Eleki sikoyo bambula soki 3 000, powɛti moko akomaki boye: “Nasalami na ndenge moko ya kokamwa, na ndenge moko ya nsɔmɔ.” (Nzembo 139:14) Soki okanisi ndenge oyo mwana abandaka na mwa selile moko ya moke na libumu ya mama, yango ekamwisaka yo te? Bato mingi bamonaka mpenza ete Mozalisi moko nde akelá bikelamu nyonso ya bomoi.​—Tángá Nzembo 139:13-17; Baebre 3:4.

Nzambe oyo akelá likoló mpe mabele oyo tofandi, akelá mpe bomoi. (Nzembo 36:9) Asololaki na bato mpe ayebisá biso makambo etali ye.​—Tángá Yisaya 45:18.

Nzoto na biso ekokani na oyo ya banyama na makambo mingi. Kasi ezali bongo mpo Mozalisi akelá bato ná banyama mpo báfanda na mabele. Asalelaki nyama te mpo na kokela moto ya liboso kasi nde putulu ya mabele.​—Tángá Ebandeli 1:24; 2:7.

Bato bakeseni na banyama na makambo mibale ya ntina mingi. Ya liboso, bato bazali na likoki ya koyeba, kolinga mpe kotosa Mozalisi. Ya mibale, Nzambe akelá bato mpo bázala na bomoi ya seko, kasi ezali bongo te mpo na banyama. Kasi lelo bato nyonso bakufaka mpo moto ya liboso aboyaki litambwisi ya Mozalisi.​—Tángá Ebandeli 1:27; 2:15-17.