Biro ya filiale ya Rwanda mpe ya Zimbabwe ezali kosala elongo na bankulutu ya masangá mpo na kosalisa bandeko oyo bazali na mbongo mpenza te na ntango oyo ya maladi mabe ya coronavirus, bázwa biloko oyo basengeli na yango.

Na mokolo ya 02/04/2020, Komite ya filiale ya Rwanda eyebisaki bankulutu ya masangá ete báluka koyeba bandeko oyo bazali na mokakatano ya mbongo na ntango ya maladi mabe oyo mpo bákoka kozwa lisalisi. Ntango kaka bankulutu bazwaki malako yango, babandaki mbala moko kozwa bibongiseli mpo na kopesa bandeko bilei mpe biloko mosusu oyo basengelaki na yango.

Na nsima ya pɔsɔ mibale, filiale ya Rwanda esalaki Bakomite ya kopesa lisungi 31. Bakomite yango epesaki mabota oyo bazalaki na bosɛnga biloko lokola masango, loso, madesu, mungwa, mpe mafuta. Na nsima, mabota koleka 7 000 bazwaki biloko oyo basengelaki na yango.

Na nsima ya kozwa biloko oyo basengelaki na yango, ndeko mwasi Nizeyimana Charlote ná bana na ye misato balobaki boye: “Matɔndi mingi mpo na lisalisi oyo bozali kokoba kopesa biso, biloko oyo tosengeli na yango mpe libɔndisi na nzela ya Biblia na ntango oyo ya mpasi, ya maladi mabe ya coronavirus. Tozangi mpenza maloba mpo na kopesa bino matɔndi.”

Ndeko moko alobi likambo oyo esalemaki mokolo oyo libota na ye elingaki kozwa bilei. Alobaki boye: “Mokolo yango, mwasi na ngai akangamaki mpo tozalaki te na biloko ya kolya. Kaka na ntango yango, ndeko moko abengaki ngai na telefone mpe ayebisaki ngai ebongiseli oyo ezwamaki mpo libota na ngai ezwa bilei. Ekamwisaki ngai mpenza. Nalekisaki butu mobimba na kobondela Yehova mpe kopesa ye matondi.”

Maladi mabe ya coronavirus eyei kobakisa lisusu nzala likoló ya nzala na ekólo na biso.

Filiale ya Zimbabwe etyaki bakomite misato ya kopesa lisungi mpo na kosalisa bandeko. Longola yango, biro ya filiale ezwaki ebongiseli mpo basakoli bápesa bilei mpe biloko mosusu mpo na bandeko oyo bazali na bosenga. Bakomite yango ya kopesa lisungi ekabolaki biloko nyonso epai ya bandeko.

Bakomite ya kosunga bandeko na ntango ya likama ekabolelaki basakoli 7 319, kilo 62 669 ya masango, litrɛ 6 269 ya mafuta mpo na kolambela, kilo 3 337 ya mbisi ya kokauka mpe kilo 5 139 ya madesu.

Mwasi ná mobali moko oyo bayekolaka Biblia mpe bayanganaka mbala na mbala na makita ya lisangá, bazalaki na mposa ya bilei. Bakamwaki makasi ntango bamonaki bandeko oyo bayekolaki na bango Biblia bayei kotikela bango bilei. Mokolo moko liboso bazwa bilei yango, pastɛrɛ ya lingomba oyo bazalaki kosambela liboso abengaki bango. Pastɛrɛ yango asɛngaki bango mabonza mpo na kosomba bilei. Ntango bamonaki bokeseni makasi oyo ezali kati na Batatoli ya Yehova na pastɛrɛ yango, mobali yango ná mwasi na ye bazwaki mokano ya kotika lingomba na bango mpo na libela.

Na ntembe te, Yehova akokoba kopambola mosala oyo esengeli kosalema, tozali na kondima ete bandeko na biso ya Rwanda mpe ya Zimbabwe bakozwa oyo bazali na yango mposa.​—Misala 11:29.