Ndenge ekomamá na Luka 1:1-80

YOKÁ NA

Luka azali koloba na Teofile (1-4)
Gabriele asakoli kobotama ya Yoane Mobatisi (5-25)
Gabriele asakoli kobotama ya Yesu (26-38)
Maria ayei kotala Elizabeti (39-45)
Maria akumisi Yehova (46-56)
Yoane abotami mpe bapesi ye nkombo (57-66)
Esakweli ya Zekaria (67-80)

1 Lokola bato mingi babandi kokoma lisolo ya makambo oyo tondimaka mpenza,+ ² kaka ndenge tozwaki yango epai ya baoyo bamonaki makambo yango na miso banda na ebandeli mpe bakómaki+ basaleli oyo bazali kosakola nsango yango,+ ³ ngai mpe nazwaki ekateli, mpo nalandelaki makambo nyonso malamumalamu banda na ebandeli, ete nakomela yo yango na molɔngɔ mpenza, Ee Teofile,+ moto ya lokumu mingi, ⁴ mpo oyeba mpenza ete makambo oyo bateyaki yo na monɔkɔ ezali mpenza solo.+ ⁵ Na mikolo oyo Erode*+ azalaki mokonzi ya Yudea, ezalaki na nganga-nzambe moko na nkombo Zekaria, ya etuluku ya Abiya.+ Mwasi na ye azalaki moko ya bana basi* ya Arona, mpe nkombo na ye ezalaki Elizabeti. ⁶ Bango mibale bazalaki bato ya sembo na miso ya Nzambe, bazalaki kotambola na boyokani na mitindo mpe mibeko nyonso ya Yehova* kozanga mbeba. ⁷ Kasi bazalaki na mwana te, mpo Elizabeti azalaki ekomba, mpe bakómaki na mbula mingi mpenza. ⁸ Nzokande ntango Zekaria azalaki kosala mosala na ye ya nganga-nzambe elongo na etuluku+ na ye liboso ya Nzambe, ⁹ na kolanda momeseno oyo etyamá mpo na bonganga-nzambe, ekómaki ngala na ye ya kopesa likabo ya mpaka ya malasi,+ mpe akɔtaki na esika mosantu ya Yehova.*+ ¹⁰ Mpe na libándá, bato nyonso bazalaki kobondela na ngonga ya kopesa likabo ya mpaka ya malasi. ¹¹ Anzelu ya Yehova* abimelaki ye, atɛlɛmaki na lobɔkɔ ya mobali ya etumbelo ya mpaka ya malasi. ¹² Ntango Zekaria amonaki ye, abulunganaki mpe akómaki kobanga. ¹³ Kasi anzelu yango alobaki na ye: “Kobanga te, Zekaria, mpo Nzambe ayoki libondeli* na yo, mwasi na yo Elizabeti akobotela yo mwana mobali, mpe okopesa ye nkombo Yoane.+ ¹⁴ Okozala na esengo mpe na nsai mingi, mpe bato mingi bakosepela mpo na kobotama na ye,+ ¹⁵ mpo akozala moto monene na miso ya Yehova.*+ Kasi asengeli komɛla vinyo te to masanga mosusu nyonso oyo elangwisaka,+ mpe akotonda na elimo santu liboso kutu abotama,*+ ¹⁶ mpe akozongisa ebele ya bana ya Yisraele epai ya Yehova* Nzambe na bango.+ ¹⁷ Lisusu, akotambola liboso ya Nzambe na elimo mpe na nguya ya Eliya,+ mpo na kozongisa mitema ya batata epai ya bana,+ mpo na kosalisa bato oyo bazangi botosi básala makambo na bwanya lokola bato ya sembo, mpe mpo na kobongisela Yehova* bato oyo babongisami.”+ ¹⁸ Zekaria alobaki na anzelu: “Ndenge nini nakoyeba ete likambo yango ezali mpenza solo? Mpo nakómi mobange, mpe mwasi na ngai akómi na mbula mingi mpenza.” ¹⁹ Anzelu azongiselaki ye: “Ngai nazali Gabriele,+ natɛlɛmaka pene na Nzambe liboso na ye,+ mpe natindamaki mpo na koloba na yo mpe komemela yo nsango malamu oyo. ²⁰ Kasi talá! okokóma baba, okokoka koloba te tii mokolo makambo wana ekosalema, mpo ondimi maloba na ngai te, oyo ekokokisama na ntango na yango oyo etyami.” ²¹ Na ntango wana, bato bazalaki kaka kozela Zekaria, mpe bazalaki kokamwa ndenge aumelaki mingi na esika mosantu. ²² Kasi ntango