YESU ayokaki ete Lazare, moninga na ye ya motema azali kobɛla makasi. Maria ná Marta, bandeko basi ya Lazare, batindaki moto moko amemela Yesu nsango yango. Moto yango autaki na Betania, esika oyo Lazare ná bandeko na ye ya basi bazalaki kofanda. Bandeko yango bandimaki ete Yesu akoki kobikisa ndeko na bango ya mobali, ata soki bazalaki kofanda mosika na ngámbo mosusu ya Ebale Yordani. Bayebaki ete abikisaki bato na mosika.​—Matai 8:5-13; Yoane 11:1-3.

Ntango momemi-nsango yango akómaki epai ya Yesu mpe ayebisaki ye nsango yango ya mawa, Yesu asalaki eloko moko te mpo na yango. Biblia elobi boye: “Afandaki bongo mikolo mibale mpenza na esika azalaki.” (Yoane 11:6) Oyebi mpo na nini Yesu awelaki te kosalisa Lazare?— * Tiká tólobela likambo yango.

Yesu ayebaki ete Lazare akufi. Yango wana, ayebisaki bantoma na ye boye: “Tókende lisusu na Yudea.” Bayekoli balobaki boye: “Kala mingi te bato ya Yudea bazalaki koluka kobamba yo mabanga, mpe olingi kokende lisusu kuna?” Yesu ayebisaki bango boye: “Lazare moninga na biso akei kopema, kasi nazali kokende kuna mpo na kolamwisa ye na mpɔngi.”

Bantoma bazongiselaki ye boye: “Nkolo, soki akei kopema, akoyoka malamu.” Na nsima, Yesu alobaki na bango boye: “Lazare akufi.” Bongo alobaki likambo moko oyo ekamwisaki bango: “Nazali kosepela mpo na bino na ndenge nazalaki kuna te. . . . Kasi tókende epai na ye.”

Na mpiko nyonso, Toma alobaki boye: ‘Biso mpe tókende, mpo tókufa na Yesu elongo.’ Toma ayebaki ete banguna bakoluka lisusu koboma Yesu mpe bakoki koboma mpe bantoma. Atako bongo, bango nyonso bakendaki. Nsima ya mikolo soki mibale, bakómaki na Betania, engumba oyo Lazare azalaki kofanda. Ezali na ntaka ya kilomɛtrɛ soki misato longwa na Yerusaleme.​—Yoane 11:7-18.

Oyebi mpo na nini Yesu azalaki na esengo na ndenge awelaki kokende te?— Liboso Yesu asekwisaki mpe bato, kasi bato yango bautaki kaka kokufa mwa bangonga moke liboso Yesu asekwisa bango. (Luka 7:11-17, 22; 8:49-56) Nzokande, nzoto ya Lazare esalaki mikolo na kati ya lilita. Moto moko te akokaki kotya ntembe ete Lazare akufaki mpenza!

Ntango Marta, ndeko ya Lazare ayokaki ete Yesu akómi pene ya Betania, akimaki mbangu mpo na kokutana na ye; alobaki boye: “Nkolo, soki ozalaki awa mbɛlɛ ndeko na ngai ya mobali akufaki te.” Yesu alobaki na ye boye: “Ndeko na yo ya mobali akosekwa.” Marta akimaki mbangu mpe akendaki koyebisa ndeko  na ye Maria na nkuku boye: “Moteyi azali awa mpe azali kobenga yo.”

Mbala moko, Maria akendaki epai ya Yesu. Ebele ya bato oyo bazalaki wana bakanisaki ete akei na lilita, yango wana balandaki ye. Ntango Yesu amonaki Maria mpe ebele ya bato bazali kolela, ye mpe alelaki, ‘abimisaki mpisoli.’ Mosika te, bango nyonso bakómaki na lilita, oyo ezipamaki na libanga moko monene. Yesu alobaki boye: “Bólongola libanga.” Kasi, Marta alobaki boye: “Nkolo, sikoyo asengeli kolumba nsolo, mpo esali mikolo minei.”

Bato basalaki oyo Yesu alobaki mpe balongolaki libanga. Na nsima, Yesu abondelaki, atɔndaki Nzambe mpo na nguya oyo ayebaki ete akopesa ye mpo na kosekwisa Lazare. Yesu agangaki “na mongongo makasi ete: ‘Lazare, bimá!’” Mpe Lazare abimaki, ‘akangami na bilamba ya kozinga.’ Na yango, Yesu alobaki boye: “Bófungola ye mpe bótika ye akende.”​—Yoane 11:19-44.

Oyebi sikoyo mpo na nini Yesu awelaki kokende te?— Ayebaki ete soki aweli kokende te, akopesa litatoli malamu mpo na Tata na ye, Yehova. Mpe lokola aponaki ntango ya malamu koleka, ebele ya bato bandimelaki Nzambe. (Yoane 11:45) Omoni liteya oyo tokoki koyekola epai ya Yesu?—

Yo mpe okoki kopona ntango ya malamu ya kopesa litatoli mpo na makambo kitoko oyo Nzambe asalá mpe oyo akosala. Ntango mosusu okoki koyebisa baninga na yo ya kelasi to balakisi na yo makambo yango. Ata na kati ya kelasi, bilenge mosusu bazwaki libaku ya koloba mpo na mapamboli oyo Bokonzi ya Nzambe ekomemela bato. Ya solo, okoki te kosekwisa bakufi, kasi okoki kosalisa basusu báyeba Nzambe oyo akozongisa na bomoi bato oyo tolingaka.