ELOBELI TITRE YA EZIPELI | OZALI NA BOKONZI LIKOLÓ YA BOMOI NA YO?
Mokakatano: Komiyoka mabe
KOYOKA mawa, nkanda to kobomba nkanda etungisaka yo? Soki ezali bongo, okozala na ntango to makasi mingi te ya kokipe makambo oyo eleki mpenza ntina mpo na yo. Okoki kosala nini mpo na yango? *
NDAKISA YA BIBLIA: DAVIDI
Mokonzi Davidi akutanaki na makambo ndenge na ndenge oyo etungisaki ye mpe epesaki ye mawa. Nini esalisaki ye alɛmba nzoto te? Davidi atikaki makambo nyonso na mabɔkɔ ya Nzambe. (1 Samwele 24:12, 15) Akomaki mpe na mikanda ndenge azalaki komiyoka. Lokola azalaki moto ya kondima, azalaki kobondela mbala mingi. *
OYO GREGORY ASALAKA
Ndenge tomonisaki yango na lisolo ya ebandeli, Gregory abɛlaka maladi ya makanisi. Alobi boye: “Komitungisa na ngai elekaki ndelo mpe nayebaki te ndenge ya kosala.” Gregory asalaki nini mpo alonga? Alobi lisusu boye: “Mpo nazongisa makambo mwa moke na nzela, nandimaki lisalisi ya mwasi na ngai mpe ya baninga na ngai. Nalukaki mpe lisalisi ya monganga mpe nayekolaki makambo mingi etali maladi na ngai. Nsima ya kotika makambo mosusu oyo namesanaki kosala, nakómaki na mwa bokonzi likoló ya sante na ngai na esika ete yango ekonza ngai. Atako na bantango mosusu mitungisi yango ezongelaka ngai, nayebi sikoyo nini esalaka bongo mpe ndenge oyo nakoki kosala mpo namiyoka malamu.”
“Motema oyo ezali na esengo esalaka malamu lokola eloko oyo ebikisaka.”—Masese 17:22
OYO OKOKI KOSALA
Soki ozali kokoba komiyoka mabe, meká kosala makambo oyo elandi:
-
Komá ndenge ozali komiyoka na papye.
-
Monisá ndenge ozali komiyoka epai ya ndeko to moninga ya motema.
-
Komona mbala moko te ete ndenge ozali komiyoka mabe ekosala eloko te. Na ndakisa, omituna boye: ‘Ezali mpenza na makambo oyo esengeli kotinda ngai namitalela na ndenge ya mabe boye?’
-
Kotika te ete mitungisi, nkanda to kobomba nkanda ekonza yo. Kutu, salelá nde makasi na yo na makambo oyo ekoki komemela yo matomba. *
Na mokuse: Mbala mingi, komiyoka mabe ezalaka te mpo na makambo oyo tokutanaka na yango kasi nde mpo na ndenge oyo totalelaka yango.
^ par. 3 Moto akoki komiyoka mabe mpo sante ezali malamu te mpe yango ekoki kosɛnga aluka lisalisi ya minganga. Zulunalo Lamuká! etindi moto te andima lisalisi boye to boye ya minganga. Moto na moto asengeli kotalela malamu nini akosala liboso azwa ekateli.
^ par. 5 Mikapo mingi oyo ezali na mokanda ya Nzembo ezali mabondeli oyo Davidi asalaki mpe akomaki yango.
^ par. 13 Mpo na koyeba makambo mosusu, talá masolo “Ndenge ya kolonga mitungisi,” na Linɔ́ngi ya Mosɛnzɛli ya 01/07/2015.
Talá mpe...
LINƆ́NGI YA MOSƐNZƐLI
“Mayele ya kososola oyo moto azali na yango ekitisaka mpenza nkanda na ye”
Likambo moko oyo ekómelaki Davidi, mokonzi ya Yisraele ekoki kosalisa yo opekisa nkanda na yo ntango basilikisi yo to batumoli yo.
LAMUKÁ!
Sekele mpo na kozala na bomoi ya esengo
Bwanya ya Biblia ekoki mpenza kosalisa yo ozala na bomoi ya esengo? Lisolo oyo emonisi batoli minei ya Biblia oyo esalisaka mpenza.
BIYANO NA MITUNA YA BIBLIA
Biblia ekoki kosalisa ngai na ntango oyo nazali mawamawa?
Ezali na biloko misato oyo Nzambe apesaka moto oyo azali mawamawa.
BIYANO NA MITUNA YA BIBLIA
Nzambe akosalisa ngai soki nabondeli ye?
Nzambe akipaka mpenza makambo na ngai?
LAMUKÁ!
Ozalaka na “fɛti ntango nyonso”?
Atako mikakatano ezali, talá ndenge okoki kotya makanisi na makambo malamu mpe kozala na esengo na motema.