abimaki, azalaki kokoka koloba na bango te, mpe basosolaki ete auti komona likamwisi* moko na esika mosantu. Azalaki kaka kosala bango bilembo na mabɔkɔ, kasi atikalaki baba. ²³ Ntango mikolo na ye ya kosala mosala mosantu* esilaki, azongaki epai na ye. ²⁴ Nsima ya mwa mikolo, mwasi na ye Elizabeti azwaki zemi, mpe amibombaki sanza mitano, azalaki koloba: ²⁵ “Talá likambo oyo Yehova* asaleli ngai na mikolo oyo: atyeli ngai likebi mpe alongoli nsɔni na ngai na miso ya bato.”+ ²⁶ Na sanza ya motoba ya zemi ya Elizabeti, Nzambe atindaki anzelu Gabriele+ na Nazarete, engumba moko ya Galile, ²⁷ epai ya ngɔndɔ*+ moko oyo mobali moko na nkombo Yozefe, ya ndako ya Davidi, alakaki libala; mpe nkombo ya ngɔndɔ yango ezalaki Maria.+ ²⁸ Ntango anzelu ayaki epai ya Maria, alobaki na ye: “Mbote, yo moto oyo bamoniseli boboto mingi, Yehova* azali na yo.” ²⁹ Kasi ntango ayokaki maloba na ye, abulunganaki mpe alukaki kokanga ntina ya mbote wana. ³⁰ Bongo anzelu alobaki na ye: “Kobanga te Maria, mpo ondimami na miso ya Nzambe. ³¹ Talá! okozwa zemi, okobota mwana mobali,+ mpe okopesa ye nkombo Yesu.+ ³² Ye akozala moto monene+ mpe akobengama Mwana ya Oyo-Aleki-Likoló,+ mpe Yehova* Nzambe akopesa ye kiti ya bokonzi ya Davidi nkɔkɔ* na ye,+ ³³ mpe akoyangela bakitani ya Yakobo lokola Mokonzi libela na libela, mpe Bokonzi na ye ekozala na nsuka te.”+ ³⁴ Kasi Maria alobaki na anzelu yango: “Ndenge nini yango ekosalema, mpo nasangisá naino nzoto na mobali te?”+ ³⁵ Anzelu azongiselaki ye: “Elimo santu ekoyela yo,+ mpe nguya ya Oyo-Aleki-Likoló ekozipa yo na elili na yango. Yango wana mwana oyo akobotama akobengama mosantu,+ Mwana ya Nzambe.+ ³⁶ Mpe talá! Elizabeti ndeko na yo azwi mpe zemi ya mwana mobali, na bobange na ye, ye moto bazalaki kobenga ekomba, oyo ezali sanza ya motoba ya zemi na ye; ³⁷ mpamba te mpo na Nzambe ezali na liloba moko te* oyo ekozanga kosalema.”+ ³⁸ Bongo Maria alobaki: “Talá! Nazali moombo ya Yehova!* Tiká esalema mpo na ngai ndenge olobi.” Nsima na yango anzelu atikaki ye, akei. ³⁹ Bongo na mikolo yango, Maria asimbaki nzela mpe akendaki nokinoki na etúká ya ngombangomba, na engumba moko ya Yuda. ⁴⁰ Akɔtaki na ndako ya Zekaria mpe apesaki Elizabeti mbote. ⁴¹ Ntango Elizabeti ayokaki mbote ya Maria, mwana na kati ya libumu na ye aninganaki makasi, mpe Elizabeti atondaki na elimo santu. ⁴² Mpe abelelaki na mongongo makasi, alobi: “Opambwami na kati ya basi, mpe mwana oyo azali na kati ya libumu na yo apambwami! ⁴³ Bongo ndenge nini nazwi libaku malamu oyo, ete mama ya Nkolo na ngai aya epai na ngai? ⁴⁴ Mpo talá! ntango kaka nayokaki mbote na yo, mwana na kati ya libumu na ngai aninganaki makasi mpo na esengo. ⁴⁵ Esengo mpe na mwasi oyo andimi, mpo makambo yango oyo Yehova* alobi na ye ekokokisama mpenza.” ⁴⁶ Mpe Maria alobaki: “Molimo* na ngai ezali kokumisa Yehova,*+ ⁴⁷ mpe elimo na ngai etondi na esengo mpo na Nzambe Mobikisi na ngai;+ ⁴⁸ mpo amoni moombo na ye ya mwasi,+ atako azali moto mpamba. Mpo talá! banda sikoyo mabota nyonso bakotánga ngai moto ya esengo,+ ⁴⁹ mpo Moto ya nguya asali makambo ya minene mpo na ngai, mpe nkombo na ye ezali mosantu;+ ⁵⁰ mpe motema mawa na ye ezali likoló ya bato oyo babangaka ye libota na libota.