Batatoli ya Yehova mibale, Habtemichael Tesfamaria ná Habtemichael Mekonen, bakufaki na ebandeli ya mobu 2018 na bolɔkɔ ya Mai Serwa pene ya engumba Asmara. Bakɔtisaki bango na bolɔkɔ na 2008 na eleko ya molunge mpo na kondima na bango mpe banyokolaki bango makasi na bolɔkɔ pene na mbula zomi.

Tesfamariam akufaki na mbalakaka na mokolo ya 3/01/2018 na bolɔkɔ ya Mai Serwa ntango azalaki na mbula 76. Baninga na ye ya bolɔkɔ balobaki ete abɛlaki makasi. Abotamaki na Adi Yakulu, Mendefera, na Erythrée na 1942. Akómaki Motatoli ya Yehova na mobu 1970 mpe aboyaki kowangana kondima na ye. Yango wana, bakangaki ye mpe banyokolaki ye. Atiki mwasi na ye, Leterberhan Bezabih ná bana minei ya mibali mpe misato ya basi.

Mekonen akufaki na bolɔkɔ ya Mai Serwa mokolo ya 6/03/2018, ntango azalaki na mbula 77. Baninga na ye ya bolɔkɔ balobi ete akufaki na maladi ya ngei (rein). Mekonen abotamaki na 1940 na mboka Kudo Felasi na sudi ya Érythrée mpe akómaki Motatoli ya Yehova ntango azalaki na mbula koleka 55. Ndenge moko na Tesfamariam, ye mpe aboyaki kowangana kondima na ye, akɔtaki bolɔkɔ kaka mpamba mpe basalelaki ye makambo na kozanga bosembo. Atiki mwasi na ye, Mihret Ellias, mpe bana na ye mibale: moko ya mobali mpe moko ya mwasi.

Ntango bakonzi bakangaki Mekonen kaka mpamba na sanza ya 07/2008, azalaki na ndako na ye, Tesfamariam mpe azalaki na ndako na ye ntango bakangaki ye na 08/2008. Bango nyonso mibale batyaki bango na bolɔkɔ na kaa ya Meitir, na nɔrdi ya Asmara na esobe, epai banyokwamaki makasi mpenza. Mpo na kopesa bakangami oyo bazali Batatoli ya Yehova etumbu makasi, bakonzi bakangaki bango na mwa bolɔkɔ moko oyo ezali na nse ya mabele kobanda na sanza ya 10/2011 tii na sanza ya 08/2012. Kuna bakangami banyokwamaka na molunge makasi, kozanga bilei mpe mai ya pɛto. Yango wana, bakangami bazali kokutana na mikakatano ya sante.

Na 2017, bakonzi balongolaki Batatoli ya Yehova oyo bazalaki na bolɔkɔ na kaa ya Meitir mpe batindaki bango na bolɔkɔ ya Mai Serwa, epai bandeko na bango bazalaki na likoki ya koya kotikela bango biloko ya kolya mpe bazalaki na likoki ya kozwa lisalisi ya minganga ntango babɛli makasi. Bakangami basepelaki ndenge batindaki bango na bolɔkɔ oyo ezalaki mwa malamu, kasi Tesfamariam ná Mekonen bazalaki kaka na sante ya malamu te mpo na mpasi oyo bamonisaki bango na bolɔkɔ oyo bazalaki liboso.

Tesfamariam mpe Mekonen bazali Batatoli ya Yehova ya liboso te oyo bakufi na bolɔkɔ na Érythrée; basusu mpe bakufaka mwa moke nsima ya kobima na bolɔkɔ. Lokola basalelaka bato ya bolɔkɔ makambo oyo ebongi te mpe lokola banyokolaki bango makasi, Batatoli ya Yehova mibale mosusu bakufaki na bolɔkɔ, mpe bamosusu misato bakufaki nsima ya kobima na bolɔkɔ. Batatoli soki nsambo oyo babimá na bolɔkɔ eleki mwa bambula bazali kaka na mikakatano ya sante mpo na ndenge banyokolaki bango makasi na bolɔkɔ. Lelo oyo, Batatoli ya Yehova 53 bazali kaka na bolɔkɔ na Érythrée mpo na kondima na bango, na kati na bango Tareke, oyo azali ndeko ya Tesfamariam.

Na mokolo ya 8/06/2016, biro ya ONU oyo etalelaka ntomo ya moto ezwaki lapolo epai ya Commission d’enquête sur les droits de l’homme en Érythrée (COIE), oyo esalaki ankɛtɛ mpo na koyeba soki Érythrée ezali koboya kotosa ntomo ya moto. Commission yango esɛngaki Érythrée “etosa bonsomi ya losambo” mpe “etika mimeseno ya kokanga bato mpambampamba mpe kokanga bato kaka mpo na makambo ya losambo, mingimingi kolandela bituluku moko ya losambo, na ndakisa, Batatoli ya Yehova, . . . mpe ebimisa mbala moko baoyo nyonso bakangami na bolɔkɔ kaka mpamba kozanga kofutisa bango mbongo.” Commission yango elobaki na mokuse ete konyokola oyo Érythrée enyokoli bato mpo na losambo na bango ezali “mabe mpenza.”

Batatoli ya Yehova bazali na elikya ete komite international ekolandela likambo oyo ememi liwa ya Tesfamariam mpe ya Mekonen, mpe ete yango ekotinda bakonzi ya Érythrée bázwa bibongiseli mpo na baoyo nyonso bakangami kaka mpamba mpo na kondima na bango.