Yirimia 9:1-26
9 Ee soki motó na ngai ezalaka ata mai,Soki miso na ngai ezalaka ata liziba ya mai ya miso!+
Mbɛlɛ naleli butu moi,Mpo na kobomama ya bato na ngai.
2 Aa! soki nazalaka ata na esika ya kofanda mpo na bato ya mobembo na esobe!
Mbɛlɛ nalingaki kotika bato na ngai mpe kokende mosika na bango,Mpo bango nyonso bazali bato ya ekobo,+Etuluku ya bato oyo basalaka makambo na bokosi.
3 Bazali kogumba lolemo na bango lokola litimbo;Mokili etondi na bokosi, bosembo ezali te.+
“Bazali kokoba kosala mabe,Mpe batye ata moke te likebi epai na ngai,”+ Yehova alobi bongo.
4 “Moto na moto akeba na moninga na ye,Kotyela ata ndeko na yo motema te.
Mpo ndeko nyonso azali motɛki,+Mpe moninga nyonso akoselaka bato makambo.+
5 Moto na moto akosaka moninga na ye;Mpe moto moko te alobaka solo.
Bayekolisi lolemo na bango elobaka lokuta.+
Bamilɛmbisi na kosala mabe.
6 Ofandi na katikati ya bokosi.
Na bokosi na bango, baboyi koyeba ngai,” Yehova alobi bongo.
7 Na yango, Yehova ya mampinga alobi boye:
“Nakonyangwisa bango lokola ebende mpe nakomeka bango,+Nakosala lisusu nini mpo na mwana mwasi ya bato na ngai?
8 Lolemo na bango ezali likula oyo ebomaka. Oyo elobaka makambo ya lokuta.
Moto nyonso azali kokoba kolobela kimya na mozalani na ye,Kasi na motema azali kotyela ye motambo.”
9 “Nasengeli te kosɛnga bango bázongisa monɔkɔ mpo na makambo wana?” Yehova alobi bongo.
“Nasengeli* te kozongisela ekólo ya boye mabe?+
10 Nakolela mpe nakolelalela mpo na bangombaMpe nakoyemba loyembo ya mawa mpo na bisika ya koleisa bibwɛlɛ matiti na esobe,Mpamba te etumbami, mpo moto moko te alekaka wanaMpe mongongo ya bibwɛlɛ eyokani te.
Bandɛkɛ mpe banyama ekimi, ekei.+
11 Nakokómisa Yerusaleme mabondo ya mabanga,+ esika oyo bambwa ya zamba* efandaka,+Mpe nakokómisa bingumba ya Yuda esika oyo etikalá mpamba, oyo bato bafandaka te.+
12 Nani azali moto ya bwanya, mpo akanga ntina ya likambo oyo?
Yehova alobi na nani, mpo ayebisa likambo yango?
Mpo na nini mokili ebebi?
Mpo na nini eziki lokola esobe,Mpo moto moko te azali koleka kuna?”
13 Yehova ayanolaki boye: “Mpo basundolaki mobeko* na ngai oyo natyaki liboso na bango, mpe mpo batosaki yango te mpe batosaki ngai te.
14 Kasi na motó makasi na bango, bayokelaki motema na bango+ mpe basambelaki bikeko ya Baala, ndenge batata na bango bateyaki bango.+
15 Na yango, talá oyo Yehova ya mampinga, Nzambe ya Yisraele alobi: ‘Talá nakoleisa bato oyo mbondo, mpe nakomɛlisa bango mai oyo ezali na pwazɔ.+
16 Nakopanza bango na kati ya bikólo oyo bango mpe batata na bango bayebi te,+ mpe nakotinda mopanga nsima na bango tii nakosilisa bango nyɛɛ.’+
17 Talá oyo Yehova ya mampinga alobi:‘Bómitambwisa na mayele.
Bóbenga basi oyo bayembaka nzembo ya mawa,+Mpe bótinda bábenga basi oyo bayebi mpenza kolela báya,
18 Mpe básala nokinoki mpe bátombola mongongo ya kolelalela mpo na biso,Mpo miso na biso ebimisa mpisoliMpe mai ya miso ekita na matama na biso.+
19 Mpo mongongo ya kolelalela eyokani uta na Siona:+
“Tobebisami mpenza!
Toyoki nsɔni mingi mpenza!
Mpo totiki mokili, mpe bakweisi bisika na biso ya kofanda.”+
20 Bino basi, bóyoka liloba ya Yehova.
Litoi na bino ekanga ntina ya liloba oyo euti na monɔkɔ na ye.
Bóteya bana na bino ya basi ndenge ya kolela oyo,Mpe moto na moto ateya moninga na ye loyembo oyo ya mawa.+
21 Mpo liwa emati na nzela ya bafɛnɛtrɛ na biso;Ekɔti na bandako milai na biso ya kofandaMpo na kolongola bana na babalabalaMpe bilenge mibali na bisika minene ya bato nyonso.’+
22 Lobá boye: ‘Talá oyo Yehova alobi:
“Bibembe ya bato oyo ekokwea lokola nyɛi likoló ya elanga,Lokola molɔngɔ ya mbuma oyo bakati sika nsima ya mobuki,Oyo ezangi moto mpo na kolɔkɔta yango.”’”+
23 Talá oyo Yehova alobi:
“Moto ya bwanya amikumisa te mpo na bwanya na ye;+Moto ya nguya amikumisa te mpo na nguya na ye;Mpe moto ya bomɛngo amikumisa te mpo na bomɛngo na ye.”+
24 “Kasi moto oyo azali komikumisa,
Amikumisa mpo azali na mayele ya kososola mpe ayebi ngai,+Ete nazali Yehova, ngai Moto namonisaka motema boboto,* bosembo mpe boyengebene kati na mabele,+Mpo nasepelaka na makambo wana,”+ Yehova alobi bongo.
25 “Talá! Mikolo ezali koya,” Yehova alobi bongo, “nakosɛnga bato nyonso oyo bakatamá ngenga, nzokande bakatamá naino ngenga te, ete bázongisa monɔkɔ,+
26 Ezipito+ ná Yuda,+ Edome,+ bana ya Amone+ ná Moabe,+ mpe baoyo nyonso bazali na nsuki oyo ekatami na mpakatoi, baoyo bazali kofanda na esobe;+ mpo bikólo nyonso ekatami ngenga te, mpe bato nyonso ya libota ya Yisraele bakatami ngenga na motema te.”+
Maloba na nse
^ To, “molimo na ngai esengeli.”
^ To, “bambulú.”
^ To, “mateya.”
^ To, “bolingo ya sembo.”