+ ⁵¹ Asali makambo ya nguya na lobɔkɔ na ye; apalanganisi bato oyo bazali na lolendo na makanisi ya mitema na bango.+ ⁵² Akitisi bato ya nguya na bakiti ya bokonzi+ mpe atomboli bato mpamba;+ ⁵³ atondisi bato ya nzala na biloko ya malamu+ mpe azongisi bato ya bomɛngo mabɔkɔ mpamba. ⁵⁴ Asalisi Yisraele mosaleli na ye, mpo abosani te motema mawa+ na ye libela na libela, ⁵⁵ kaka ndenge alobaki yango na bankɔkɔ na biso, na Abrahama mpe na bana*+ na ye.” ⁵⁶ Maria afandaki elongo na ye sanza soki misato, mpe na nsima azongaki na ndako na ye. ⁵⁷ Nzokande ntango oyo Elizabeti asengelaki kobota ekokaki, mpe abotaki mwana mobali. ⁵⁸ Bato oyo bafandi penepene mpe bato ya libota na ye bayokaki ete Yehova* amoniselaki ye motema mawa mingi, mpe basepelaki elongo na ye.+ ⁵⁹ Na mokolo ya mwambe bayaki kokata mwana yango ngenga,+ mpe balingaki kopesa ye nkombo ya tata na ye, Zekaria. ⁶⁰ Kasi mama na ye alobaki na bango: “Te! nkombo na ye ekozala Yoane.” ⁶¹ Bongo balobaki na ye: “Ata moto moko te na libota na yo azali na nkombo wana.” ⁶² Bongo batunaki tata na ye na bilembo nkombo nini alingi bápesa mwana. ⁶³ Asɛngaki libaya ya kokomela mpe akomaki: “Nkombo na ye Yoane.”+ Bongo bango nyonso bakamwaki. ⁶⁴ Na mbala moko monɔkɔ mpe lolemo na ye efungwamaki, bongo abandaki koloba+ lisusu mpe kosanzola Nzambe. ⁶⁵ Mpe bato nyonso oyo bazalaki kofanda penepene na bango bakómaki kobanga; mpe babandaki kolobela makambo nyonso wana na etúká mobimba ya ngombangomba ya Yudea. ⁶⁶ Mpe bato nyonso oyo bayokaki yango babombaki yango na mitema na bango mpe bazalaki komituna: “Mwana oyo akozala mpenza nani?” Mpo lobɔkɔ ya Yehova* ezalaki mpenza na ye. ⁶⁷ Bongo Zekaria tata na ye atondaki na elimo santu, mpe asakolaki, alobi: ⁶⁸ “Tiká Yehova* Nzambe ya Yisraele asanzolama,+ mpo atyeli bato na ye likebi mpe asikoli+ bango. ⁶⁹ Abimiseli biso mobikisi ya nguya*+ na libota* ya mosaleli na ye Davidi,+ ⁷⁰ kaka ndenge alobaki na nzela ya basakoli na ye basantu ya ntango ya kala,+ ⁷¹ ete akobikisa biso na banguna na biso mpe na lobɔkɔ ya baoyo nyonso bayinaka biso.+ ⁷² Na bongo Nzambe akomonisela biso motema mawa ndenge alakaki bankɔkɔ na biso mpe akokanisa lisusu kondimana+ na ye mosantu, ⁷³ ndai oyo alapelaki nkɔkɔ na biso Abrahama,+ ⁷⁴ ete nsima ya kobikisa biso na mabɔkɔ ya banguna na biso, akopesa biso libaku malamu ya kosalela ye mosala mosantu kozanga kobanga, ⁷⁵ na bosembo mpe na boyengebene liboso na ye mikolo nyonso ya bomoi na biso. ⁷⁶ Kasi yo, mwana moke, okobengama mosakoli ya Oyo-Aleki-Likoló, mpo okotambola liboso ya Yehova* mpo na kobongisa banzela na ye,+ ⁷⁷ mpo na koyebisa bato na ye ete akobikisa bango na nzela ya bolimbisi ya masumu na bango,+ ⁷⁸ mpo na mawa monene ya Nzambe na biso. Mpo na mawa yango, tokomona pole euti na likoló, oyo ezali kongɛnga lokola kotana ya ntɔngɔ, ⁷⁹ mpo na kopesa pole na bato oyo bazali kofanda na molili mpe na elili ya liwa,+ mpo na kotambwisa makolo na biso na nzela ya kimya.” ⁸⁰ Mpe mwana yango azalaki kokola mpe akɔmɛlaki,* mpe azalaki kaka kofanda na esobe* tii mokolo oyo amilakisaki polele na Yisraele.