Nzembo 88:1-18
Loyembo. Mondule ya bana ya Kora.+ Epai ya mokambi ya nzembo; na kolanda ebɛtɛli ya Mahalate,* oyo etuluku moko eyembaka nsima ya mosusu. Maskile* ya Hemane+ Moezera.
88 Ee Yehova, Nzambe ya lobiko na ngai,+Na moi nagangi,Mpe na butu nayei liboso na yo.+
2 Libondeli na ngai ekóma epai na yo,+Tyá litoi* na yo na koganga na ngai mpo na koluka lisalisi.+
3 Mpo molimo* na ngai etondi na mpasi,+Mpe bomoi na ngai ekómi pene na Nkunda.*+
4 Nasilaki kotángama na kati ya baoyo bazali kokita na libulu;*+Nakómi lokola moto oyo azangi lisalisi,*+
5 Asundolami na kati ya bakufiLokola babomami oyo bazali kolala na lilita,Baoyo ozali kokanisa lisusu teMpe baoyo balongolami na nse ya libateli na yo.*
6 Otye ngai na kati ya libulu na bisika ya nse koleka,Na bisika ya molili, na libulu monene ya mozindo.
7 Osilikeli ngai makasi, nazali koyoka ete ofini ngai mpenza,+Makambo oyo ozali kosala ezali lokola mbonge makasi oyo ezali kobɛta ngai. (Sela)
8 Okimisi mosika na ngai baoyo bayebani na ngai;+Okómisi ngai eloko ya koyina na miso na bango.
Nakangami na motambo mpe nakoki kokima te.
9 Liso na ngai elɛmbi mpo na mpasi na ngai.+
Ee Yehova, nabeleli yo mokolo mobimba;+Nasemboli mabɔkɔ na ngai epai na yo.
10 Okosala nde makambo ya kokamwa mpo na bakufi?
Baoyo bazangi makasi kati na liwa bakoki kotɛlɛma mpo na kosanzola yo?+ (Sela)
11 Bolingo na yo ya sembo ekosakolama nde na kati ya nkunda,Bosembo na yo na esika ya libebi?*
12 Makambo na yo ya kokamwa ekoyebana nde na moliliTo bosembo na yo na mokili ya bato oyo babosaná bango?+
13 Ee Yehova, nazali kaka kobelela yo mpo na kosɛnga lisalisi,+Ntɔngɔ nyonso libondeli na ngai ezali kokóma epai na yo.+
14 Ee Yehova, mpo na nini ozali kobwaka ngai?+
Mpo na nini ozali kobombela ngai elongi na yo?+
15 Banda bomwana na ngai,Nazalaka na mpasi mpe pene na liwa;+Nalɛmbi mpenza nzoto mpo na makambo ya nsɔmɔ oyo otiki ekómela ngai.
16 Nkanda na yo makasi ezipi ngai;+Nsɔmɔ na yo ezali kobebisa ngai.
17 Mokolo mobimba, ezingi ngai lokola mai;Ezingi ngai ngámbo nyonso.*
18 Okimisi mosika na ngai baninga mpe bato oyo nazalaka elongo na bango;+Molili ekómi moninga na ngai.
Maloba na nse
^ Talá Ndimbola ya maloba.
^ Talá Ndimbola ya maloba.
^ To, “Kitá mpe yoká ngai.”
^ Talá Ndimbola ya maloba.
^ To, “Sheole,” elingi koloba, nkunda ya bato nyonso. Talá Ndimbola ya maloba.
^ To, “mobali oyo azangi makasi.”
^ To, “nkunda.”
^ Lil., “lobɔkɔ na yo oyo esalisaka.”
^ To, “na Abadona.”
^ To mbala mosusu, “nyonso na mbala moko.”
