mpe libulu moko monene ekaboli mobali yango ná Lazare, mwaye akóma kuna ezali te.

 Te. Ezali kaka lisese Yesu asalelaki mpo na kobimisa liteya. Ezala bato ya mayele oyo bayekolaka makambo ya Biblia bandimaka ete lisolo yango ezali lisese. Na ndakisa, na Biblia ya Martin Luther édition ya 1912 elobi esika moko ete “oyo ezali lisese.” Mpe na Bible de Jérusalem, ezali na note moko oyo elobi, oyo ezali “lisolo ya lisese, kasi te likambo moko ya kala oyo esalemá.”

 Yesu alingaki nde komonisa ete soki moto akufi akobaka kozala na bomoi? Alingaki komonisa ete bato mosusu nsima ya liwa banyokwamaka na lifelo ya mɔtɔ mpe ete Abrahama ná Lazare bazalaki na lola? Makambo mingi emonisi ete ezali bongo te.

 Na ndakisa:

•   Soki mozwi yango azalaki mpenza na esika oyo mɔtɔ ezali kongala, mwa litanga ya mai oyo asɛngaki Lazare elingaki kokauka mbala moko na mɔtɔ, boye te?

•   Ata soki ekauki te, mwa litanga yango ya mai elingaki mpenza kokitisa ye motema na kati ya mɔtɔ wana ya makasi?

•   Abrahama akokaki kozala na likólo te mpo Yesu alobaki polele ete moto moko te amatá na likólo.​—Yoane 3:13.

 Te. Atako lisolo yango ezali likambo ya solo te, bato mosusu balobaka ete yango emonisi ete bato malamu bakendaka likólo mpe bato mabe na lifelo ya mɔtɔ. a

 Makanisi yango ezali na nzela te!

 Liteya oyo ete bato mabe bakendaka na lifelo ya mɔtɔ eyokani te na oyo Biblia elobi mpo na bakufi. Na ndakisa, Biblia elobi te ete moto malamu nyonso soki akufi akendaka na likólo, elobi mpe te ete bato mabe banyokwamaka na lifelo ya mɔtɔ. Elobi nde ete: “Bato ya bomoi bayebi ete bakokufa, kasi bakufi bayebi ata eloko moko te.”​—Mosakoli 9:5.

 Yesu alingaki komonisa ete bomoi ya bato mibale elingaki kobongwana na ndenge moko ya kokamwa.

 Mozwi emonisaki bakonzi ya mangomba ya Bayuda mpo bazalaki “bato oyo balingá mbongo.” (Luka 16:14) Bazalaki koyoka Yesu, kasi batɛmɛlaki nsango na ye. Bakonzi yango ya mangomba bazalaki komona mpamba bato oyo bazalaki bazwi te.​—Yoane 7:49.

 Lazare emonisaki bato mosusu oyo bandimaki nsango ya Yesu, bato oyo bakonzi ya mangomba ya Bayuda bazalaki komona ntina te.

 Bomoi ebongwanaki na ndenge ya kokamwa mpo na bango mibale.

•   Bakonzi ya mangomba ya Bayuda bazalaki kokanisa ete Nzambe andimaka bango. Kasi na maloba mosusu, bakufaki ntango Nzambe aboyaki bango ná losambo na bango mpo bandimaki nsango ya Yesu te. Mpe nsango oyo Yesu ná bayekoli na ye bateyaki ezalaki lokola monyoko mpo na bango.​—Matai 23:29, 30; Misala 5:29-33.

•   Bato mpamba, oyo basundolamaki epai ya bakonzi ya mangomba, bandimamaki na Nzambe. Mingi bandimaki nsango ya Yesu mpe bazwelaki yango matomba. Yango esalaki ete Nzambe andima bango mpo na libela.​—Yoane 17:3.