Danyele 6:1-28
6 Dariuse amonaki malamu ete atya basatrape 120 mpo na kokamba bokonzi na ye mobimba.+
2 Ezalaki na bankumu minene misato likoló na bango, moko na bango Danyele;+ mpe basatrape+ bazalaki kopesa bango lapolo mpo na kobatela matomba ya mokonzi.
3 Nzokande Danyele azalaki na makoki mingi koleka bankumu minene mosusu ná basatrape, mpo azalaki na elimo moko ya kokamwa.+ Mokonzi akanaki kotya ye na esika ya likoló na bokonzi mobimba.
4 Na ntango yango, bankumu minene mpe basatrape bazalaki koluka mwa bambeba ya kofunda Danyele na ndenge na ye ya kotambwisa makambo ya Leta,* kasi bazwaki ata mbeba moko te ya kofunda ye to likambo moko ya mabe, mpo azalaki moto ya kotyela motema, azalaki kozwa makambo na lisɛki te mpe likambo moko te ya mabe emonanaki epai na ye.
5 Bongo mibali yango babandaki koloba boye: “Tokozwa ata mbeba moko te ya kofunda Danyele oyo, lobá kaka soki toluki yango na mobeko ya Nzambe na ye.”+
6 Na yango bankumu minene ná basatrape bakɔtaki mbangu epai ya mokonzi, mpe balobaki na ye: “Ee Mokonzi Dariuse, zalá na bomoi mpo na libela.
7 Bankumu nyonso oyo basalelaka mokonzi, bakomisɛrɛ, basatrape, basaleli minene ya mokonzi mpe baguvɛrnɛrɛ, bayokanaki ete básɛnga mokonzi abimisa mobeko moko mpe atya epekiseli oyo: mikolo 30 mobimba, moto oyo akobondela* nzambe to moto mosusu kasi yo te, Ee mokonzi, asengeli kobwakama na libulu ya bankɔsi.+
8 Sikoyo, Ee mokonzi, bimisá mobeko na mokanda mpe tyá yango lobɔkɔ,+ mpo ebongwana te, na kolanda mobeko ya Bamede ná Baperse, oyo ekoki kolongolama te.”+
9 Bongo Mokonzi Dariuse atyaki lobɔkɔ na mokanda ya epekiseli yango.
10 Ntango kaka Danyele ayebaki ete mokanda yango etyami lobɔkɔ, akendaki na ndako na ye. Shambrɛ na ye oyo ezalaki na nsamba ezalaki na bafɛnɛtrɛ ya kofungwama, na ngámbo ya Yerusaleme.+ Mbala misato na mokolo azalaki kofukama, kobondela mpe kosanzola Nzambe na ye, ndenge azalaki kosala mbala na mbala, liboso ya likambo yango.
11 Bongo mibali yango bakɔtaki mbala moko mpe bakutaki Danyele azali kobondela Nzambe na ye mpe kosɛnga ye amonisela ye boboto.
12 Na yango bakendaki epai ya mokonzi mpe bakundwelaki ye epekiseli oyo atyaki, balobi: “Otyaki lobɔkɔ na mokanda moko ya epekiseli oyo elobaki ete, mikolo 30 mobimba, moto oyo akobondela nzambe to moto mosusu kasi yo te, Ee mokonzi, asengeli kobwakama na libulu ya bankɔsi, boye te?” Mokonzi azongisaki: “Likambo yango ezali bongo na kolanda mobeko ya Bamede ná Baperse, oyo ekoki kolongolama te.”+
13 Na mbala moko balobaki na mokonzi ete: “Danyele, moko ya bato ya Yuda oyo bamemamaki awa,+ amoni yo mpamba, Ee mokonzi, mpe amoni mpamba epekiseli oyo otyaki lobɔkɔ; abondelaka mbala misato na mokolo.”+
14 Ntango kaka mokonzi ayokaki bongo, amitungisaki mingi, mpe akómaki kokanisa ndenge ya kobikisa Danyele; tii moi elalaki, asalaki nyonso oyo akokaki mpo na kobikisa ye.
