Yobo 42:1-17
42 Bongo Yobo ayanolaki Yehova ete:
2 “Sikoyo nayebi ete okoki kosala makambo nyonso,Mpe ete likambo moko te oyo ozali na mposa ya kosala ekozanga kokokisama.+
3 Olobaki: ‘Nani oyo azali kobebisa toli na ngai kozanga boyebi?’+
Ya solo, nalobaki, kasi nazalaki kososola teMakambo ya kokamwa mpenza oyo nayebi te.+
4 Olobaki: ‘Yoká, nabondeli yo, mpe ngai nakoloba.
Nakotuna yo mituna, mpe okoyanola ngai.’+
5 Matoi na ngai eyokaki nsango na yo,Kasi, sikoyo, namoni yo mpenza na miso na ngai.
6 Yango wana, nalongoli maloba oyo nalobaki,+Mpe nabongoli motema na putulu ya mabele mpe na putulu ya mɔtɔ.”+
7 Ntango Yehova asilisaki koloba na Yobo maloba wana, Yehova alobaki na Elifaze Motemane ete:
“Nkanda na ngai epeleli yo ná baninga na yo mibale,+ mpo bolobi solo te mpo na ngai+ ndenge mosaleli na ngai Yobo alobi.
8 Sikoyo, bózwa bangɔmbɛ-mibali nsambo ná bampate-mibali nsambo mpe bókende epai ya mosaleli na ngai Yobo, bópesa mbeka ya kotumba mpo na bino moko. Bongo mosaleli na ngai Yobo akobondela mpo na bino.+ Nakondima mpenza libondeli na ye:* Nakosalela bino te likambo na kolanda bozoba na bino, mpo bolobi solo te mpo na ngai ndenge mosaleli na ngai Yobo alobi.”
9 Na yango, Elifaze Motemane, Biledade Moshua ná Zofare Monaamate bakendaki mpe basalaki ndenge Yehova ayebisaki bango básala. Mpe Yehova andimaki libondeli ya Yobo.
10 Ntango Yobo asilisaki kobondela mpo na baninga na ye,+ Yehova alongolaki mpasi ya Yobo+ mpe azongiselaki ye bozwi na ye.* Yehova apesaki ye biloko oyo azalaki na yango liboso mbala mibale.+
11 Bandeko na ye nyonso ya mibali ná ya basi mpe baninga na ye nyonso ya kala+ bayaki epai na ye mpe balyaki elongo na ye na ndako na ye. Bamoniselaki ye mawa mpe babɔndisaki ye mpo na mpasi nyonso oyo Yehova atikaki ete ekómela ye. Mokomoko na bango apesaki ye mbongo moko ya ebende mpe lopɛtɛ moko ya wolo.
12 Bongo Yehova apambolaki nsuka ya bomoi ya Yobo koleka ebandeli na ye.+ Mpe Yobo akómaki na bampate 14 000, bakamela 6 000, bangɔmbɛ 2 000,* bakisa mpe bampunda ya basi 1 000.+
13 Abotaki lisusu bana mibali nsambo ná bana basi misato.+
14 Apesaki mwana na ye ya liboso ya mwasi nkombo Yemima, ya mibale Kezia mpe ya misato Kerene-hapuke.
15 Na mokili mobimba, basi kitoko lokola bana ya Yobo bazalaki te, mpe tata na bango apesaki bango libula elongo na bandeko na bango ya mibali.
16 Nsima na yango, Yobo aumelaki lisusu na bomoi mbula 140, mpe amonaki bana na ye mpe bana ya bana na ye—mabota minei.
17 Nsukansuka, Yobo akufaki, nsima ya kolekisa bomoi moko ya molai mpe ya esengo.*
Maloba na nse
^ Lil., “Nakotombola mpenza elongi na ye.”
^ Lil., “Yehova alongolaki Yobo na kati ya mpasi oyo azalaki na yango.”
^ Oyo bakangisi mibalemibale.
^ Lil., “anuni mpe atondi na mikolo.”
