Mbula nyonso, pápa mpe bakambi mosusu ya mangomba bateyaka nsango ya kimya, na elikya ete eleko ya Noele ekokokisa maloba oyo ya anzelu: “Kimya na mabele na bato oyo ye andimi.” Bato mosusu basalaka mibembo mpo na fɛti yango.

Kimya na boumeli ya eleko ya Noele ezalaka ya ntango mokuse. Na ndakisa, na Desɛmbɛ 1914, ntango mikili ya mpoto emikɔtisaki na Etumba ya Liboso ya mokili mobimba, basoda ya Angleterre ná ya Allemagne babimaki na bisika oyo babombanaki mpe basalaki fɛti ya Noele esika moko. Balyaki, bamɛlaki masanga mpe makaya esika moko. Babɛtaki kutu bale elongo. Kasi, esengo yango eumelaki te. Na mokanda oyo eutaki na esika oyo bazalaki kobunda, soda moko ya Angleterre alobaki ete soda mosusu ya Allemagne ayebisaki ye boye: “Lelo tozali na kimya. Kasi lobi, okobunda mpo na ekólo na yo; ngai nakobunda mpo na oyo ya ngai.”

“Baboteli biso mwana . . . bakopesa ye nkombo . . . Nkumu ya Kimya. Bonene ya boyangeli na ye mpe kimya, . . . ekozala na nsuka te.” (Yisaya 9:6, 7) Esakweli yango oyo etali Yesu Kristo ezali mpenza kokitisa motema! Yesu abotamaki te awa na mabele mpo na kotya kimya kaka mokolo moko na mbula. Lokola azali Mokonzi kuna na likoló, akotya kimya ya solosolo oyo ekosuka te.

“Na nzela na ngai [Yesu] bózala na kimya. Na mokili bozali na bolɔzi, kasi bózala na mpiko! Ngai nalongi mokili.” (Yoane 16:33) Ata mpe lelo, Yesu asalisaka bayekoli na ye bázala na kimya. Toboyi te, bakristo bazalaka na bolɔzi. Kasi, na lisalisi ya Biblia, bayebi ntina oyo bampasi ezali mpe ndenge oyo Yesu akotya kimya ya libela. Na yango, bazalaka na kimya ya motema.

Lokola balandaka toli ya Yesu, Batatoli ya Yehova bazali na kimya ya ndenge wana, atako bazali bato ya bikólo, ya mposo to minɔkɔ ekeseni. Tosɛngi yo oyangana na makita na bango na Ndako ya Bokonzi mpo yo moko omona na miso. Ntango mosusu okondima lokola bato mosusu ete kimya na bango eleki mpenza kimya oyo fɛti ya Noele ekoki kopesa.