Komite ya filiale ya Malawi ezwi bibongiseli ete programɛ ya makita ya lisangá ebandaka koleka na TV mpe na radio. Bato ebele bazali kolanda programɛ yango, kaka bandeko na biso te. Na Malawi, Batatoli ya Yehova bazali koleka 100 000, kasi bato oyo basalaka na TV ná radio balobi ete bato oyo bazali kolanda programɛ yango pɔsɔ na pɔsɔ na TV bakoki kozala milio mibale, mpe bato oyo bazali kolanda radio bazali milio 8.

Ndenge moko na bamboka mosusu, bandeko na biso na Malawi bazali lisusu koyangana na Bandako ya Bokonzi te mpo na makita, mpo na kotosa malako ya makambo etali maladi mabe oyo ya coronavirus. Basakoli mingi ya lisangá bazalaka na likoki ya kolanda TV to na radio. Na yango, lokola makita ezali koleka na TV mpe na radio, ata bandeko oyo bazali na Internet te, bakoki kolanda makita ya lisangá.

Balekisaka makita na TV mpe na radio na monɔkɔ ya Chichewa, monɔkɔ oyo bato mingi balobaka na mboka yango. Balekisaka Programɛ mobimba na TV, mpe mbala moko babongolaka yango na elobeli ya bababa ya Malawi. Longola diskur, na programɛ ya makita ya pɔsɔ, bazali kolakisa bavideo to badrame ya botángi ya Biblia. Na nsuka ya likita, balendisaka bato oyo balandi programɛ bákende na jw.org mpo na koyeba makambo mosusu na minɔkɔ mingi.

Programɛ ya TV ná radio elongoli makanisi mabe oyo bato bazalaka na yango mpo na Batatoli ya Yehova. Moto moko akomaki boye: “Nalandi mateya na bino na radio na boumeli ya mwa bapɔsɔ oyo euti koleka. Epesi biso biyano ya malamu na lokuta oyo bato mingi balobaka mpo na bino. Mateya na bino ekeseni na ya mangomba mosusu mpo ezali kosimba mitema na biso!” Mobali yango ná libota na ye babandá koyekola Biblia na Batatoli ya Yehova.

Augustine Semo, oyo akambaka makambo ya bansango na filiale ya Malawi, alobi boye: “Mateya oyo ezali koleka na TV mpe na radio esalisi bandeko na biso mingi bákoba kosalela Yehova ndenge bamesaná. Esalisi mpe bato ebele oyo bazali Batatoli ya Yehova te báyeba mateya na biso. Ntango tokozongela makita na Bandako ya Bokonzi, tozali na elikya ete tokomona bato ya sika ebele mpenza.”

Tozali na esengo ndenge toyebi ete ezala bandeko na biso to bato mosusu na Malawi, bazali na likoki ya kosambela Yehova na ntango oyo ya mpasi mingi. Yango ezali kotinda biso tópesa ‘moombo ya sembo’ matɔndi mingi ndenge azali kosala nyonso mpo mokomoko na biso akoka kozwa mateya ya solo ya Biblia.​—Matai 24:45.