Mituna ya batángi . . .

Nzambe amonaka ete loposo moko eleki oyo ya bato mosusu?

▪ Te, amonaka bongo te. Biblia elobi polele ete: “Nzambe aponaka bilongi te, kasi na ekólo nyonso moto oyo azali kobanga ye mpe azali kosala makambo ya boyengebene andimami na ye.”​—Misala 10:34, 35.

Likanisi ya Nzambe na likambo yango ekeseni mosika na oyo ya bato ya kozanga kokoka. Bato mingi bakanisaka ete loposo moko (mingimingi oyo ya bango) eleki oyo ya bato mosusu. Makanisi yango emonisi oyo ya moto moko na nkombo Charles Darwin, oyo akomaki ete: “Na mikolo ezali koya, . . . bato ya mposo ya malamu bakosila pene na nyonso mpe baoyo ya mposo ya mabe nde bakozwa esika na bango.” Likambo ya mawa, bato mingi banyokwamaki na bato ya mposo mosusu oyo bamimonaki ete baleki bango.

Kokanisa ete mposo boye to boye eleki oyo ya basusu ebongi? Na ndakisa, bato ya siansi bapesi mpenza bilembeteli oyo emonisi ete mposo ya bato mosusu eleki oyo ya baninga? Kutu, Bryan Sykes, profesɛrɛ moko na Iniversite ya Oxford, alobi ete: “Ezali te na ba-gène oyo ezali kaka mpo na bato ya ekólo to ya mposo moko boye. . . . Namitunaka ntango nyonso soki ezali na ADN ya Bagrɛki to ya bato ya Italie, kasi nayebi ete ezalaka te. . . . Tokeseni mpenza te.”

Makanisi na ye eyokani na oyo totángaka na Biblia. Biblia eteyaka ete Nzambe akelaki kaka mobali moko mpe mwasi moko, mpe bato nyonso bautaki epai na bango. (Ebandeli 3:20; Misala 17:26) Na yango, na miso ya Nzambe, bato nyonso bazali ndenge moko.

Yehova azwaka ata moke te na motuya mposo ya moto to elongi na ye. Kasi, azwaka na motuya eloko ya ntina mingi koleka​—motema na biso to bomoto na biso ya kati. Alobi ete: “Bato batalaka elongi ya moto, kasi ngai Yawe natalaka motema.” (1 Samwele 16:7, Biblia na lingala ya lelo oyo) Koyeba likambo yango, ekoki mpenza kolendisa biso. Ndenge nini?

Tózala bato ya mposo boye to boye, mingi kati na biso tosepelaka te na makambo mosusu oyo emonanaka na nzoto na biso, atako bongo, tozali mpenza te na likoki ya kobongola yango. Kasi, tokoki kobongisa likambo oyo eleki ntina​—makanisi ya motema na biso. (Bakolose 3:9-11) Soki tomitaleli malamu, tokoki komona lokola biso mpe tozali na makanisi ya komimona ete toleki ata mwa moke bato ya mposo mosusu, to bango nde baleki biso. Lokola makanisi wana nyonso eyokani na oyo ya Nzambe te, tosengeli kosala makasi tólongola yango nyonso na motema na biso.​—Nzembo 139:23, 24.

Ntango tozali kosala makasi tómitalela mpe tótalela basusu ndenge Yehova asalaka, tokoki mpenza kolikya ete akosalisa biso. Liloba na ye eyebisi biso ete: “Mpo na Yehova, miso na ye ezali kotambolatambola na mabele mobimba mpo na komonisa makasi na ye mpo na bolamu ya baoyo motema na bango ezali mobimba epai na ye.” (2 Ntango 16:9) Yango ezali solo, ezala tozali na mposo ya ndenge nini.