15 Nsukansuka mibali yango bakɔtaki mbangu epai ya mokonzi, mpe balobaki na ye: “Ee mokonzi, kobosana te ete na mobeko ya Bamede ná Baperse, epekiseli nyonso to mobeko nyonso oyo mokonzi abimisi ekoki kobongwana te.”+
16 Bongo ndenge mokonzi apesaki mitindo, bamemaki Danyele mpe babwakaki ye na libulu ya bankɔsi.+ Mokonzi alobaki na Danyele: “Nzambe na yo oyo osalelaka ntango nyonso, akobikisa yo.”
17 Bongo bamemaki libanga moko mpe batyaki yango na monɔkɔ ya libulu yango, mpe mokonzi atyaki yango elembo na lopɛtɛ na ye ya kotya bilembo mpe na lopɛtɛ ya kotya bilembo ya bato na ye ya lokumu, mpo eloko moko te ebongwana mpo na Danyele.
18 Na nsima mokonzi akendaki na ndako na ye ya bokonzi. Akilaki bilei butu mobimba, mpe aboyaki eloko nyonso oyo ekoki kosepelisa ye,* mpe akokaki kolala te.*
19 Nsukansuka, na ntɔngɔntɔngɔ, mokonzi atɛlɛmaki mpe akendaki nokinoki na libulu ya bankɔsi.
20 Ntango mokonzi akómaki pene na libulu yango, abelelaki Danyele na mongongo ya mawa. Atunaki ye: “Ee Danyele, mosaleli ya Nzambe ya bomoi, Nzambe na yo oyo osalelaka ntango nyonso alongi kobikisa yo na bankɔsi?”
21 Na mbala moko Danyele alobaki na mokonzi ete: “Ee mokonzi, zalá na bomoi mpo na libela.
22 Nzambe na ngai atindaki anzelu na ye mpe akangaki monɔkɔ ya bankɔsi,+ mpe esali ngai eloko te,+ mpo nazali na ngambo te liboso na ye; mpe nasaleli yo likambo moko te ya mabe, Ee mokonzi.”
23 Mokonzi atondaki na esengo, mpe apesaki mitindo ete bábimisa Danyele na libulu yango. Ntango Danyele abimaki na libulu, azalaki ata na mpota moko te, mpo atyelaki Nzambe na ye motema.+
24 Na nsima ndenge mokonzi apesaki mitindo, bayaki na mibali oyo bafundaki Danyele, mpe babwakaki bango na libulu ya bankɔsi, elongo na bana na bango mpe basi na bango. Liboso kutu bákóma na nsuka ya libulu, bankɔsi ekangaki bango, mpe ebukaki mikuwa na bango nyonso.+
25 Bongo Mokonzi Dariuse akomelaki bato ya bikólo nyonso, ya bamboka nyonso mpe ya minɔkɔ nyonso oyo bafandi na mabele mobimba ete:+ “Kimya ezala na bino!
26 Napesi etinda ete na teritware nyonso ya bokonzi na ngai, bato basengeli kolɛnga mpe kobanga liboso ya Nzambe ya Danyele.+ Mpo azali Nzambe ya bomoi mpe azali libela na libela. Bokonzi na ye ekobebisama te, mpe boyangeli na ye ezali mpo na seko.+
27 Asikolaka,+ abikisaka, mpe asalaka bilembo mpe makambo ya kokamwa na likoló mpe na mabele,+ mpo abikisi Danyele na manzaka* ya bankɔsi.”
28 Na yango, makambo ya Danyele etambolaki malamu na bokonzi ya Dariuse+ mpe na bokonzi ya Siruse Moperse.+
Maloba na nse
^ Lil., “bokonzi.”
^ To, “akosala lilɔmbɔ epai ya.”
^ To mbala mosusu, “bakɔtisaki babɛti-miziki te.”
^ Lil., “mpɔngi ekimaki ye.”
^ Lil., “na mabɔkɔ.”
