Kokanisela baninga mabe ekosila!
Bamilio ya bato basalelá batoli oyo tolobeli na masolo oyo eleki mpe balongi kolongola na mitema na bango ezaleli ya kokanisela baninga mabe. Atako bongo, mpo na koloba solo, biso moko tokoki kosilisa te libela ezaleli ya kokanisela bato mabe na mitema na biso. Yango elingi koloba ete ezaleli yango ekosila soki moke te?
Guvɛrnema moko ya kokoka
Emonani polele ete baguvɛrnema ya bato ekoki kolongola te ezaleli ya kokanisela bato mabe. Kasi elingi nde koloba ete ata guvɛrnema moko te ekoki kosilisa ezaleli yango?
Guvɛrnema oyo ekosilisa ezaleli ya kokanisela bato mabe esengeli
-
1. Kotinda bato bábongola ndenge ya kokanisa mpe bábongola mitema na bango.
-
2. Kokanga mpota oyo bato mosusu bazoká oyo epekisaka bango kosalela bato mosusu makambo ya malamu.
-
3. Kozwa bakonzi ya malamu oyo bazwaka bato nyonso ndenge moko.
-
4. Kosangisa bato ya bikólo nyonso.
Biblia emonisi ete Nzambe asilá kosala guvɛrnema ya ndenge wana. Biblia ebengi yango “Bokonzi ya Nzambe.”—Luka 4:43.
Talá makambo Bokonzi yango ekosala.
1. Ekoteya bato bizaleli malamu
“Bato oyo bafandi na mabele oyo ebotaka bakoyekola boyengebene.”—YISAYA 26:9.
“Mosala ya boyengebene ya solo ekokóma mpenza kimya, mpe mbuma ya boyengebene ya solo ekokóma kimya mpe libateli mpo na ntango oyo etyami ndelo te.”—YISAYA 32:17.
Elingi koloba nini? Bokonzi ya Nzambe ekoteya bato makambo ya malamu. Ntango bato bayekoli kosala makambo ya malamu na esika ya makambo ya mabe—makambo ya bosembo na esika ya makambo oyo ezangi bosembo—makanisi na bango mpo na bato mosusu ekobongwana. Moto nyonso akoyeba ete likambo ya malamu ya kosala ezali nde kolinga bato ya ndenge nyonso.
2. Ekosukisa makambo ya mabe
Nzambe “akopangwisa mpisoli nyonso na miso na bango, mpe liwa ekozala lisusu te, ná lilaka, ná koganga, na mpasi ekozala lisusu mpe te. Makambo ya kala eleki.”—EMONISELI 21:4.
Elingi koloba nini? Bokonzi ya Nzambe ekosilisa bampasi nyonso oyo euti na makambo ya mabe. Bato oyo kala banyokwamaki bakoyina lisusu bato te.
3. Mokonzi ya malamu
“Akosambisa te na kolanda kaka oyo ekomonana na miso na ye, mpe akopamela te na kolanda kaka makambo oyo matoi na ye eyoki. Mpe akosambisa na boyengebene mpenza bato oyo bazangá, mpe akopamela na kolongobana mpo na bato ya komikitisa oyo bazali na mabele.”—YISAYA 11:3, 4.
Elingi koloba nini? Yesu Kristo, Mokonzi na Bokonzi ya Nzambe oyo ezali na likoló, akoyangela mabele malamu mpenza mpe na miso na ye bato nyonso bakozala ndenge moko. Yesu akolinga ekólo moko koleka ekólo mosusu te, mpe akosala ete bato nyonso na mokili mobimba bátosa mibeko na ye.
4. Bomoko ekozala
Bokonzi ya Nzambe ekoteya bato ‘bázala na likanisi moko, bázala na bolingo moko, bázala na bomoko, bázala na likanisi kaka moko mpenza.’—BAFILIPI 2:2.
Elingi koloba nini? Bato oyo bakofanda na kati ya Bokonzi ya Nzambe bakozala na bomoko ya likolólikoló te. Bakozala na ‘bomoko mpenza’ mpo bakolingana na bolingo ya solosolo.
Talá mpe...
LINƆ́NGI YA MOSƐNZƐLI
Kokanisela basusu mabe ekosila ntango nini?
Bandakisa ya makambo oyo esalemaki mpenza emonisi ete Biblia ezali kosalisa bato bálonga ezaleli ya kokanisela basusu mabe. Ntango nini ekosila mpo na libela?
